Umuntu atinya Yehova, aramukunda cane ku buryo atokwigera akora ikintu kimubabaza. Uwo muntu arihatira kumenya itandukaniro riri hagati y’iciza n’ikibi no hagati y’ukuri n’ikinyoma, kugira ngo yemerwe na Yehova. (Imig. 2:​3-6; Heb. 5:14) Bishitse tugatinya abantu kuruta uko dutinya Imana, vyoshobora gutuma dutangura kwemera ibintu bidahuye n’ukuri. Raba akarorero k’abakuru b’imiryango 12, bagiye gusuma urusaku mu gihugu Yehova yari yarasezeraniye Abisirayeli. Cumi muri bo baratinye cane Abanyakanani. Ubwo bwoba bwarakomeye burarengera urukundo bakunda Yehova. Babwiye Abisirayeli bagenzi babo bati: «Ntidushobora kuduga kurwanya abo bantu, kuko bakomeye kuturusha.» (Guh. 13:​27-31) Ego ni ko twisunze uko abantu babona ibintu, Abanyakanani bari bakomeye. Mugabo kuvuga ko Abisirayeli batoshoboye gutsinda abansi babo, kwobaye ari ukwirengagiza Yehova. w24.07 9 ing. 5-6

Hoba hari imvo yumvikana yotuma twizigira ko imanza zose Yehova acira abantu ziba zigororotse? Ego cane. Yehova ni «Umucamanza w’isi yose» atunganye, afise ubukerebutsi, kandi yuzuye imbabazi. Ico kintu na Aburahamu yaragitahura. Yehova yaramenyereje Umwana wiwe yongera aramushinga ibanga ryo gucira imanza abantu bose. (Yoh. 5:22) Yehova na Yezu barazi ibiri mu mutima w’umuntu wese. (Mat. 9:4) Urubanza rero bazocira umwumwe wese ruzoba ‘rugororotse.’ Nimuze twizigire duherejeko ingingo zose Yehova afata. Wewe ntameze nkatwe, kuko ashoboye guca imanza zigororotse. (Yes. 55:​8, 9) Ni co gituma ibijanye no guca imanza vyose tubimurekera we n’Umwana wiwe, wa Mwami yigana Se wiwe ata gahaze mu bijanye no kugaragaza ubutungane n’imbabazi.—Yes. 11:​3, 4. w24.05 7 ing. 18-19

Ivyabaye igihe Yezu yabonana na Natanayeli ari ryo rya mbere biratwereka akamaro ko kugira umutima utarimwo uburyarya. Igihe Filipo yazana umugenzi wiwe Natanayeli kubonana na Yezu, hari ikintu kidasanzwe cabaye. Naho ryari ryo rya mbere Yezu abonye Natanayeli, yavuze ati: «Raba Umwisirayeli nyawe, atagira uburyarya.» (Yoh. 1:47) Yezu yabona ko Natanayeli atagira uburyarya mu buryo budasanzwe. Natanayeli yari umuntu adatunganye cokimwe natwe. Ariko nta manyanga na makeyi yari afise. Ivyo Yezu yarabishimye maze aramukeza. Vyinshi mu vyo Yehova adusaba kugira adushime bivugwa muri Zaburi 15 vyerekeza ku kuntu dufata abandi. Zaburi 15:3 havuga ko umushitsi mw’ihema rya Yehova ‘adakoresha ururimi rwiwe mu kubeshera abandi, ata kibi na kimwe akorera mugenziwe kandi adasiga iceyi abagenzi biwe.’ Gukoresha nabi ururimi rwacu muri ubwo buryo birashobora kubabaza abandi.—Yak. 1:26. w24.06 10 ing. 7; 11 ing. 9-10