¿Jamüsü wayaawatakaʼa saaʼu anain tü naaʼinrakat Jehová kasalajanapa saainjala wayuu nutuma? Shia süka lotuin nukuwaʼipa, nümüliajülin otta kekiin maʼin nia. Naapüin Jehová shikii nümüin chi Nüchonkai süsalainjatüin saainjala wayuu nutuma otta nikirajüin nia süpüla anainjatüin shia nutuma (Juan 5:22). Nütüjaa aaʼu Jehová otta Jesús tü suluʼukat saaʼin wayuu (Mat. 9:4). Watüjaakalaka saaʼu loteerüin tü kasa naaʼinrakat. Weʼitaa waaʼin nünain Jehová waneepia otta nnojo wainmajüin waaʼin sünain tü naaʼinrakat. Süka kekiin nia woulia anasü tü kasa naaʼinrakat süsalapa saainjala wayuu nutuma (Is. 55:8, 9). Nia Jesús chi Aluwataakai waaʼu, lotusü nukuwaʼipa otta amüliajüi nia maʼaka naaʼin chi Nüshikai. Müsüjeseʼe anain wamüin niain Jehová otta Jesús kasalajanain atuma saainjala wayuu (Is. 11:3, 4). w24.05 7 püt. 18, 19

Choʼujaasü waküjainjanain waneepia tü shiimainkat. Watüjaa aaʼulu tia sünainjee tü nümakat Jesús nüchiki Natanael, chi nüntirakai Felipe nümaʼanamüin. Müshi Jesús nüchiki Natanael niʼraiwaʼaya nia: «Iseeichi wanee israelita loto akuwaʼipachi» (Juan 1:47). Niʼrapa Natanael niyaawata aaʼulu alanaʼaleeinña suluʼu anain nukuwaʼipa. Mayaainjeʼe nüleʼeruʼuin süchiki kaainjalaa Natanael, nnojotsü piamain nukuwaʼipa otta lotusü nukuwaʼipa sünain kasa süpüshuaʼa. Kojutusü nümüin Jesús süka niʼrüin müin nukuwaʼipa Natanael otta anasü nünüiki nüchiki. Wanee kasa ashajünaka suluʼu Salmo 15 süpüla anain wakuwaʼipa noʼuluʼu Jehová shia tü wakuwaʼipainjatkat namaa na waneinnua. Na wayuu nuunejaakana Jehová nipialuʼumüin nnojoishii aküjain alawaa süchiki wayuu, nnojoishii aainjain kasa mojusü sümüin wayuu otta nnojoishii aküjain süchiki wanee kasa mojuteenaka atuma naʼaleewainyuu (Sal. 15:3). Nnojorüle jülüjain waaʼin tü wamakat eesüjaʼa mojeerüle nakuwaʼipa na waneinnua watuma (Sant. 1:26). w24.06 10 püt. 7, 9; 11 püt. 10

Yapajüle pia süpüla aküjaa pütchi, aneerü paaʼin sünain yootoo namaa na wayuukana. Nüküjain Jesús namüin na nikirajüinkana tü naaʼinrajatkat sünain aküjaa pütchi (Luc. 10:1-11). Talatüsü naaʼin na nikirajüinkana Jesús sutuma neʼrüin kasa anasü sünainjee naaʼinrüin tü nümakat namüin. ¿Kasa waaʼinrajatka süpüla yapain watuma tü wanüikinjatkat sünain aküjaa pütchi? Jülüjainjatü waaʼin tü wanüikinjatkat waküjapa pütchi namüin na wayuukana, müinjana yootokoi waaʼin waaʼinrapa tia. Jülüja waaʼin jameerüin nanüiki wamüin na wayuu waküjakana amüin pütchi otta jameerüin wanüiki namüin. Waaʼinrüle tia, aneerü waaʼin sünain yootoo namaa otta kamaneejeena waya namüin. w24.04 16 püt. 6, 7