¿Chuquiyes jiñi i Yumʌntel Dios?

«Jiñi Dios am bʌ ti panchan mi caj i waʼchocon yambʌ yumʌl, mach bʌ yujilic jilel» (Daniel 2:44, I tʼan Dios).

«Jiñi i yumʌntel pañimil tsaʼix sujti tiʼ Yumʌntel lac Dios yicʼot i chaʼan i Cristo, Dios mi caj i chaʼlen yumʌntel tiʼ pejtelel ora» (Apocalipsis 11:15, Traducción del Nuevo Mundo Mateo-Apocalipsis).

•  Ili toj bʌ yumʌntel miʼ mejlel i coltañonla ti jujuntiquil (Isaías 48:17, 18).

•  Mach jalix yom chaʼan tijicña mi caj lac chumtʌl ti jiñi tsijiʼ bʌ pañimil yicʼot maʼañix miʼ cajel cʼamʌjel tac (Apocalipsis 21:3, 4).

Añʌch, laʼ laj qʼuel chaʼchajp:

•  Jesús tsiʼ pʌsʌ muʼ bʌ caj i mel jiñi i Yumʌntel Dios. Tsiʼ cʌntesa jiñi xcʌntʼañob chaʼan miʼ cʼajtiñob ti oración chaʼan miʼ tilel i Yumʌntel Dios yicʼot chaʼan miʼ mel chuqui yom wʌʼ ti Pañimil (Mateo 6:​9, 10). Cheʼ jaʼel, tsiʼ pʌsʌ bajcheʼ mi caj i tsʼʌctiyel jiñi.

  Cheʼ bʌ Jesús tsajñi wʌʼ ti Pañimil, tsiʼ yʌqʼue i waj jiñi wiʼñayoʼ bʌ, tiʼ tsʼʌcʌ jiñi cʼamoʼ bʌ yicʼot tsiʼ chaʼ cuxtesa jiñi chʌmeñoʼ bʌ (Mateo 15:​29-​38; Juan 11:​38-​44). Come Jesús jiñʌch muʼ bʌ i cajel ti eʼtel bajcheʼ Rey yaʼ tiʼ Yumʌntel Dios, tsiʼ wʌn pʌsʌ muʼ bʌ caj i mel tiʼ tojlel quixtañujob jiñi Yumʌntel (Apocalipsis 11:​15).

•  Jiñi woli bʌ ti ujtel tiʼ petol pañimil miʼ pʌs chaʼan lʌcʼʌlix jiñi i Yumʌntel Dios. Jesús tsiʼ wʌn alʌ chaʼan cheʼ bʌ jiñi i Yumʌntel Dios muʼto caj i chʼʌm tilel ñʌchʼtʌlel ti Pañimil, miʼ ñaxan cajel cabʌl guerra, wiʼñal yicʼot yujquel lum (Mateo 24:​3, 7).

  Wʌle ora wolix laj qʼuel pejtelel ili wocol. Jin chaʼan, miʼ mejlel la cʌl chaʼan jiñi i Yumʌntel Dios mach jalix mi caj i jisan ili wocol tac.