Dɛn Ne Ahohiahia Kɛse No?

Sɛ ahohiahia kɛse no ba a, ɔhaw a ɛso bi mmaa da bɛba adasamma so. Bible nkɔmhyɛ ma yehu sɛ “awiei mmere,” anaa “awiei bere” mu na ɛbɛba. (2 Timoteo 3:1; Daniel 12:4) Ɛka sɛ, ɛbɛyɛ “ahohiahia bere. Efi Onyankopɔn adebɔ mfiase de besi saa bere no, ebi mmae da, na ebi nso remma bio.”—Marko 13:19; Daniel 12:1; Mateo 24:21, 22.

Nea ɛbɛkɔ so wɔ ahohiahia kɛse no mu

• Wɔbɛsɛe atorosom. Ɔsɛe bɛba atorosom so prɛko pɛ. (Adiyisɛm 17:1, 5; 18:9, 10, 21) Amanaman Nkabom no begyina wiase atumfoɔ no ananmu asɛe atorosom ama Onyankopɔn apɛde aba mu.—Adiyisɛm 17:3, 15-18.a

• Wɔbɛtow ahyɛ nokwaresom so. Hesekiel anisoadehu no ka sɛ, “Gog a ofi Magog asaase so” a ogyina hɔ ma amanaman bi a wɔbɛka wɔn ho abom no betu wɔn ani asi nokwaresom so, na wɔbɛbɔ mmɔden sɛ wɔbɛtɔre nokware asomfo ase. Nanso wɔrentumi, efisɛ Onyankopɔn bɛbɔ n’asomfo ho ban.—Hesekiel 38:1, 2, 9-12, 18-23.

• Wɔbebu asaase sofo atɛn. Yesu bebu nnipa nyinaa atɛn, na “ɔbɛpaapae nnipa no mu mmaako mmaako, sɛnea oguanhwɛfo paapae nguan ne mpɔnkye mu no.” (Mateo 25:31-33) Sɛ atemmu no bɛkɔ yiye ama obi a, gye sɛ ɔboa Yesu “nuanom” a wɔne Yesu rekodi ade wɔ soro no.—Mateo 25:34-46.

• Wɔn a wɔbedi hene wɔ Ahenni no mu no, wɔbɛboaboa wɔn ano. Anokwafo a wɔne Kristo bedi hene wɔ soro no, wɔde wɔn som adwuma bɛba awiei wɔ asaase so, na wɔanyan wɔn akɔ soro.—Mateo 24:31; 1 Korintofo 15:50-53; 1 Tesalonikafo 4:15-17.

• Armagedon. “Ade nyinaa so Tumfo Nyankopɔn da kɛse no mu ko” yi, Bible san frɛ no “Yehowa da no.” (Adiyisɛm 16:14, 16; Yesaia 13:9; 2 Petro 3:12) Wɔn a Kristo bebu wɔn fɔ no, ɔbɛsɛe wɔn. (Sefania 1:18; 2 Tesalonikafo 1:6-10) Wɔn a ɔbɛsɛe wɔn no bi ne akekaboa a Bible ka ne ho asɛm sɛ ɔwɔ ti nson no; egyina hɔ ma wiase amammu nhyehyɛe nyinaa.—Adiyisɛm 19:19-21.

Nea ɛbɛkɔ so wɔ ahohiahia kɛse no akyi

• Wɔbɛkyere Satan ne ahonhommɔne no agu mu. Ɔbɔfo bi a ne ho yɛ den paa bɛtow Satan ne ahonhommɔne no agu “amoa donkudonku no” mu. Ɛno kyerɛ sɛ saa bere no, wɔrentumi nyɛ hwee; ɛbɛyɛ te sɛ nea wɔawuwu no. (Adiyisɛm 20:1-3) Nea ɛbɛto Satan saa bere no bɛyɛ sɛ nea wɔde no ato afiase a nea ɛrekɔ so wɔ baabiara no, ɔrentumi nyɛ ho hwee.—Adiyisɛm 20:7.

• Mfe apem Ahenni no befi ase. Onyankopɔn mfe 1,000 Ahenni no befi ase, na ɛde nhyira pii abrɛ nnipa. (Adiyisɛm 5:9, 10; 20:4, 6) “Nnipakuw kɛse bi” a yennim wɔn dodow benya wɔn ti adidi mu wɔ “ahohiahia kɛse no mu,” na sɛ Onyankopɔn mfe 1,000 Ahenni no fi ase sɛ ɛredi nnipa so a, wɔde wɔn ani behu.—Adiyisɛm 7:9, 14; Dwom 37:9-11.