Pu Dunguquelu Ineingen Jehová chumngechi ñi acordaquefiel Jesús tañi lan mu, huelu ¿chumngelu trürlai ñi femquen caquelu pu religion mu?

Iñchiñ mülei taiñ inanieafiel chem tañi quimeltun ta Biblia taiñ acordayafiel Jesús tañi lan mu (1 Corintios 11:20). Caquelu religion nentuquelai quimün ta Biblia mu tañi acordayafiel ta Jesús tañi lan.

Femqueiñ taiñ mañumniefiel ñi hulün tañi mongen iñchiñ taiñ montulaeteu (Mateo 20:28; 1 Corintios 11:24). Quiñeque che feipiquei: “Acordafiliyiñ Jesús tañi lan, Chau Dios pürüm perdonaqueiñmu taiñ culpan”. Huelu Biblia quimeltuquelai femngechi dungu. Doi mai mülei taiñ maneluhual ta Jesús mu, femngechi müten Dios ta perdonayaiñmu taiñ culpan mu (Romanos 3:25; 1 Juan 2:1, 2).

Jesús feipifi tañi discipulo ñi acordangeal tañi lan mu. Huelu feipilafi tunten rupa tañi acordangeal (Lucas 22:19). Quiñeque che feipiquei ñi acordangeal fill cüyen, ca fill semana, ca fill antü. Ca quiñeque che feipiquei tunten rupa rume ñi acordangeal quiñe antü mu, ca tunte rupa rume ñi ayüfiel ñi acordayafiel. Huelu mai mülei ñi quimtucuniengeal quiñeque dungu.

Jesús celebrafilu ta Pascua, feichi antü feipicünufi tañi discipulo ñi acordañmangeal tañi lan mu (Mateo 26:1, 2). ¿Chumngelu am falin-ngei tüfa? Biblia trürümfi Jesús tañi lan mu ti Cordero ñi langümngequeel Pascua antü mu. Ti Pascua celebrangequefui quiñe rupa müten tripantu mu (1 Corintios 5:7, 8). Femngechi ti hunenque cristiano celebraquefui ti Pascua quiñe rupa müten tripantu mu (Éxodo 12:1-6; Levítico 23:5). Ti pu Dunguquelu Ineingen Jehová inaniequefi Biblia tañi feipin. Feimu acordaqueingün quiñe rupa müten Jesús tañi lan tripantu mu.

Jesús cüme pengelcünui chumül tañi acordangeal tañi lan mu. 14 conchi nisan mu, 33 tripantu mu deu conchi antü mu, Jesús feipifi tañi pu discipulo ñi acordangeal tañi lan mu (Mateo 26:18-20, 26). Femngechi ti hunenque cristiano reque, iñchiñ ca acordaquefiyiñ Jesús tañi lan feichi antü mu.

33 conchi tripantu mu, 14 de nisan nagi viernes antü mu. Huelu fill tripantu cangelu antü mu nagafui. Taiñ quimal chem antü mu ñi nagün ti 14 conchi nisan, feimu raquiquefiyiñ ti antü chumngechi ñi raquingequefel Jesús ñi antü mu.⁠a

Jesús pengeli chumngechi tañi acordangeal tañi lan. Pünengei ti cofque nienolu lefaura ca curü pulcu sofralu ñi celebrangemum ti Pascua (Mateo 26:26-28). Ca femngechi pünequefiyiñ ti cofque nienolu lefaura, condimento ngenolu no rume. Ca femngechi pünequefiyiñ ti pulcu ofad mu tripalu, huelu mülei ñi fermentayal. Ca femngechi ngelai ñi nieal azucura, cangelu especie no rume, ca ñi reyülngenoal cangelu pulcu engu.

Quiñeque religion pünequefingün ti cofque nielu lefaura, huelu Biblia mu fentren rupa adentulei ti lefaura culpan mu (Lucas 12:1; 1 Corintios 5:6-8; Gálatas 5:7-9). Femngechi ti cofque nienolu lefaura, condimento no rume adentulei Jesús tañi cuerpu nienolu culpan (1 Pedro 2:22). Quiñeque religion “cümelai ñi pütocongeal pulcu” piqueingün, feimu pünequefingün ofad ñi co. Huelu femngechi dungu Biblia quimeltuquelai (1 Timoteo 5:23).

Cofque adentulei Jesús tañi cuerpo, ca tati pulcu ca femngechi adentulei Jesús tañi mollfüñ. Quiñeque che ta raquiduamquei, ti cofque ‘Jesús tañi cuerpo’ piqueingün. Ca ti pulcu, ‘Jesús tañi mollfüñ’ pingün. Huelu feichi quimeltun tripalai Biblia mu.

• Dios ta huercüqueiñmu taiñ ngünehual ta mollfüñ mu. Feimu Jesús turpu feipilayafui tañi discipulo tañi pütocoñmayaeteu tañi mollfüñ (Génesis 9:4; Juan 8:28, 29; Hechos 15:28, 29, TNM).

• Jesús mülelu tañi discipulo engün, petu huitrul-lafui tati mollfüñ. Feimu inei rume ta pepi pütocoñmalayafeyu tañi mollfüñ (Mateo 26:28).

• Tunten rupa taiñ acordaquefiel Jesús ñi lan, ti cofque Jesús tañi cuerpo ngerpuquelai. Ca femngechi ti pulcu, Jesús tañi mollfüñ ngerpulai. Felefule, Jesús fentren rupa hulafui tañi mongen. Huelu Biblia feipi Jesús ta huli tañi mongen “quiñe rupa müten”, huelu turpu tañi femhuenoal (Hebreos 9:25, 26).

• Jesús feipi: ‘Femqueaimün tüfa iñche tamün acordamuafiel’. Huelu Jesús feipilai fentrenque rupa hulal tañi mongen, huelu acordañmangeal tañi lan mu (1 Corintios 11:24).

Quiñeque Biblia mu cüme traducengelai ta quiñeque versiculo. Femngechi raquiduamelquefi quiñeque che ti pulcu Jesús tañi mollfüñ ngen, ca ti cofque Jesús ñi cuerpo ngen. Quiñe ejemplo, mapudungun Biblia mu feipi ta Jesús: “Tüfa ta iñche tañi mollfüñ ca müten” (Mateo 26:28, Ngünechen tañi Küme Dungu). Huelu doi cümeafui ñi feipin tüfachi texto: “Tüfa ta iñche tañi mollfüñ mu ta adentulei müten”. Tüfachi versiculo mu, Jesús feipiquefui quiñe ejemplo tañi quimeltual (Mateo 13:34, 35).

Ti pu Dunguquelu Ineingen Jehová ñi acordafiel mu Jesús tañi lan, pichin che müten pütocoquei ti pulcu ca iquefi ti cofque. ¿Chumngelu?

Jesús huitrulün mu tañi mollfüñ, fei mülerpui quiñe hue pacto (Hebreos 8:10-13). Ti concülelu feichi hue pacto meu, fei engün ta iquefi tati cofque ca pütocoquei tati pulcu. Com pu cristiano concülelaingün tüfachi hue pacto mu. Quiñeque müten dullieyu Chau Dios tañi conpual ti hue pacto mu engün (Hebreos 9:15; Lucas 22:20). Tüfachi pu cristiano, Dios tañi dullin, ta Jesús engün ngünenieaingün ta huenu mu. Biblia feipi 144.000 cristiano (Lucas 22:28-30; Apocalipsis 5:9, 10; 14:1, 3).

Pichin che müten reyngeai Jesús engün huenu mu. Huelu, epe com iñchiñ nieiñ quiñe maneluhun taiñ rumel mongeleal Mapu mu (Lucas 12:32; Apocalipsis 7:9, 10). Ti nielu maneluhun rumel mongen ñi nieal tüfachi Mapu meu, iquelafingün ti cofque ca pütocoquelafingün ti pulcu. Huelu amuqueingün ti trahun mu ñi acordayafiel Jesús tañi lan mu. Femngechi ñi pengelal engün ñi fente ñi mañumniefiel ta Jesús com tañi femün mu iñchiñ mu (1 Juan 2:2).