Kodi tingagara no rugondo rekuti Djehovha paanotonga anhu, iyena nguwa dzese anoita cisananguro cakanaka here? Zvezvirokwazvo honde! Kuita hinga Abrahamu wakazwisisa zvakanaka kuti Djehovha akakwana, ano uzii uye ndi “Mutongi we nyika yese” ano usisi. Djehovha akarowedza Mwana wake uye akamupasa ubaba we kutonga anhu ese. (Juau 5:22) Djehovha na Djesu anoziya mazwiro e munhu umwe na umwe uye zvaanorangarira. (Mat. 9:4) Hino paanotonga munhu umwe na umwe, awona nguwa dzese anoita “zvakanaka”! Hino, gondai kuti Djehovha nguwa dzese acaita zvisananguro zvakanaka. Isusu hinga anhu atikwanisi kutonga amweni, asi Djehovha basi ndiye anokwanisa! (Isa. 55:8, 9) Ndiyo ndaa, no rugondo tinoda kusiya kuti kutonga kese kuizwe mu nyara dza Djehovha na Djesu, Mambo wekuti anoteedzera nge mushobo wakakwana unatsi uye usisi wa Baba ake Djehovha.—Isa. 11:3, 4. w24.05 paji. 7 mandi. 18-19

Isusu tingafundira zvakawanda ngezve kukosha ke kugara anhu e cokwadi nge kuona zvakaitika Djesu paakaziya Natanieri kekutanga. Firipi paakapangidza shamwari yake kuna Djesu, pakaitika zviro zvinokosha. Kunyazi Djesu ainga asikazii Natanieri, iyena akati: “Uwo ndiye Muisraeri we zvirokwazvo, asina ucengedzi.” (Juau 1:47) Djesu akaona kuti Natanieri wainga ari munhu wakatendeseka nge mushobo unoshamisa. Kuitawo hingana isusu, Natanieri wainga ari munhu asikazi kukwana. Asi wainga asiripi munhu mucengedzi, iyena wainga akatendeseka pa zviro zvese. Djesu, akashamisika nazvo uye akamusimba. Zviro zvakawanda zvatingaita kuti tipfadze Djehovha zviri pana Pisarema 15, zvinocokuita no mushobo watinobata anhu amweni. Pisarema 15:3 inobuya kuti murendo mu tenda ra Djehovha “aaseenzesi rurumi rake kuti areye amweni, aaitiri zvakashata mudoni wake uye aabararasi masoko akashata kana kupsverusa shamwari dzake.” Kana isusu tikareya, kana kunyepa ngezve munhu zvingakwanisa kurhwadzisa anhu amweni .—Tig. 1:26. w24.06 paji. 10 mandi. 7, 9; paji. 11 ndi. 10

Kana mukanyasa kugadzirira musati maenda mu basa re kuparidzira, zvicamuitirai nyore kucedza no anhu. Djesu akabetsera afundi ake kugadzirira asati aatuma kooparidzira. (Ruka 10:1-11) Awona akaseenzesa zvese zvaakafundiswa na Djesu, ndiyo ndaa awona akapfara maningi no zvese zvaakakwanisa kuita. Tingagadzirira kudini kuti tikwanise kuparidzira? Isusu tinodikana kutanga tarangarira zvaticareketa uye toreketa nge mushobo unonyasa kuzwika, asi no masoko edu kamare. Uye zvinobetserawo maningi kutanga tarangarira zviro zviiri kana zvitatu zvisikatenderhwi no e mu ndima medu uye torangarira mushobo waticadaira pa mugariro umwe na umwe. Pedzepo, kana tikaguma kuti tirekete no munhu, tingagara takasudzunuka, tonyemwerera, uye topangidza ushamwari. w24.04 paji. 16 mandi. 6-7