Kgodiseha hore Jehova o a o rata ebile o o nka o le bohlokwa le haeba batho ba bang ba kile ba o tshwara hampe. Haeba o utlwa o ‘kgathetse matla,’ o hopole hore Jehova o ile a bona hore pelo ya hao e ntle yaba o o hulela ho yena. (Joh. 6:44) O o rata haholo! Ka hoo, o ikemiseditse ho o thusa ka dinako tsohle. Re ka tseba hore na Jehova o ikutlwa jwang ka hore re ithute mohlaleng wa Jesu. Ha Jesu a ne a le lefatsheng o ne a tsotella batho ba neng ba kgellwa fatshe a bile a ba tshwara ka mosa. (Mat. 9:​9-12) Ka lekgetlo le leng mosadi e mong ya kulang haholo o ile a tla ho Jesu, a tshwara seaparo sa hae a tshepa hore o tla fola yaba Jesu o a mo tshedisa a ba a mo babatsa ka lebaka la tumelo ya hae. (Mar. 5:​25-34) Ha re bona Jesu ho tshwana le ha re bona Jehova hantle. (Joh. 14:9) Ka hoo, o ka kgodiseha hore Jehova o o nka o le wa bohlokwa ebile o bona dintho tse ntle tseo o di etsang, o a bona hore o dumela ho yena ebile o a mo rata. w24.10 7 ¶4-5

Davida o ile a tobana le maemo a thata bophelong a ileng a etsa hore a lle. O ne a hlouwe ke batho ba bangata. Metswalle ya hae e meng le ditho tse ding tsa lelapa ha di a ka tsa mo tshepahalla mme di ne di batla ho mo lematsa. (1 Sam. 19:​10, 11; 2 Sam. 15:​10-14, 30) Nakong eo e thata haholo, o ile a re: “Ke kgathetse ka lebaka la ho dula ke lla. Bosiu bohle ke kolobisa bethe ya ka ka dikeledi. Setulo sa ka se tletse metsi ka lebaka la meokgo ya ka.” (Pes. 6:6) Le hoja Davida a ne a kopana le mathata a mangata bophelong, o ne a kgodisehile hore Jehova o a mo rata. O ile a re: “Jehova o tla utlwa sello sa ka.” (Pes. 6:8) Mantswe a temana ena a bontsha ka ho hlaka hore Jehova o a re rata ebile o a tsotella hore na re ikutlwa jwang. Davida o ne a utlwa eka Jehova o ntse a bokella dikeledi tsa hae ka lekukeng a bile a di ngola ka bukeng. O ne a kgodisehile hore Jehova o a bona ebile o hopola matshwenyeho a hae. O ne a boetse a kgodisehile hore Ntate wa hae ya lerato ya lehodimong, o bona mathata a hae le hore o hlokomela tsela eo a ikutlwang ka yona. w24.12 22 ¶11-12

Re lokela ho sebetsa ka thata, eseng feela hore re be Bakreste ba hodileng empa le hore re dule re le bona. Taba ena e bolela hore re tlameha ho qoba ho itshepa ho tlola. (1 Bakor. 10:12) Re lokela hore ‘re nne re itlhahlobe’ e le ho etsa bonnete ba hore re tswela pele re ntse re hola. Moapostola Pauluse o ile a boela a totobatsa bohlokwa ba ho ba Bakreste ba hodileng lengolong la hae le yang ho Bakolose. Le hoja Bakolose e ne e se e le Bakreste ba hodileng, Pauluse o ile a ba lemosa hore ba itlhokomele hore ba se ke ba nahana jwalo ka batho ba lefatshe. (Bakol. 2:​6-10) Epafrase eo ho bonahalang hore o ne a tseba Bakreste ba Kolose hantle, o ile a ba rapella hangata hore ba ‘eme ba tiile’ kapa re ka re ba dule ba hodile. (Bakol. 4:12) Re ithutang? Pauluse le Epafrase ba ne ba utlwisisa hore ho dula re le Bakreste ba hodileng ho hloka boiteko ba rona le thuso ya Modimo. Ba ne ba batla hore Bakolose ba dule e le Bakreste ba hodileng ho sa tsotellehe mathata ao ba neng ba tobane le ona. w24.04 6 ¶16-17