Jesu o ne a boleletse pele gore Jerusalema e ne e tla senngwa, mme seo se ne se tla direga mo nakong e e sa fediseng pelo. Bakeresete bao ba ne ba tshwanetse go dirisa nako e e setseng go ipaakanya ka go nonotsha tumelo ya bone le go dira dilo tse di neng di tla ba thusa go itshoka. (Baheb. 10:25; 12:1, 2) Go ise go ye kae, go tlile go nna le pitlagano e kgolo go gaisa e e neng ya nna teng ka nako ya Bakeresete ba Bahebera. (Math. 24:21; Tshen. 16:14, 16) Akanya ka kgakololo e Jehofa a ileng a e naya Bakeresete bao le gore e ka re tswela mosola jang. Mo lekwalong le moaposetoloi Paulo a ileng a le kwalela Bahebera, o ne a kgothaletsa bakaulengwe le bokgaitsadi gore ba bale Lefoko la Modimo le gore ba akanyetse kwa teng ka lone. (Baheb. 5:14–6:1) Paulo o ne a nopola Dikwalo Tsa Sehebera go tlhalosa gore tsela e Bakeresete ba neng ba obamela Jehofa ka yone, e gaisa e Bajuda ba neng ba mo obamela ka yone. O ile a kgothaletsa Bakeresete bao gore ba itse se Dikwalo di se rutang le go se tlhaloganya gore ba kgone go lemoga dithuto tsa maaka, mme ba se ka ba di amogela. w24.09 8-9 ¶2-3; 10 ¶6

Barutwa ba ga Jesu ba ne ba tlhoka go kgothadiwa. Goreng re rialo? Bangwe ba bone ba ne ba tlogetse magae a bone, ba malapa a bone le dikgwebo tsa bone gore ba nne balatedi ba ga Jesu. (Math. 19:27) Ba bangwe ba ne ba sa tshwarwe sentle ka gonne e le barutwa ba ga Jesu. (Joh. 9:22) Ba ne ba ikemiseditse go dira diphetogo tseno le go boga ka gonne ba ne ba dumela gore Jesu ke Mesia yo o solofeditsweng. (Math. 16:16) Mme gone, fa Jesu a ne a bolawa ba ile ba hutsafala thata e bile ba ile ba kgobega marapo ka gonne ba ne ba akanya gore se ba neng ba se solofetse se ka se direge. Jesu o ne a itse gore barutwa ba gagwe ba ne ba tla hutsafala fa a swa. Mme seo se ne se sa reye gore ba ne ba se na tumelo. Ka jalo, mo letsatsing le a ileng a tsosiwa ka lone, o ne a kgothatsa ditsala tseo tsa gagwe. Ka sekai, o ile a iponatsa kwa go Marea Magadalena fa a ne a lela kwa lebitleng la gagwe. (Joh. 20:11, 16) Gape o ile a iponatsa kwa barutweng ba le babedi ba ba neng ba ya kwa motsaneng o o bidiwang Emao. Mo godimo ga moo, o ile a iponatsa kwa go moaposetoloi Petere. w24.10 13 ¶5-6

Motsadi, thusa ngwana wa gago gore a kgone go tlhalosetsa ba bangwe gore Jehofa ke ene a bopileng dilo tsotlhe. Lo ka nna lwa tlotla ka motseletsele wa ditlhogo tse di mo jw.org wa setlhogo se se reng, “Basha ba Botsa Jaana​—Popo Kgotsa Thutotlhagelelo?” Go tswa foo, o bo o botsa ngwana wa gago gore ke dintlha dife tse a ka di dirisang go tlhalosetsa ba bangwe gore dilo tsotlhe di bopilwe ke Modimo. Mo kgothaletse gore a tlhalose dintlha ka tsela e e sa raraanang le e e utlwalang sentle fa a bua le batho ba ba ka mo reetsang. Ka sekai, fa ngwana yo a tsenang sekolo le ene a mo raya a re: “Ke dumela fela mo dilong tse ke di bonang, nka se dumele mo Modimong ka gonne ga ke mmone.” A ka mo araba a re: “A re re o tsamaya mo sekgweng o bo o bona sediba, a o ka akanya gore sediba seo se itlhagetse fela? Nnyaa. Nnete ke gore o a itse gore go na le mongwe yo o se epileng. Ka tsela e e tshwanang, dilo tse di bopilweng di bontsha gore go na le mongwe yo o botlhale yo o di bopileng.” w24.12 18 ¶16