Cana le manușa le Iehovasche ci așunde lestar, vo bișialdea butivar pesche profețen caște phenen lenghe so avelas te întâmplol-pe dacă ci paruven pengo phiraimos nasul. Sar exemplo, o Del phendea prin o Ieremia: „Risar tut, doșale Israel. . . . Ci va avela te mai dichav pherdo holi caring tute, anda codoia că iubiv tumen ciaces. . . . Ci va avela te încărav holi anda sea o timpo. Numai te phenes că san doșalo, că tu vazdean tut contra o Iehova”. (Ier. 3:12, 13) Prin o Ioel, o Iehova phendea: „Aven parpale mande sea le ilesa”. (Ioel 2:12, 13) Sa cadea, o Iehova cărdea le Isaias te phenel: „Ujaren tumen! Duriaren de angla mânre iacha le buchia nasul cai cărdean-len! Na mai cheren o nasulimos!”. (Is. 1:16-19) Hai o Iehova phendea prin o Ezechiel: „Voiman me cana merel codo nasul? . . . Ci camav me mai mișto te risarel-pe catar lesche droma hai te trail? Man ci ciaiol man chanicasco merimos. . . . Cadea că aven parpale hai va traina!”. (Ezec. 18:23, 32) O Iehova silo ciaces bucurime cana le manușa risaren-pe catar pengo phiraimos nasul anda codoia că vo camel ca von te train anda sea o timpo. w24.08 9 ¶5, 6

O Iehova lel sama ca sea lesche manușa te aven zurale ando pachiamos, del-len îndrumarea hai feril-len oricana silen nevoia. O Iehova sicavel că ci cherel diferențea mașcar le manușa vi anda codoia că mechlea i Biblia ca sea le jene pa i phuv te daștin te citin-la. O Sfânto Lil le Devlesco sas scriime andi șib ebraico, aramaico hai grecisco. Codola cai jianen te citin i Biblia ande cadal șiba silen iech amalimos mai zuralo le Iehovasa sar le coaveren cai ci jianen? Nici. (Mat. 11:25) O Iehova ci acharel amen te avas lesche amala numai anda codoia că sam manușa sicade sau că prinjianas le șiba originalo la Bibliache. O Iehova del pesco goghiaverimos sea le manușenghe pa sea i phuv, indiferento chichi de sicade sile sau nici. Lesco Lil, i Biblia, sas-lo traducime ande mii șiba. Cadea, manușa pa sea i phuv daștin te prinjianen lesche sicaimata hai te arăsăn lesche amala. (2 Tim. 3:16, 17) w24.06 6, 7 ¶13-15

Cadea sar phendea vi o Isus de mai anglal, na pa but timpo, o sistemo iudaico avelas choslo. Le creștini evrei daștinas te folosin o timpo cai mai așilea caște bariaren pengo pachiamos hai te sichion te așen zurale hai te na mechen-pe. (Evr. 10:25; 12:1, 2) Na pa but timpo, vi amen va avela te nachas prin iech baro pharimos, but mai baro sar codo prin savo nachle le creștini evrei. (Mat. 24:21; Rev. 16:14, 16) Te dichas chichiva buchia cai o Iehova phendea-len le evreienghe hai cai daștin te ajutin vi amen. Ande pesco lil, o apostolo Pavel zuriardea le creștinen evrei te roden te hachiaren mai mișto o Lil le Devlesco. (Evr. 5:14–6:1) O Pavel sicadea lenghe anda le Scripturi ebraico că o creștinismo sas mai lașio sar o iudaismo. O Pavel hachiardea chichi de importanto sas ca le creștini te jianen mai but buchia hai te hachiaren mai mișto o ciacimos. Sostar? Cadea, von daștinas te dichen le sicaimata hohamne hai te na pachian-pe ande lende, caște na duriaren-pe catar o ciacimos. w24.09 8, 9 ¶2, 3; 10 ¶6