Piuqueyecheliyiñ, quisu duamuulayaiñ müten, doi mai quintuaiñ caquelu che ñi cüme feleal ca ca cüme dulliaiñ taiñ chumal (1 Cor. 10:23, 24, 32; 1 Tim. 2:9, 10). Loncontuculiyiñ tüfachi dungu, taiñ dulliqueel mu pengelaiñ taiñ piuqueyefiel ca respetaquefiel caquelu che. Duamfalngele tami dullial quiñe fütra dungu, raquiduamaimi chem tami femal tami huechurpual. Jesús quimeltueiñmu petu taiñ femnon chem no rume, hune mülei taiñ nentucuentayal (Luc. 14:28). Feimu deu dullifilmi quiñe dungu, raquiduamaimi tunten plata, tiempo ca nehuen duamfali tañi huechunenturpuafiel. Quiñeque mu, nütramcayafuimi tami pu che chem ñi femal caque quiñeque eimün, fei ñi cüme tripayal ti dungu. ¿Chumngelu cümeafui tüfa? Femülmi, ngüneduamafuimi chi ñi duamfalngen pichi cacünutuafiel tami dulliel cam dulliafiel cangelu dungu. Cafei ramtufilmi tami pu che chem ñi raquiduamcülen ca allcütufilmi engün, doi eluucüleaingün ñi huechunenturpual tami dulliel. w25.01 pag. 18, 19 parr. 14, 15

Isaías feipi chumngelu Jehová ñi pu che ayüucülequei. Quisu tañi duam mu llemai cüme felequeiñ (Is. 65:18, 19). Rüfcünu, Jehová adniequeiñmu quelluafiel pu che ñi quimürpuafiel ta Jehová ca ñi coneltual tañi troquiñche mu. Ayüucüleiñ taiñ quimfiel ti rüf dungu, feimu ayüqueiñ taiñ quimelelafiel caquelu pu che (Jer. 31:12). Com iñchiñ coneltulelu Jehová tañi pu che mu nieiñ quiñe maneluhun, feimu rume mañumcüleiñ. Biblia feipi: “Deumarucayaingün, ca fei mu müleaingün, anümaingün ofad ca iñmuaingün ñi fün”. ‘Ngünam cüdaulayaiñ’ Jehová am taiñ quelluaeteu. Cuñihun-ngechi dungu mülehuelayai, ayüucüleaiñ ca cüme mongen nieaiñ. Jehová quimniei chem taiñ duamnieel cafei Jehová eluaiñmu com taiñ duamnieel (Is. 65:20-24; Sal. 145:16). w24.04 pag. 22, 23 parr. 11, 12

Com piuque mu maneluhuaiñ Chau Jehová mu, femngechi taiñ Fütra Cura reque feleai. Cüdaungechi dungu rupaliyiñ rume, allcütunieafiyiñ ta Chau Dios, tüfa cümelcaqueiñmu (Is. 48:17, 18). Ngüneduamlu chumngechi taiñ quelluqueteu, doi maneluuqueiñ Chau Dios mu. Femngechi Chau Jehová ñi quellun mu, doi pepicaucüleaiñ taiñ chaftuafiel fill dungu cüdaungefule rume. Quiñe fütra cura ca quiñe huincul reque, Chau Jehová nehuencülei, fei caletuquelai. Chau Jehová ñi chumngen ca tañi ayüqueel turpu caletuquelai (Mal. 3:6). Adán engu Eva caiñetulu, Jehová caletuquelai chem ñi ayünieel tati pu che mu. Ti apostol Pablo feipi Chau Jehová “quisu catrütuuquelai” (2 Tim. 2:13). Feimu chem rupale rume ca chem femle rume pu che, Chau Jehová turpu cacünutulayai ñi chumngen, tañi ayüqueel ca tañi huercün dungu. Tüfachi dungu quelluqueiñmu maneluhual Chau Jehová mu huesaque dungu rupaliyiñ, ca quelluqueiñmu maneluhual ñi femtripayal com ñi feipicünuel cüpalechi antü mu (Sal. 62:6, 7). w24.06 pag. 27, 28 parr. 7, 8