¿Mbaʼérepa iporãta aháramo umi rreunión ojejapóvape umi Salón del Réinope?

Umi testígo de Jehová oñembyaty jepi 2 vése a la semána umi Salón del Réinope. ¿Mbaʼépa ojejapo jepi upépe? ¿Ha mbaʼépepa ideprovéchota ndéve umi rreunión?

• ¿Mbaʼépa ojejapo umi Salón del Réinope?

• ¿Mbaʼérepa iporãta rehóramo umi rreuniónpe?

• Mbaʼépa heʼi umi mitãrusu

Pe Salón del Reino haʼe peteĩ lugár ojehohápe ojestudia hag̃ua la Biblia. Ha umi rreunión ikatu nepytyvõ rehupyty hag̃ua koʼã mbaʼe:

• Reikuaa porãve hag̃ua Ñandejárape.

• Rehecha hag̃ua mbaʼéichapa oñekumpli la Biblia heʼíva ñane tiémpope.

• Nembaʼeporã ha revyʼave hag̃ua.

• Retopa hag̃ua amígo ikalidaitereíva.

¿Reikuaápa raʼe? Umi testígo de Jehová ohenói Salón del Reino umi lugár oñembyatyhápe pórke upépe oñeʼẽ meme hikuái Ñandejára Rréinore (Mateo 6:9, 10; 24:14; Lucas 4:43).

Umi informasión ojestudiáva upépe ideprovechoitereíta ndéve. Umi konsého bíblico oñeanalisáva umi rreuniónpe nepytyvõta ikatu hag̃uáicha “nearandu ha neentendído” (Proverbios 4:5). Upéva heʼise la Biblia ikatuha nepytyvõ redesidi porã hag̃ua. Ikatu avei nepytyvõ rekontesta hag̃ua heta pregúnta iñimportantetereíva, por ehémplo:

• ¿Maʼerãpa jaikove?

• ¿Ñandejára káusarepa jasufri?

• ¿Mbaʼépa oiko ñamano rire?

Emañamína avei mbaʼe téma rehepa oñeñeʼẽ jepi umi diskúrsope fin de semanakue:

• ¿Mbaʼérepa jajapo vaʼerã la Biblia heʼíva?

• ¿Mávapa ikatu ñanembopyʼaguapy jahasa asy jave?

• ¿Mbaʼépa ojapo hína Ñandejára Rréino ñanderehehápe?

Brenda heʼi: “Peteĩ vuéltape peteĩ che kompañéro de koléhio oho rreunionhápe, haʼe ou oguapy orendive ha ore rohechauka chupe umi lívro ojestudiáva hína upépe. Upe rire heʼi chéve ogustaiterei hague chupe mbaʼéichapa umi hénte opartisipa ha orresponde ojejapo jave umi pregúnta pe auditóriope. Heʼi avei chéve ijiglésiape haʼekuéra ndorekoiha umi informasión ostudia hag̃ua umi Testígo orekoháicha”.

¿Reikuaápa raʼe? Umi Salón del Réinope ndojekovrái entráda ni ndojejeruréi pláta.

Umi ohóva upépe nemokyreʼỹta. La Biblia heʼi voi kristianokuéra oñembyaty vaʼerãha ‘oñomokyreʼỹ hag̃ua’ (Hebreos 10:24, 25). Ko múndope ningo la majoría ojepyʼapy ijehénte, upévare nemokyreʼỹetereíta reñembyatýramo umi persóna ohayhúvandi Ñandejárape ha ojepyʼapývandi umi ótrore.

Elisa heʼi: “Sapyʼánte ningo chekaneʼõiterei ha añandu nameʼẽveietemaha, péro upe rire aha pe Salón del Réinope ha umi hénte oĩva upépe chemoñeñandu porãiterei. Opa rire pe rreunión avyʼaiterei apytávo, ha areko jeýma fuérsa asegi hag̃ua”.

¿Reikuaápa raʼe? Ko múndo tuichakuére oĩ mas de 120.000 kongregasión ha mas de 60.000 lugár oñembyatyhápe umi testígo de Jehová. Ha heta hetave rupi umi ohóva rreunionhápe, káda áño oñemopuʼã 1.500 Salón del Réinorupi.a