Si Abraham, i ma sahalak bawa na togu haporseaonna tu Jahowa. Hea do dipangido Jahowa ibana asa mamelehon anakna, si Isak. Pasti marsak hian do roha ni si Abraham tikki mandapot tugas on. Nang pe songon i, dioloi ibana do Jahowa. Tikki naeng dipamate si Abraham anakna, pittor diabbati Jahowa ma ibana. Sian on boi ma taboto aha do na diulahon Jahowa lao mangurupi akka jolma na porsea tu Ibana. Olo do Jahowa mamelehon Anak hasianna, ala massai holong do rohana tu jolma. (1 Mus. 22:​1-18) Marratus taon dukkon i, dilehon Jahowa ma Patik tu halak Israel. Dipangido Jahowa ma nasida mangalehon pelean binatang, asa boi disalpuhon dosa ni nasida. (3 Mus. 4:​27-29; 17:11) Alai taboto do, akka pelean i manggombarhon pelean na dumenggan na diparade Jahowa lao paluahon jolma sian dosa. Nungnga dipaboa akka panurirang na lao adong pinoppar na dijanjihon, i ma Anak ni Debata. Na lao marsitaonon do ibana jala mate, asa boi paluahon sude jolma sian dosa dohot hamatean, termasuk ma hamu!—Jes. 53:​1-12. w24.08 4 ¶7-8

Tikki dijaha hamu sada ayat di Bibel, pikkirhon ma boha carana lao mangulahon i. Misalna, sukkun ma dirimuna, ‘Songon dia do carakku mangulahon ayat on saonari manang di tikki na naeng ro?’ Bayakkon ma hamu manjaha 1 Tessalonik 5:​17, 18. Dung dijaha hamu dua ayat i, so ma jo hamu satokkin. Rimangi ma sadia jotjot do hamu martangiang jala songon dia do isi ni tangiangmuna. Pikkirhon ma muse akka pasu-pasu na dilehon Jahowa. Ra diingot hamu ma adong tolu pasu-pasu na dilehon Jahowa, jala naeng mandok mauliate ma hamu tu Jahowa alani akka pasu-pasu i. Aha ma parsiajaranna? Bahkan holan piga-piga menit pe hamu mangarimangi ayat na dijaha, nungnga boi be hamu mangattusi jala mangulahon Hata ni Debata i. Attong, rimangi ma aha manfaatna molo torus dibahen hamu songon i ganup ari tikki manjaha ayat na asing di Bibel. Ujungna, gabe halak Kristen na lam denggan ma hamu. w24.09 4-5 ¶9-10

Ditoppa Jahowa do hita asa marlas ni roha tikki mangalehon. Memang, las do rohatta tikki manjalo hadiah sian na asing. Alai umlas do rohatta tikki hita na mangalehon. Las do rohatta tikki taurupi dongan sahaporseaotta. Jala las do rohatta tikki mandok mauliate nasida. Alai, dang soal nasida mandok mauliate tu hita manang na daong, las do rohatta ala nungnga taulahon be na denggan. Unang ma lupa hamu, manang sadia godang pe na dilehon hamu tu na asing, “boi do lehonon ni Jahowa tu [hamu] lobi sian i”. (2 Kron. 25:9) Bayakkon ma, Jahowa sandiri do na mambalos haburjuotta i. Jala tikki nungnga dipasu-pasu Jahowa hita, i ma pasu-pasu na terbaik. Jadi bertekad ma hita asa toktong maniru Jahowa na burju mangalehon. w24.09 31 ¶20-21