Oku sumbila Yehova ci lomboloka okuti, tu u sole calua kuenda ka tu yongola oku linga cimue cu sumuisa. Omo liaco, tu yongola oku kũlĩha ciwa etepiso li kasi pokati keci ciwa leci cĩvi, ocili, luhembi, oco tu taviwe la Yehova. (Olosap. 2:​3-6; Va Hev. 5:14) Nda okuti usumba tu kuetele omunu wa velapo esumbilo tu kuetele Yehova, tu pondola oku yapuka vocili. Kũlĩhĩsa ulandu walume 12 va Isareli, vana va endele oku ka kũlĩhĩsa ofeka Yehova a likuminyile oku eca ku va Isareli. Ci soka ekũi pokati kavo, va ecelela okuti usumba va kuatela va Kanana u velapo okuti ocisola va kuatelele Yehova ci sule. Ovo va sapuila ku va Isareli vosi vati: “Ka tu tẽla oku liyaka lomanu vaco, momo ovo va pama calua okuti, etu tu sule.” (Ate. 13:​27-31) Ocili okuti, kovisimĩlo viomanu, va Kanana va pamele calua. Pole, oku popia okuti va Isareli nda ka va tẽlele oku yula ovanyãli vavo, ca kala ndoku pembula Yehova. w24.07 9 ¶5-6

Anga hẽ tua kolela okuti eci Yehova a sombisa omanu eye olonjanja viosi o nõla onjila ya sunguluka? Oco! Avirahama wa kuatele elomboloko liwa liokuti Yehova wa lipua, wa velapo kolondunge, ukuahenda haeye “Onganji yongongo yosi.” Yehova wa pindisa omõlaye kuenda wo kundika ocikele coku sombisa omanu vosi. (Yoa. 5:22) Yehova la Yesu va kũlĩha eci ci kasi vutima womunu lomunu. (Mat. 9:4) Omo liaco, eci ovo va sombisa omunu umue, va ka linga “ovina via sunguluka!” Tu nõlipo oku kolela Yehova kolonjila viosi eye a nõla. Tua kũlĩha okuti Yehova eye lika o kuete omoko yoku sombisa, pole, etu sio! (Isa. 55:​8, 9) Omo liaco, tu eceleli okuti Yehova lomõlaye va linga esombiso. Handi vali, tua kũlĩha okuti Soma yetu Yesu o ka setukula lonjila ya lipua esunga kuenda ohenda ya Isiaye.—Isa. 11:​3, 4. w24.05 7 ¶18-19

Tu pondola oku lilongisa calua kesilivilo lioku kala omanu vakuacili, poku limbuka ulandu wa pita eci Yesu a kũlĩha Nataneli onjanja yatete. Eci Filipu a lekisa ekamba liaye Nataneli ku Yesu, kua pita ocina cimue ci komõhisa. Ndaño okuti handi Yesu ka kũlĩhĩle Nataneli, eye wa popia hati: “Tala, u Isareli wocili okuti kokuaye ka kuli elimbi.” (Yoa. 1:47) Yesu wa wa limbuka okuti Nataneli wa kala omunu umue ukuacili calua. Nataneli wa kalavo omunu umue ka lipuile ndetu. Pole, ka kale ukuambambe. Eye wa kala ukuacili kovina viosi. Yesu wa komõha calua omo liocituwa caco kuenje wa pandiya Nataneli. Onepa yalua yolonumbi via Yehova tu sanga Kosamo 15, vi situlula onjila ndomo tu tata vakuetu. Osamo 15:3 yi popia okuti, omunu wosi o kala ukombe vombalaka ya Yehova “ka lundila lelimi liaye, ka lingi eci cĩvi komunu a lisungue laye, kuenda ka kutisa osõi akamba vaye.” Oku endisa olombonde, ale oku lundila, ci vĩhisa ekalo lia vakuetu.—Tia. 1:26. w24.06 10 ¶7, 9; 11 ¶10