Predicanapaj sumajta wakichikusun chayqa, runaswan parlariyta atillasun. Jesusqa discipulosninta niraj predicanankupaj kachashaspa, wakicherqaraj (Luc. 10:1-11). Paykunataj Jesús yachachisqanman jina ruwasqankurayku, maytapuni kusikorqanku imastachus ruwasqankumanta. ¿Imaynatá predicanapaj wakichikusunman? Tʼukurina imatachus ninanchejpi, imaynatachus chayta parlasqanchejman jinalla ninanchejpipis. Chantapis ñaupajmantaña tʼukurinanchej tiyan predicashanchej chaypi imastachus runas ninawanchejpi, imatachus noqanchej kutichinanchejpipis. Ajinamanta runaswan parlarishaspaqa mana manchachikusunchu, atisuntaj asirispa kʼachallamanta paykunawan parlariyta. w24.04 pág. 16 párrs. 6, 7

Sumaj willaykunata astawan willanchej Jehovata, santo sutintapis munakusqanchejrayku. Runasman predicayqa munakusqanchej Diosta alabay jina. Noqanchejpis Jehovaman ninchej: “Qanllamin jatunchanapaj jina kanki, yupaychanapaj jina, atiyta japʼinaykipaj jinataj”, nispa. ¿Imaynatataj Diosta jatunchanchej, yupaychanchejtaj? Jehovapuni tukuy imata ruwasqanta, kausaytapis qowasqanchejta sumajta sutʼinchaspa. Chanta, ¿imaynatataj Diosman “atiyta” qonchej? Tiemponchejta, kallpanchejta, kapuwasqanchejtapis atisqanchejman jina runasman willamunapaj churaspa (Mat. 6:33; Luc. 13:24; Col. 3:23). Arí, noqanchejmanqa munasqa Diosninchejmanta parlay mayta gustawanchej. Chantapis Diospa sutinmanta, sutin imachus niyta munasqanmantapis, runasman willayta munanchej. w24.05 pág. 17 párr. 11

Jehovaqa kunanña yanapawanchej sonqo tiyasqas, kusisqas kausakunanchejpaj. Aswan qhepamantaj wiñay kausayta qowasun. Sutʼita yachanchej Jehovaqa bendeciyta munawasqanchejta, chayta ruwananpajtaj atiyniyoj kasqanta. Chayta yachasqanchejraykutaj Jehovapaj tukuy atisqanchejta llankʼallanchejpuni, ñaupa tiempomanta kamachisnin jina. Timoteomanta parlarina (Heb. 6:10-12). Timoteoqa kausaj Diospi suyakorqa, yacharqataj bendecinantapuni (1 Tim. 4:10). Chayrayku tukuy atisqanta Jehovapaj llankʼarqa, wajkunata yanapananpajpis. ¿Imatataj pay ruwarqa? Apóstol Pabloqa Timoteota nerqa predicacionpi, congregacionpipis sumaj yachachej kananpaj astawan kallpachakunanta. Chantapis kallpachakunan karqa jóvenes, kurajkunapis paymanta yachakunankupaj jina kausakunanpaj. Chantapis Timoteoj wakin ruwaykunasnenqa mana juntʼayta atinanpaj jinallachu karqa. Payqa hermanosta munakuywan, sutʼitataj yuyaychanan karqa necesitasqankuman jina (1 Tim. 4:11-16; 2 Tim. 4:1-5). Timoteoqa yacharqa Jehová bendecinantapuni (Rom. 2:6, 7). w24.06 pág. 23 párrs. 10, 11