Siasino ti Arkanghel a ni Miguel?

Ti nagan a Miguel wenno “San Miguel” kas pangawag ti dadduma a relihion ket ti nagan ni Jesus sakbay ken kalpasan nga immay ditoy daga.a Nakisupiat idi ni Miguel ken Satanas kalpasan a natay ni Moises. Tinulonganna met idi ti anghel a nangipakaammo ken propeta Daniel iti mensahe ti Dios. (Daniel 10:13, 21; Judas 9) Nagbiag ni Miguel maitunos iti kaipapanan ti naganna​—“Siasino ti Kas iti Dios?”​—babaen ti panangidepensana iti turay ti Dios ken pannakilabanna kadagiti kabusor ti Dios.​—Daniel 12:1; Apocalipsis 12:7.

Kitaentayo no apay a maikuna a ni Jesus ket isu met laeng ti arkanghel a ni Miguel.

• Ni Miguel ket isu ti “arkanghel.” (Judas 9) Iti Biblia, dua laeng a bersikulo ti pagparangan ti titulo nga “arkanghel,” a kaipapananna “pangulo dagiti anghel.” Kadagitoy a bersikulo, maymaysa nga anghel ti tuktukoyen dayta a titulo. Iti maysa a bersikulo, nadakamat a ti napagungar a ni Apo Jesus ket “bumabanto manipud langit buyogen ti agbilbilin nga awag, buyogen ti timek ti maysa nga arkanghel.” (1 Tesalonica 4:​16) Addaan ni Jesus iti “timek ti maysa nga arkanghel” gapu ta isu ti arkanghel a ni Miguel.

• Ni Miguel ti komander dagiti anghel. “Ni Miguel ken dagiti anghelna nakibakalda [wenno, nakigubatda] iti dragon” a ni Satanas. (Apocalipsis 12:7) Dakkel ti autoridad ni Miguel kadagiti espiritu a parsua, ta naawagan kas “maysa kadagiti kangrunaan a prinsipe,” ken “ti dakkel a prinsipe.” (Daniel 10:13, 21; 12:1) Ipakita dagitoy a titulo a ni Miguel “ti kangatuan a komander dagiti anghel,” kas imbaga ni David E. Aune, maysa a mangad-adal iti Baro a Tulag.

  Ibaga ti Biblia nga adda laeng maymaysa a sabali a nagan daydiay addaan iti autoridad kadagiti anghel. Nadakamat iti dayta ti “pannakaipanayag ni Apo Jesus manipud langit a kadua dagiti mannakabalin nga anghelna iti dumardarang nga apuy, bayat nga iyegna ti pammales.” (2 Tesalonica 1:7, 8; Mateo 16:27) Ni Jesus ket “napan sadi langit; ket dagiti anghel ken dagiti autoridad ken dagiti pannakabalin naipasakupda kenkuana.” (1 Pedro 3:21, 22) Imposible a pagbalinen ti Dios da Jesus ken Miguel kas agkalaban a komander dagiti nasantuan nga anghel. Imbes ketdi, ad-adda a nakappapati a maymaysa laeng a persona ti tuktukoyen dagiti nagan a Jesus ken Miguel.

• “Tumakderto” ni Miguel bayat ti kakaruan a “tiempo ti rigat.” (Daniel 12:1) Iti libro a Daniel, masansan a nausar ti sao a “tumakderto” a tumukoy iti ari a tumakder wenno makilaban para iti nagpateg a mision. (Daniel 11:​2-4, 21) Agtignayto ni Jesu-Kristo, a naawagan “Ti Sao ti Dios,” kas “Ari ti ar-ari” tapno papatayenna ti amin a kabusor ti Dios ken protektaranna dagiti adipen ti Dios. (Apocalipsis 19:11-​16) Aramidenna dayta bayat ti “dakkel a rigat a dayta ket saan pay a napasamak nanipud idi pangrugian ti lubong.”—Mateo 24:21, 42.