E mafai pefea o ˋteke atu tatou ki fakaosoosoga mo te agasala? Mafaufau ki mea e mafai o tauloto ne tatou mai te tamataene telā ne fakamatala mai i te Faataoto mataupu 7. Ne aofia a ia i faifaiga fakatauavaga sē ˋtau mo se fafine talitāgata. E fai mai te fuaiupu 22 me “i konā eiloa” fanatu ei te tamataene tenei i tua o tou fafine. Kae pelā mo te mea e fakaasi mai i fuaiupu mai mua, ne fai ne ia a nisi fakaikuga vaˋlea mai mua o te mea tenei, telā ne iku atu ei fakamuli ki te faiga o se agasala. Ne a mea ne fai ne ia muamua telā ne iku atu ei ki te faiga o se agasala matagā? Muamua la, i te afiafi, ne “fanatu a ia i te auala e pili ki te ˋkōna o te [fafine talitāgata].” Oti, sasale atu ei a ia i te auala ki te fale o tou fafine. (Faata. 7:​8, 9) I te laveaga ne ia te fafine, ne seki fulitua a ia. I lō te fai penā, ne talia ne ia te sogi a tou fafine kae fakalogologo i te taimi ne faipati tou fafine ki taulaga ˋkai fakatasi kolā ne ofo ne ia, kāti me e manako tou fafine ke mafaufau a tou tagata i a ia e sē se tino masei. (Faata. 7:​13, 14, 21) Moi se fai ne te tamataene a mea vaˋlea konei, penei e mafai o kalo keaˋtea a ia mai te fakaosoosoga ke fai se mea telā e iku atu ki te faiga o se agasala. w24.07 16 ¶8-9; 19 ¶19

E se talia ne Ieova a tino kolā e fai ne latou a agasala matagā ke tumau i loto i tena fakapotopotoga. E se talia ne ia te kilokiloga ke talia se tino fai agasala sē salamō ke tumau i te ˋkau fakatasi mo ana tino tapuaki fakamaoni e pelā me se fakaasiga o tena “alofa fakamagalo.” A Ieova e alofa fakamagalo, kae e se talia ne ia so se vaegā amioga; kae e se ˋfuli foki ne ia ana tulaga e uiga ki te mea tonu mo te mea ˋse. (Iuta 4) E tonu, a te fai penā e sē se faifaiga alofa me ka fai fua i ei ke tu te fakapotopotoga i se tulaga fakamataku. (Faata. 13:20; 1 Koli. 15:33) Ne tauloto foki tatou, me e se manako a Ieova ke fakaseai atu se tino. E manako a ia ke fakasao so se tino. E alofa fakamagalo a ia ki tino kolā e ˋfuli olotou loto kae maˋnako ke fakaˋlei te lotou fesokotakiga mo ia. (Eseki. 33:11; 2 Pe. 3:9) Tela la, i te taimi ne salamō te tagata Kolinito kae ˋfuli ana amioga, ne fakaaoga ne Ieova a te apositolo ko Paulo ke fakamatala atu ki te fakapotopotoga me e ˋtau o fakamagalo kae toe talia mai ne latou te tagata tenā. w24.08 17 ¶7; 18-19 ¶14-15

I te tala fakatusa ki mamoe mo kouti, ne fai mai a Iesu me ka fakamasino ne ia a tino e ˋtusa mo te ˋlago atu o latou ki ana taina fakaekegina. (Mata. 25:​31-46) I te taimi o te “fakalavelave lasi,” ka fai ne ia a te fakamasinoga tenei mai mua malie o Amaketo. (Mata. 24:21) E pelā loa mo te tausi mamoe telā e ˋvae keaˋtea ne ia a mamoe mai kouti, ka ˋvae keaˋtea ne Iesu a latou kolā e ˋlago fakamaoni atu ki ana soko fakaekegina mai i a latou kolā e se fai penā. E fakaasi mai i valoaga i te Tusi Tapu me e pelā me ko te Famasino ne ˋtofi aka ne Ieova, ka fakamasino ne Iesu a tino mo te fai mea tonu. (Isa. 11:​3, 4) Ka onoono fakaˋlei a ia ki faifaiga, uiga, mo pati e fai ne tino—e aofia i ei olotou faifaiga ki ana taina fakaekegina. (Mata. 12:​36, 37) Ka iloa ne Iesu a latou kolā ne ˋlago atu ki ana taina fakaekegina mo te lotou galuega. Tasi o auala e ˋlago atu ei a nisi mamoe ki taina o Keliso, ko te fesoasoani atu ki a latou i te faiga o te galuega talai. w24.09 20-21 ¶3-4