Ikintu nyamukuru gituma twamamaza inkuru nziza, ni urukundo dukunda Yehova Imana be n’izina ryiwe ryeranda. Ico gikorwa tubona ko ari uburyo bwo gushemeza Imana twikundira. Turemera n’umutima wacu wose yuko Yehova Imana abereye ko abasavyi biwe b’intahemuka bamuha ubuninahazwa, iteka be n’ububasha. Tumuha ubuninahazwa n’iteka mu kubwira abandi ibimenyamenya vyerekana ko ari we «[yaremye] vyose» be n’uko ari we dukesha ubuzima bwacu. Tumuha ububasha, ni ukuvuga ububasha bwacu, igihe dukoresha umwanya wacu, inguvu zacu be n’ivyo dutunze, mu kwamamaza inkuru nziza tubigiranye umwete bivanye n’uko ivyacu vyifashe. (Mat. 6:33; Luka 13:24; Kol. 3:23) Muri make, turahimbarwa no kuvuga ivyerekeye Imana twikundira. Vyongeye, urukundo ruratuvyurira umutima wo kubwira abandi izina ryiwe be n’ico risobanura. w24.05 17 ing. 11

Yehova araduha amahoro kandi agatuma tubumbwa n’ivyo dufise, muri kazoza na ho azoduha ubuzima budahera. Twokwizigira Yehova kuko twajijutse ko yipfuza kuduha impera kandi ko abishoboye. Ukwo kujijuka kuratuvyurira umutima wo kumukorera uko dushoboye kwose, nk’uko nyene n’abasavyi biwe ba kera babigize. Ivyo ni vyo Timoteyo yakoze mu kinjana ca mbere. (Heb. 6:​10-12) Timoteyo yarizigira cane Imana nzima. (1 Tim. 4:10) Ni co gituma yitanze cane agakorera Yehova n’abakirisu bagenziwe. None ni ibiki yakoze? Intumwa Pawulo yamuremesheje kurushiriza kuba umwigisha mwiza mu ndimiro no mw’ishengero. Yamubwiye kandi ngo abere akarorero keza abo basangiye ukwemera, baba abato canke abakuze. Vyongeye, yarashinzwe amabanga atoroshe, nko guha abandi impanuro zikomeye ariko ziranga urukundo. (1 Tim. 4:​11-16; 2 Tim. 4:​1-5) Timoteyo yari azi neza ko Yehova yomuhaye impera.—Rom. 2:​6, 7. w24.06 22-23 ing. 10-11

Akenshi Yehova yarakoresha abahanuzi biwe kugira ngo aburire abasavyi biwe yongere abakebure. Nk’akarorero, abicishije kuri Yeremiya, yavuze ati: «Ewe muhemu Isirayeli, nugaruke . . . Sinzokurabira hasi nshavuye kuko ndi intahemuka . . . Sinzogumana inzika ibihe vyose. Wewe gusa niwemere ikosa ryawe, kuko wagararije Yehova.» (Yer. 3:​12, 13) Biciye kuri Yoweli na ho, Yehova yavuze ati: «Nimungarukeko n’umutima wanyu wose.» (Yow. 2:​12, 13) Yabwiye Yesaya na we ngo avuge ati: «[Ni]mwihumanure. Nimunkure mu maso ibintu bibi mukora, mureke gukora ikibi.» (Yes. 1:​16-19) Abicishije kuri Ezekiyeli na ho, Yehova yavuze ati: «Mbega mugira ngo ndahimbarwa na gato n’uko umubisha apfa? Mugira sinshima ko yoheba ingeso ziwe akabandanya kubaho? Simpimbarwa na gato n’uko hagira umuntu apfa . . . Nimwigarure rero mubone kubaho.» (Ezk. 18:​23, 32) Yehova arahimbarwa igihe abonye abasavyi biwe bigaye, kuko yipfuza ko babandanya kubaho ibihe bidahera. w24.08 9 ing. 5-6