If una dey for relationship, which things una need to know about each other? Before una get strong feeling for each other, e good make una discuss some important things like, wetin each of una plan to do with una life. How you fit really know the other person well? You fit do this one when you de ask question, and listen well as the other person de talk. Another thing na to talk how you de really feel. (Jas. 1:19) To fit do this one, una fit choose to do things wey go make-am easy for una to talk to each other. For example, una fit plan to chop together, waka together for area wey people dey, and preach together. Una fit still know about each other when una spend time with friends and family members. Another thing be say, you fit arrange to do things wey go make you see how the other person de behave for different-different situation, with different people. w24.05 27-28 ¶6-7

We go soon face serious hard time, and we go need to trust Jehovah that time pass before. Read story for Bible, and story of brothers and sisters for this our time. You go see how Jehovah don show say e be Rock for the way e take help them. Think deep about this different-different story. This one go help you make Jehovah your Rock. And you go fit support your brothers and sisters for congregation. For example, Jesus give Simon another name wey be Cephas (wey them translate as “Peter”), the name mean “One Small Rock.” (John 1:42) Wetin Jesus mean be say Peter go comfort brothers and sisters for congregation and make their faith strong. Bible talk say elders for congregation be like shadow of “big rock.” This one mean say them go care for people for congregation. (Isa. 32:2) But the truth be say, all of us fit make each other strong if we de copy Jehovah character wey make-am be like rock. w24.06 28 ¶10-11

The kings wey Jehovah see as good kings, worship-am the way e want make them worship-am. Many of the kings wey Jehovah judge as bad kings stop to de obey Jehovah Law and start to worship other gods. (1 Ki. 21:​25, 26; 2 Chron. 12:1) Why e dey important to Jehovah make Israel people worship-am for the correct way? For Israel king, na their work to help other Israel people to worship Jehovah for the correct way. Another thing be say, when people worship other gods, e de make them commit other serious sin and make them no treat other people well. (Hos. 4:1, 2) And the kings for Israel and other Israel people na people wey Jehovah don choose as im own. So when them leave Jehovah and start to worship other gods, Bible talk say e just be like when person leave im husband or wife and go de sleep with another person. (Jer. 3:8, 9) When person sleep with person wey no be im husband or wife, e don sin against im husband or wife direct. Na so e still be when servant of Jehovah go de worship other gods. Anybody wey do like that, don sin against Jehovah direct.—Deut. 4:23. w24.07 22-23 ¶12-15