Lemmwiki Siohwa kin wehwehki me kitail en uhdahn poakohng ih me kahrehda kitail sohte pahn wia mehkot me pahn kansensuwedihala. Kitail kin ngoangki sukuhlki wekpeseng en dahme pwung oh sapwung, dahme mehlel oh likamw, pwe kitail en kak ale sapwellimen Siohwa kupwuramwahu. (Lep. Pad. 2:​3-6; Ipru 5:14) Ma atail masak aramas kin laudsang atail lemmwiki Koht, kitail kakete salongasang me mehlelo. Medewehla mehn kahlemeng en kaun 12 ko me kohlahng dawih sahpwo me Siohwa ketin inoukihda en ketikihong mehn Israel kan. Lipoahrok ehk sang nanpwungarail uhdahn masak mehn Kenan kan laudsang arail poakohng Siohwa. Re ndaiong iengarail mehn Israel ko: “Kitail sohte kak mahweniong tohnsahpw pwukat, pwe re inenen kehlail sang kitail.” (Nemp. 13:​27-31) Ong aramas, mehn Kenan ko uhdahn kehlail. Met me mehlel. Ahpw emen me nda me mehn Israel ko sohte kak powehdi arail imwintihti kan sohte kin medewe duwen Siohwa. w24.07 9 ¶5-6

Ia duwe, kitail kak kamehlele me ni Siohwa eh kin ketin kadeik aramas akan, e kin ketin ahnsou koaros wia pilipil mwahu? Ei! Nin duwen me Eipraam wehwehki, Siohwa iei “Sounkopwung en sampah pwon” me unsek, erpit, oh kadek kalahngan. E ketin kaiahnehda sapwellime Ohlo oh ketikihong pwukoa en kadeik aramas koaros. (Sohn 5:22) Ira koaros ketin mwahngih dahme mi nan mohngiong en aramas koaros nin sampah. (Mad. 9:4) Eri ni ara kin ketin kadeik emenemen aramas, ira pahn ahnsou koaros ketin ‘pwung ni sapwellimara wiewia kan’! Kitail en koasoanehdi teng en likih Siohwa oh sapwellime koasoandi kan koaros. Kitail kin pohnese me kitail sohte warohng kadeik meteikan—ahpw ih me ketin warohng! (Ais. 55:​8, 9) Ihme kahrehda kitail kin likih Siohwa oh sapwellime Ohlo en wia kadeik koaros. Kitail pil ese me atail Nanmwarkio, Sises, pahn ni unsek alasang pwung pahrek oh kadek kalahngan me Semeo kin ketin kasalehda.—Ais. 11:​3, 4. w24.05 7 ¶18-19

E uhdahn kesempwal en wia emen me kin “koasoi mehlel nan eh mohngiong.” Kitail kak kilang met sang dahme wiawi ni Pilip eh lukehdo kompoakepaho Nadaniel en tuhwong Sises. Mendahki ehdin Sises eh ketin tuhwong Nadaniel, e mahsanih: “Kilang, uhdahn mehn Israel men ih me sohte kin widing.” (Sohn 1:47) Nadaniel me kin keieu mehlel. Nadaniel sohte unsek duwehte kitail. Ahpw e sohte kin mwalaun oh kin mehlel ni soahng koaros. Sises ketin kupwurperenki met oh kapingahki Nadaniel. Pali laud en dahme kitail anahne wia pwehn kaperenda kupwuren Siohwa me kileldi nan Melkahka irelaud 15 kin pidada mwomwen atail wiewia ong meteikan. Melkahka 15:3 mahsanih me emen me lukodohng nan sapwellimen Siohwa impwal “sohte kin karaunmwahlih meteikan, e sohte kin wia mehkot sapwung ong kompoakepah kan, oh sohte kin ndindaseli mehn mpe kan.” Ma kitail kin karaunlikamwih meteikan, e uhdahn pahn kamedekeirailla.—Sei. 1:26. w24.06 10 ¶7, 9; 11 ¶10