Abanyanzigwa baitu bajanjaza ebisuba ebirukukwata h’ab’oruganda abaine obujunanizibwa omu kitebe kya Yahwe. (Zab. 31:13) Ab’oruganda abamu batairwe omu nkomo kandi baajunanwa nk’abacwi b’ebiragiro. Abakristaayo ab’omu kyasa eky’okubanza nabo bakahikwaho enyikara niyo emu omukwenda Paulo obuyahangiriirwe kandi yateekwa omu nkomo. Abamu omu kyasa eky’okubanza bakecwaho omukwenda Paulo obuyatairwe omu nkomo omu Roma. (2 Tim. 1:​8, 15; 2:​8, 9) Tekerezaaho omulingo Paulo yayehuliiremu. Akaba agumiisirize ebizibu bingi kandi yateeka n’obwomeezi bwe omu kabi habwabo. (Eng. 20:​18-21; 2 Kol. 1:8) Tutaliba nk’abantu abayecwireho Paulo! Nahabweki, tikisemeriire kutuhuniiriza kukimanya ngu Sitaani akira muno kutahirra ab’oruganda abaine obujunanizibwa. N’agonza ab’oruganda banu baleke kuba besigwa hali Yahwe kandi n’agonza n’okututiinisa. (1 Pet. 5:8) Gumizaamu n’osagika ab’oruganda abaine obujunanizibwa kandi obagumireho n’obwesigwa.​—2 Tim. 1:​16-18. w22.11 16-17 ¶8-11

Nikizooka ngu omusaija onu enkozi y’ebibi ow’akaba ahanikirwe ha rubaju rwa Yesu, akaba ali Muyudaaya. Abayudaaya baaramyaga Ruhanga omu, baitu abantu kuruga omu mahanga baaramyaga baruhanga baingi. (Kurug. 20:​2, 3; 1 Kol. 8:​5, 6) Kakuba omusaija ogu akaba n’aruga omu mahanga, ekikaguzo ky’ekyahandiikirwe kya kiro kinu kyakugambire ngu: ‘Na baruhanga torukubatiina?’ Ekindi, Yesu atatumwe hali abantu abamahanga, baitu akatumwa hali “entama ezabuzire ezomu nju ya Isareri.” (Mat. 15:24) Ruhanga akaba amanyisize Abaisaleri ngu naija kuhumbuura abaafiire. Omusaija enkozi y’ebibi ow’akaba ayegarukiremu n’asobora kuba akaba amanyire ekintu kinu, kandi nk’oku ebigambo bye birukwoleka, n’asobora kuba akaba amanyire ngu Yahwe yaakuhumbwire Yesu kulema omu Bukama bwa Ruhanga. Omusaija onu n’asobora kuba nauwe akaba nanihira ngu Ruhanga naija kumuhumbuura. Nk’Omuyudaaya, omusaija onu enkozi y’ebibi ayayegarukiremu n’asobora kuba akaba amanyire ekyahikire hali Adamu na Hawa. Nahabweki n’asobora kuba yakyetegeriize ngu Orugonjo Orurungi Yesu oruyabalizeeho omu Luka 23:43 rwakubaire musiri omurungi hanu omu nsi.—Kub. 2:15. w22.12 8-9 ¶2-3

Nitusobora kutebeza habw’obukonyezi bw’omwoyo gwa Ruhanga. Habwaki? Habwokuba Sitaani n’aturwanisa nukwo tuleke kutebeza. (Kus. 12:17) Abantu baingi batekereza ngu Sitaani w’amaani muno, ngu titusobora kumusingura. Baitu habw’omulimo gwaitu ogw’okutebeza, tuliyo nitumusingura! (Kus. 12:​9-11) Omu mulingo ki? Obutwejumbira omu kutebeza, kyoleka ngu titurukutiina okutiinisiriza kwa Sitaani. Buli murundi twejumbira omu kutebeza, tuba tusingwire Sitaani. Kinu kyoleka ngu omwoyo ogurukwera nigutuha amaani kandi na Yahwe n’atusagika. (Mat. 5:​10-12; 1 Pet. 4:14) Omwoyo gwa Ruhanga nigusobora kutuha amaani agaturukwetaaga kusingura ebizibu byona ebitutangatangana omu buheereza. (2 Kol. 4:​7-9) Kiki ekitusemeriire kukora kwikara nitutunga omwoyo gwa Ruhanga? Nitwetaaga kwikara nitusaba Yahwe omwoyo ogurukwera kandi tukigumye ngu naija kuhurra esaara zaitu. w22.11 5 ¶10-11