¿Bin swentail te jkuxlejaltik?

Yanyantik-a te bitʼil ya spasbey sbaik te jojkʼoyel ini. Ayniwan machʼa jich ya xjuʼ sjojkʼoybey sba: «¿Bin yuʼun te kuxulotike?» o «¿Aybal skʼoplal te jkuxlejaltike?». Te Biblia ya yal bin swentail te jkuxlejaltike, jaʼ te ya kamigointik te Diose. Yuʼun ya kichʼbeytik swentail ini, kiltik te bin ya yal te Biblia.

• Te Dios jaʼ te Jpaswanej kuʼuntik. Te Biblia ya yal te jaʼ la spasotik te Diose (Salmo 100:3; Apocalipsis 4:11).

• Te Dios ma tojoluk la spas spisil te bintik ay, tey ochem skʼoplal-euk-a te ants winiketike (Isaías 45:18).

• Te Dios la spasotik yuʼun ya jletik te koltayel yuʼun, tey ochem skʼoplal-a te ya jtabeytik swentail te jkuxlejaltike (Mateo 5:3). Te Dios jaʼ ya skʼan te ya jtabeytik swentail te jkuxlejaltike (Salmo 145:16).

• Ya jletik te koltayel yuʼun te Dios kʼalal ya jpastik tulan ta snaʼbeyel sba sok te ya kamigointike, jaʼ ini maba wokol ta pasel. Jich ya yal te Biblia: «Nohpojanic ta stojol Dios, hich ya xnohpoj ta atojolic» (Santiago 4:8; 2:23).

• Swenta ya kamigointik te Diose ya skʼan te jichuk ya xkuxinotik te bitʼil la skʼan ta sjajchibale. Te Biblia ya yal bin-a te skʼanojel yoʼtane: «Ichʼa ta mucʼ te Diose soc chʼuhumbeya te mandariletic yuʼune, como hich [...] ay ta scuenta spasel te ants-winiquetique» (Eclesiastés 12:13).

• Ta pajel chaʼbej, kʼalal te Dios ya slajin spisil te wokoliletik sok ya yakʼbey skuxlejal sbajtelkʼinal te yamigotak te jun yoʼtan la yakʼ sbaik ta stojol, jich ya xkʼot ta pasel te skʼanojel yoʼtan ta stojol te ants winiketike (Salmo 37:10, 11).