Yehowa îznê nade ku kesên ku gunehên giran dikin di nav xizmetkarên wî de bimînin. Ew nabêje ku gerek “bi dilovanî” îzin bê dayîn ku gunehkarên ku tobe nakin di civatê de bimînin. Belê, Yehowa dilrehm e, lê ew çavê xwe li ser gunehên giran nagire û ew standardên xwe naguherîne (Cihûda 4). Eger Yehowa îzin bidaya ku kesên ku tobe nakin di civatê de bimînin, wanê bikaribûya zerarê bidin temamiya civatê (Methelokên Silêman 13:20; 1. Korîntî 15:33). Dîsa jî, em fehm dikin ku Yehowa naxwaze ku kesek helak bibe. Loma, ew fersenda xelasbûnê dide her kesî. Eger kesek xwe serrast bike û xîret bike ku ji nû ve nêzîkî Yehowa bibe, ew hazir e ku rehmê li wî bike (Hêzekîêl 33:11; 2. Petrûs 3:9). Loma, gava zilamê li Korîntê tobe kir û dev ji gunehkirinê berda, Yehowa bi destê Pawlosê şandî ji civatê re got ku gerek ew wî efû bikin û ji nû ve di civatê de qebûl bikin. w24.08 16 par. 7; 18 par. 14-15

Di mîsala mî û bizinan de, Îsa Mesîh gotibû ku mirovên ku fersenda wan hene ku destekê bidin birayên wî yên hilbijartî, wê hukmekî çawa bistînin (Meta 25:31-46). Îsa Mesîh wê di dema “tengasiya mezin” de, yanî berî Harmegedonê hukmê wan bide (Meta 24:21). Çawa ku şivanek miyan ji bizinan vediqetîne, Îsa Mesîh wê kesên ku bi dilsozî destekê didin şagirtên wî yên hilbijartî ji kesên ku destekê nadin wan, veqetîne. Kitêba Pîroz ji berê ve gotibû ku Îsa Mesîh, ê ku ji aliyê Yehowa Xwedê ve wek hakim hatiye tayînkirin, wê bi edalet hukim bide (Îşaya 11:3, 4). Ew rind bala xwe dide nêrîn, kirin û gotinên mirovan, û ew dibîne ku ew li hemberî birayên wî yên hilbijartî û karê wan çawa ne (Meta 12:36, 37). Îsa Mesîh wê bizane ku kê destek daye birayên wî yên hilbijartî û karê wan. Mesela, kesên ku dişibin miyan di karê belavkirina mizgîniyê de destekê didin birayên Îsa Mesîh. w24.09 20-21 par. 3-4

Em dikarin pê derxin ka fikrên me û gotinên Kitêba Pîroz hev digirin yan na. Mesela, ciwanê ku ne emîn bû ku Yehowa qîmetê dide wî, dîsa bîne ber çavê xwe. Ji bo ku ew bizane ka fikra wî rast e yan na, gerek ew nêrîna Yehowa ya li ser vê meseleyê pê derxe. Gava em Kitêba Pîroz dixwînin, em qey dengê Yehowa dibihîzin. Lê ji bo ku em pê derxin ku nêrîna Yehowa ya li ser pirseke me ya xisûsî çi ye, xîret lazim e. Gerek em li ayetên wisa bigerin, ên ku bi halê me ve girêdayî ne. Ji bo lêgerînê, em dikarin hacetên lêkolînê, yên ku teşkîlata Yehowa dane destê me, bi kar bînin (Methelokên Silêman 2:3-6). Berî ku em dest bi lêgerînê bikin, bila em dua bikin, da ku Yehowa alî me bike ku em cewaba pirsa xwe bibînin. Paşê, em dikarin li prensîpên Kitêba Pîroz û melûmatên bifeyde bigerin. w24.10 25 par. 4-5