¿Machʼa-a te Cuerpo Gobernante yuʼun te stestigotak Jehová?

Te Cuerpo Gobernante jaʼ tut jtsojb jchʼuunjeletik yuʼun Cristo te tulan schʼuunel yoʼtanike sok jaʼ ya yilik te organisasion yuʼun te stestigotak Jehová ta swolol Balumilal. Ay chaʼchajp te yaʼtele:

• Ya yilik te bitʼil ya yichʼ chajpanel te bintik ya yichʼ lokʼesel ta junetik sok yantik te bintik lokʼem ta Biblia sok te bintik ya yichʼ ilel ta tsoblejetik soknix te pʼijubtesel te ya yichʼik te stestigotak Jehovae (Lucas 12:42).

• Ya yilik te aʼtelil ya spasik te stestigotak Jehová. Jaʼ-abi, jaʼ te ya yil te bitʼil yak ta cholel te skʼop Diose, te bitʼil ya yichʼ tuuntesel te bintik ya yichʼ akʼel ta majtʼanile soknix te yakʼtiklanbeyel yichʼ yaʼtelik hermanoetik te ya yakʼik ta ilel lekil talelil ta swenta te bintik ya yichʼ akʼbeyel spasike.

Te Cuerpo Gobernante jaʼ ya skʼayinbeyik stalel te «jpuc-cʼopetic soc te ancianohetic» ta Jerusalén ta sbabial siglo. Jaʼik te machʼatik la staik ta nopel te bin bayal skʼoplal ta swenta spisil te kongregasion yuʼun te jchʼuunjeletike (Hechos 15:2). Te machʼatik ochemik ta Cuerpo Gobernante ma jaʼuk ya xmantalajik ta organisasion kuʼunkotik, jichnix bitʼil ma jichuk la spasik te winiketik ta namey kʼinal te jun yoʼtanik ta stojol Diose. Te winiketik ini spisil-ora ya sleik koltayel ta Biblia ta swenta te bin ya spasike sok snaʼojik ta lek te jaʼ Jehová yakʼoj ta Jolol yuʼun kongregasion te Jesucristoe (1 Corintios 11:3; Efesios 5:23).

Ta enero yuʼun 2015, te machʼatik ochemik ta Cuerpo Gobernante jaʼik te hermano Kenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane sok te Jeffrey Winder. Ta spisilik ayik ta aʼtel ta banti ya yichʼ ilel te aʼtelil kuʼunkotik ta Brooklyn (Nueva York).

Te Cuerpo Gobernante schajpanoj sbaik ta wakchajp komite te ya yilik yanyantik te aʼtelil kuʼunkotike. Ay jtul o chaʼtul yakik ta aʼtel ta jujun komite ini.

• Komite yuʼun Jchajpanwanejetik: Jaʼ ya yil te machʼatik ya schajpanik kʼopetik ta swenta legal, sok te kʼalal ay ya xkʼax wokolil te bayal bintik ya sjin jilele, wokolil te oranax ya staik te stestigotak Jehová sok te kʼalal ay ya staik utsʼinel ta swenta te spasbeyel yaʼtel te Diose.

• Komite yuʼun J-aʼteletik: Jaʼ ya yil spisil te jayeb machʼatik ya x-aʼtejik ta familia Betel o te jayeb machʼatik ya x-aʼtejik ta sucursal yuʼun te stestigotak Jehová.

• Komite yuʼun Junetik: Jaʼ ya yil te aʼtelil swenta spasel imprimir junetik, stikunel junetik te lokʼem ta Biblia, spasel sNail Tsoblejetik, ofisinaetik yuʼun skʼasesel yan kʼopiletik sok sucursaletik.

• Komite yuʼun Scholel skʼop Dios: Jaʼ ya yil te aʼtelil yuʼun scholel te «lec yachʼil cʼop yuʼun te cuentahinel yuʼun Dios» (Mateo 24:14).

• Komite yuʼun Pʼijubteswanej: Jaʼ ya schajpan te pʼijubtesel ya yichʼ akʼel ta tsoblejetik, te chaʼoxchajp pʼijubtesel soknix programaetik yuʼun audio sok video.

• Komite yuʼun Tsʼibajel: Jaʼ ya schajpan te bintik ya yichʼ lokʼesel ta junetik te lokʼem ta Biblia, sok ta pajina kuʼunkotik ta Internet sok ya yil te aʼtelil te ya yichʼ pasel ta swenta skʼasesel yan kʼopiletik.

Ma jaʼuknax ya yilik te aʼtelil ini, melel te machʼatik ochemik ta Cuerpo Gobernante ya stsob sbaik ta jujun semana ta yilel te bintikxan aʼtelil ya skʼan pasel ta organisasion. Te kʼalal ya stsob sbaike ya yilik ta lek te bin ya yal te Biblia sok ya skʼanik tojobtesel yuʼun te chʼul espiritu yuʼun te Diose. Spisil-ora junax ya staik ta nopel te bintik ya spasike (Hechos 15:25).

Te jujun komite yuʼun te Cuerpo Gobernante ya yichʼik koltayel yuʼun j-abatetik yuʼun Dios te jun yoʼtanik, te chapalik ta lek sok te ya snaik yilel ta lek te aʼtelil te banti komite ayike (1 Corintios 4:2). Te jkoltaywanejetik ini ya xkʼotik tey-euk-a te kʼalal ya stsob sbaik te komite ini. Manchukme ma jaʼuk ya yalik te bin ya skʼan pasele, jaʼukmeto ya yalik te bin ya snopik sok ya yakʼik ta naʼel te bintik ya xtuun ta swenta te bintik ya snopik spasele, sok ya schʼuunik spasel te bin la sta ta nopel te komite sok ya yilik te bintik lek ya xkʼot ta lokʼel ta swenta te bin la snopik spasele. Te Cuerpo Gobernante yame xjuʼ ya stikun ta yulaʼtayel te Testigoetik te ayik ta yantik nasion o ta yakʼel discurso ta programaetik te mukʼik skʼoplal, jich bitʼil tsoblejetik yuʼun jujun jaʼbil o ta graduación yuʼun te Pʼijubtesel ta Galaad.