Twaba nitutiina Yehova omu muringo oguhikire, titurikwija kukora ekintu kyona ekirikumugwisa kubi. Twine ekihika ky’okumanya entaaniso eri aha gati y’ekihikire n’ekigwire, amazima n’ebishuba, kugira ngu tubaase kusiimwa Yehova. (Enf. 2:​3-6; Heb. 5:14) Twatiina abantu kukira Ruhanga, nitubaasa kuruga omu mazima. Teekateeka aha ky’okureeberaho ky’abakuru b’abantu 12 abaatatsire ensi ei Yehova yaabaire araganiise kuha Abaisraeli. Ikumi aharibo bakatiina munonga Abanyakanaani kukira oku baabaire nibakunda Yehova. Bakagambira Abaisraeli bagyenzi baabo bati: “Titurikubaasa kwinamukayo kurwana na bari bantu, ahabw’okuba nibatukiza amaani.” (Kub. 13:​27-31) Omu mireebere y’abantu, Abanyakanaani bakaba nibabakiza amaani. Kwonka okugira ngu Abaisraeli bakaba batarikubaasa kusingura abazigu baabo kikoreka ngu, tibarateekateekire ahari Yehova. w24.07 9 ¶5-6

Twine nshonga ki ezihikire ezirikutureetera kwesiga omuringo ogu Yehova arikucwa emanja zoona? Nk’Abrahamu, nitumanya gye ngu Yehova ahikiriire, niwe arikukirayo obwengye, kandi ‘n’omucwi w’emanja ow’ensi yoona’ omunyambabazi. Akatendeka Omwana we, kandi yaamuha obujunaanizibwa bw’okucwa emanja. (Yoh. 5:22) Bombi Ishe n’Omwana nibabaasa kumanya ekiri omu mutima gwa buri muntu. (Mat. 9:4) Omuri buri mbeera, nibakora “ekihikire.” Ka tumaririire kugira obwesigye ngu Yehova naamanya ekirikukirayo oburungi. Nitumanya ngu tituhikire kucwa emanja, kwonka we ahikire kuzicwa. (Isa. 55:​8, 9) N’ahabw’ekyo nitumwesiga hamwe n’Omugabe oine oburingaaniza n’embabazi nk’Ishe.—Isa. 11:​3, 4. w24.05 7 ¶18-19

Nitubaasa kwega obukuru bw’okuba ab’amazima twateekateeka aha ki Yesu yaagambire obu yaabanza kubugana Nasanaeli. Filipo ku yaareetsire munywani we Nasanaeli kubugana Yesu, hakabaho ekintu ky’omutaano. N’obu Yesu araabe yaabaire atakareebahoga Nasanaeli akagira ati: “Reeba Omwisraeli kashushu, otaine buryarya.” (Yoh. 1:47) Yesu akareeba amazima gatari ga butoosha omuri Nasanaeli. Okushushana naitwe, Nasanaeli akaba atahikiriire. Kwonka akaba ataine buryarya, kandi ari ow’amazima omuri byona. Ekyo kikashemeza Yesu, kandi akakimusiimira. Bingi ebirikwetengyesa kubaasa kushemeza Yehova ebiri omu Zaaburi 15, biine akakwate n’oku turikutwariza abandi. Zaaburi 15:3 nihagira ngu omugyenyi omu ihema rya Yehova ‘tarikubeiherera abandi n’orurimi rwe, n’obu kwakuba okukora kubi mugyenzi we nari okunyaga mutaahi we.’ Okukoresa kubi orurimi omu muringo nk’ogwo nikibaasa kureetera abandi akabi k’amaani.—Yak. 1:26. w24.06 10 ¶7, 9; 11 ¶10