Dadale, ajutisaren tumare șiaven te daștin te phenen averenghe sostar pachian că o Del cărdea sea le buchia. (1 Pet. 3:15) Daștinas te dichen ande iech than articolea cai den duma anda i creația hai evoluția po site-o jw.org. Pala codoia, chio șiavo daștil te alosarel so pachial vo că si mai mișto te phenel averenghe caște ajutil-len te hachiaren că o Del cărdea sea le buchia.Cana varecon camel te del duma lesa, zuriar-les te cherel cadaia ande iech modo simplo hai te ajutil-len te gândin. Sar avelas, iech colego daștilas te phenel: „Me pachiav numai so dichav, hai le Devles ci dichlem-les niciechdata”. Iech tărno creștino daștilas te phenel lesche parpale: „Gândisar tut că phires ande iech văș cai si dur le manușendar, hai diches iech haing. So avelas te pachias? Cadai haing sas cărdi ciaces varecastar. Sa cadea si vi amara phuveasa hai fiesavea buchiasa cai trail pe late. Ciaces, trebul te avel varecon goghiaver cai cărdea sea cadal buchia”. w24.12 18 ¶16

Savore si amen nevoia ajutorostar cana trebul te alosaras vareso importanto. Daisaras te mangas ajutorii le phurendar de congregație sau avere phralendar hai pheiandar save nachle prin mai but buchia ande penghi viața. Cana von sile mai phure amendar, ci trebul te pachias că lenghe sfaturi sile prea purane caște aven lașe anda amende. O Iehova camel te sichioas codolendar mai phure. Ji cana arăsle ca penghe bărșa, daisarde te sichion but buchia, te bariaren pengo goghiaverimos hai te hachiaren sar trebun te aven cărde le buchia andi viața. (Iov 12:12) Andel ghiesa biblico, o Iehova zuriardea hai sicadea pesche manușenghe so te cheren prin pesche slujitori cai sas-le mai phure hai cai așile pașa leste anda sea o ilo. Te gândisaras amen, sar avelas, co Moise, co David hai co apostolo Ioan. Von traisarde diferime hai andel bărșa diferime. Pala so phurile, von dine goghiaver sfaturi le tărnenghe. Fiesavo anda cadal slujitori phure le Iehovasche sicade amen chichi de importanto si te așunas le Devlestar. Chiar cana sam mai tărne sau mai phure, daisaras te țârdas miștimata cana sichioas anda lenghe sfaturi. (Rom. 15:4; 2 Tim. 3:16) w24.11 8 ¶1, 2

Andel ghiesa le Noesche, o Iehova phendea le manușenghe te na han rat. (Gen. 9:3, 4) Pala codoia, o Iehova șiutea cadai porunca vi andai Legea mozaico. Oricon avelas te hal rat trebulas „te avel mudardo”. (Lev. 7:27) O Isus sicadea le iudeien te încăren sea le legi cai o Iehova dea-len. (Mat. 5:17-19) Cadea că hachiaras că vo ci phendea le iudeienghe caște han ciaces lesco mas hai te pien lesco rat. O Isus folosisardea iech ilustrarea, cadea sar cărdea vi mai anglal iecha jiuvleasa samariteano. Vo phendea lache: „O pai cai va avela te dav-les lesche va cărdiola ande leste iech haing paieschi caște del viața veșnico”. (Ioan 4:7, 14) O Isus ci camlea te phenel că, dacă cadai jiuvli va avela te piel ciaces pai, va avela te trail anda sea o timpo. Sa cadea, o Isus ci camlea te phenel că, dacă codola but manușa chidine ande iech than avenas te han lesco mas hai te pien lesco rat, avenas te train anda sea o timpo. w24.12 9 ¶4-6