ობიშხა, 4 სექტემბერ
იეჰოვას ჯოგჷ აფერისტ კოჩ, მარა მართალეფწკუმა მეგობრენს (იგავ. 3:32).
ნათანაელიშ შემთხვევაშე ჯგირო მიკორჩქინდჷ, მუშმადიდა მნიშვნელობა უღჷ სიალალეს. მუჟამსით ფილიპექ მუშ მეგობარ ნათანაელ იესოს გაჩინებაფუ, საინტერესო მუდგარენქ მოხვად. თიშ უმკუჯინუო, ნამდა იესო ნათანაელს პირველო ორწყედ, თიშ გურშენ თქუ: „თენა რე ნამდვილ ისრაელ, ალალ კოჩ“ (იოან. 1:47). მუშო ოკო რაგად, იესოშ თე სიტყვეფ ვა ნიშნენდჷ, ნამდა თის შხვა მოწაფეეფ ალალ კათათ ვემიორჩქუდ, მარა ნათანაელს გვალო შხვანერ სიალალე ახვილუ. ნათანაელ ჩქინცალო არასრულყოფილ რდჷ, მარა აფერისტულო დო შხვაშ ოძირაფალო მუთუნს ვართუდ. იესოს მანგარო მეწონ თექ დო ქაცქუ ნათანაელს. მა-15 ფსალმუნიშ მა-3 მუხლშე მოჸუნაფილ იძირე, მუჭო ოკო ოქცუდას შხვეფს თი პიროვნება, ნამდგას ოკო, იეჰოვაშ კარავიშ სტუმარ რდასჷ. მა-3 მუხლის ჭარჷ, ნამდა იეჰოვაშ მეგობარ „ტყურას მითინს ვეკაწამენს მუშ ნინათ, გლახას ვა უკეთენს ხოლოშიანს დო მეგობარს ვა ლანძღუნს“. ჩქინ ჩიებათ შილებე მიდგაინ სერიოზულო დუვაზარალათ (იაკ. 1:26). w24.06 10 ¶7, 9; 11 ¶10
საბატონ, 5 სექტემბერ
უფალ, სქან სახელით დემონეფ ხოლო მომორჩილუნა (ლუკ. 10:17).
მსახურებაშო წინასწარ მემზადებუთ-და, ბრელს ვენერვიანენთ დო უმოს თავისფალო ქეჩიებუთ შხვეფს. იესოქ მამზად მუშ მოწაფეეფ, ონდო ოქადაგებშა გუტენდჷ (ლუკ. 10:1–11). თინეფქ გეგმირინუეს იესოშე ნაგურეფ, მუდგაშ ჭყოლოფათ შეიალებუეს ჯგირო შეასრულესკო მუნეფიშ დავალება დო მსახურებაშე გახარებულეფქ დირთეს. მუჭო მივემზადათ მსახურებაშო? ოკო დეფიფქრათ, მუშ რაგად მოკონა პიროვნებაშა დო მუჭო გინოფჩათ ორაგადე ჯგირო ჩქინ სიტყვეფით. ჯგირ იჸუაფ, დეფიფქრათ მუსხირენ ვარიანტშე ხოლო, მუ შილებე მიწუან ჩქინ ტერიტორიას მახორუეფქ დო ჩქი მუჭო უპასუხენთ თითოულ შემთხვევას. თეშ უკულ ოკო ვეცადათ, გოძიცებულო, გემუანო დო თავისფალო ვეჩუათ. w24.04 16 ¶6, 7
ჟეშხა, 6 სექტემბერ
იეჰოვა, ჩქინ ღორონთ, სი გოკუთვნ დიდება, პატი დო ძალა, მუშენდა ირფელ სი გაჭყჷ (გიმოცხ. 4:11).
მთავარ მიზეზ, მუდგაშ გურშენ ხალხის სახიოლო ამბეს უქადაგუთ, რე თინა, ნამდა მიჸორა იეჰოვა დო თიშ წმინდა სახელ. მარჩქილენა, ნამდა ქადაგება რე ართ-ართ საშვალება, მუდგათ შემლებუნა, განვადიდათ ჩქინ ღორონთ, ნამუთ მანგარო მიჸორა. ჩქი ხოლო მთელ გურით ვოთანხმუთ თის, ნამდა იეჰოვას ოკუთვნ „დიდება, პატი დო ძალიერება“. დიდებას დო პატის იეჰოვას თიმწკუმა უძღვინენთ, მუჟამსით შხვეფს ვოძირანთ თიშ მტკიცებულებეფს, ნამდა ირფელ იეჰოვაშ გოჭყაფილ რე დო სიცოცხლე ხოლო თიშე მიღუნა. მუშ რაგად შილებე ძალიერებაშე? თის თიმწკუმა უძღვინენთ იეჰოვას, მუჟამსით ჩქინ დროს, ენერგიას დო ირფელს თიშო იბრინუანთ, ნამდა მუთ შილებენ მეტის უქადაგათ (მათ. 6:33; ლუკ. 13:24; კოლ. 3:23). ჩქი მანგარო მოსიამოვნუნა ჩქინ ღორონთიშ გურშენ შხვეფწკუმა ჩიება, მუშენდა მანგარო მიჸორა თინა. შურ დო გურით მოკონა, ხალხის ქუგვოგებაფუათ თიშ სახელ დო ქივეჩუათ, მუნერ ღორონთ რე იეჰოვა. w24.05 17 ¶11