Yave walomba diambu diampasi kwa Abarayama. Wanlomba vo kavana mwan’andi Isaki se kimenga. Dialudi vo diampasi kikilu diakala kuna kwa Abarayama muna vanga diambu diadi. Kana una vo i wau, Abarayama walemvokela Yave. Kansi, vava ntangwa yafwana muna vonda mwan’andi, Nzambi wankakidila. Yave wazaya wo vo Abarayama mpasi zayingi kadi mona kele vo ovondele mwan’andi. E nona kiaki diambu diamfunu kilonganga kwa awonso bena ye lukwikilu. Yave wakubama kakala muna vana Mwan’andi anzolwa se kimenga. Kieleka, Yave otoma zolanga wantu. (Tuku 22:1-18) Vava Yave kavana nsiku kwa Aneyisaele, wabavovesa vo bavananga yimenga ya bulu muna loloka masumu mau. (Lev. 4:27-29; 17:11) E yimenga yayina yakala se kini kia kimenga kisundidi, i sia vo, kimenga kina kikatula emvimba e sumu dia wantu. Nzambi wavumunuina angunza mu soneka oma ma mbongo ina kasia o nsilu. Angunza basoneka vo o Mwan’a Nzambi, omweswa e mpasi yo vondwa se kimenga muna vuluza wantu muna sumu ye lufwa, kumosi yo ngeye.—Yes. 53:1-12. w24.08 4 ¶7-8

Vava otanganga e Bibila, yindula una osadila mana otanganga. Avo otangidi yaka tini muna Diambu dia Nzambi, ukiyuvula: ‘Aweyi ndenda sadila mambu mama tuka owau yovo kuna sentu?’ Muna bonga e nona, yindula vo otangidi 1 Tesalonika 5:17, 18. Vava omana tanga e tini yayi yau yole, olenda ningama mu yindula una wina e sambu yaku ye kana nkumbu nkwa osambanga. Olenda yindula mpe mambu mana ofwete vutulwilanga matondo. Nanga olenda mona vo vena ye mambu tatu masikididi ofwete vutulwila matondo kwa Yave. Kana nkutu miniti miakete osadidi muna badika, dikusadisa mu bakula yo lemvokela Diambu dia Nzambi. Avo konso lumbu osadidi mana otanganga muna Bibila, kalukatikisu ko vo okituka se selo kiambote kia Yave. w24.09 4-5 ¶9-10

Yave watusema mu mpila isundidi o mfunu. Watusema ye tima dia monanga e kiese kitukanga muna vanga mawete kwa akaka ke mu tambula ko. Kiese kikilu tukalanga kiau vava tusadisanga mpangi zeto. Diambote mpe dikalanga vava mpangi zeto bevutulanga matondo mu kuma kia mawete mana tubavangidi. Kana nkutu vo vena yo muntu ona wina vo ke zitisanga lusadisu lweto ko, tufwete kalanga ye kiese, kadi tuzeye wo vo diambu diambote tuvangidi. “Yave olenda kuvana zina zisundidi ezazi.” (2 Tus. 25:9) Muna vova e ludi, kana nkutu vo tuna ye fu kia kayila akaka kuna mvevo, ke tulendi vioka Yave ko muna diambu diadi. O tambula nsendo kwa Yave i diambu diluta twasanga e kiese. Muna diadi, tuzolele kala ye kani dia tanginina Se dieto dia zulu. w24.09 31 ¶20-21