¿Com pu religion fültucuqueiñmu Ngünechen mu?

Femlai, pu religion com trürlaingün. Biblia mu pequeiñ fentren religion tutequenofilu ta Chau Dios. Feula ta ngüneduamaiñ epu rume religion tutequenofilu ta Chau Dios.

Troquiñ 1: Pu religion poyequefilu fillque coilaque dios

Biblia pengelquei poyengen mu coilaque Dios cümelai chem mu no rume (Jeremías 10:3-5; 16:19, 20). Jehováa feipifi pu israelche: “Ngelai tami nieal caquelu pu dios, iñche müten” (Éxodo 20:3, 23; 23:24). Pu israelche poyequefilu caquelu pu dios, Jehová rume illcutueyu engün (Números 25:3; Levítico 20:2; Jueces 2:13, 14).

Famülque mu Chau Dios ca femngechi pequefi feichi pu dios pingelu (1 Corintios 8:5, 6; Gálatas 4:8). Chau Dios ayülai ñi pu serfiqueteu ñi reyüconal coilaque religion meu. Feimu feipifi ñi pu serfiqueteu: “Quisu engün ñi rangiñ meu mülequilmün, ca famtripalemün” (2 Corintios 6:14-17). Com pu religion tuteniefule ta Ngünechen, Ngünechen feipilayafui tañi pu poyequeteu ñi famtripayal coilaque religion meu.

Troquiñ 2: Pu religion poyequefilu ta Chau Ngünechen, huelu femquelaingün tañi ayüqueel

Quiñeque mu pu israelche poyequefuingün ta Chau Dios, huelu huelulcai tañi poyefiel engün. Inayentufingün caquelu troquiñche poyequefilu coilaque dios, feimu Jehová llouhuelaeyu engün. Jehová ayülai tañi pu serfiqueteu ñi reyüconal coilaque religion mu (Éxodo 32:8; Deuteronomio 12:2-4). Jesús condenafi pu loncolechi religioso chumngechi ñi poyefiel engün ta Chau Dios. Re femfaluuqueingün, feimu Jesús feipi “ngüneduamquelafimün tati doi duamtufalchi dungu mülelu ti ley dungu meu: ñi müleal rüf nor dungu, tamün cutranpiuqueyecheal ca tamün rumel mupituleal com dungu meu” (Mateo 23:23).

Famülque mu quiñe religion müten fültucuqueiñmu Chau Dios mu, feiti nüucülelu Biblia mu (Juan 4:24; 17:17; 2 Timoteo 3:16, 17). Fentren religion enseñalqueingün quiñeque dungu chaftuniefilu Biblia ñi rüf dungu, femgechi püntüentuquefingün pu che Chau Dios meu. Enseñalfingün Trinidad pingechi quimeltun ca feipingün “pu la cañpüle mongeletuingün ca quiñeque amui cütral mapu mu”, piqueingün. Huelu Biblia mu tuulai, femngechi enseñalquefuingün pu poyequefilu coilaque dios. Feichi religion quimeltuquei pu huentru ñi quimün, Chau Dios ñi quimün no. Feimu “chem falilai rume tañi püramyemequeaeteu” pi Chau Dios (Marcos 7:7, 8).

Chau Dios üdequefi pu religioso femfaluuquelu (Tito 1:16). Tati rüfngechi religion enseñaquefi pu che chumngechi yenieal tañi mongen ñi fülconcüleal Chau Dios mu, re huimtun enseñaquelai. Quiñe dungu, Biblia feipi: ‘Fei inei rume “inaniefiñ ti rüfngechi feyentun dungu” pilele, huelu quim ngünenole ñi hun, fei quisutu ta ngünencaniehui fei ñi inanieelchi feyentun dungu chem meu rume cümelai.  Fei tati rüfngechi feyentun dungu nienolu chem huelulcan no rume Ngünechen meu, fei tüfa lle: ñi quellungeal tati pu cuñifall ca ti pu lantu domo cutrancaucülelu ñi mongen meu, ca ñi miyaunoal mapu meu müleyechi huesaque dungu meu’ (Santiago 1:26, 27). Feichi rüfngechi feyentun dungu “lifngechi religion” pingequei La Palabra de Dios para Todos pingechi Biblia mu (rulpadungungelu mapudungun mu).