Be Ahun mẹ Wẹ Ahọluduta Jiwheyẹwhe Tọn te Ya?

Eyeo, Ahọluduta Jiwheyẹwhe tọn ma yin ninọmẹ ahun mẹ tọn kavi numọtolanmẹ de he Klistiani lẹ nọ do to yede mẹ poun gba.a Na nugbo tọn, Biblu dọ fie e na yin didoai te to whenue e ylọ ẹ dọ “ahọludu olọn tọn.” (Matiu 4:17, Biblu Wiwe lọ—Gun Alada) Gbadopọnna lehe Biblu do e hia di gandudu nujọnu tọn de he na deanana nulẹ sọn olọn mẹ do.

• Ahọluduta Jiwheyẹwhe tọn tindo gandutọ lẹ, mẹjidugando lẹ, osẹ́n lẹ, gọna aṣẹ kavi azọ́ndenamẹ lọ nado hẹn ojlo Jiwheyẹwhe tọn yin wiwà to olọn mẹ podọ to aigba ji.—Matiu 6:10; Osọhia 5:10.

• Gandudu Jiwheyẹwhe tọn kavi Ahọluduta etọn na wá paṣẹ do “gbẹtọ lẹ, akọta lẹ po akọ̀ lẹpo po” ji. (Daniẹli 7:13, 14) Aṣẹpipa etọn ma na wá sọn alọ mẹjidugando etọn lẹ tọn mẹ, amọ́ sọn Jiwheyẹwhe dè tlọlọ.—Salmu lẹ 2:4-6; Isaia 9:7.

• Jesu dọna apọsteli nugbonọ etọn lẹ dọ yé na wá “sinai to ofìn lẹ ji” to pọmẹ hẹ emi to Ahọluduta olọn tọn lọ mẹ.—Luku 22:28, 30.

• Ahọluduta lọ do kẹntọ lẹ, he e na wá vasudo.—Salmu lẹ 2:1, 2, 8, 9; 110:1, 2; 1 Kọlintinu lẹ 15:25, 26.

Biblu ma plọnmẹ dọ Ahọluduta olọn tọn yin nude he to ahun mẹdopodopo tọn mẹ, bo nọ dugán kavi deanana ahun mẹtọn gba. Amọ́, e dọ dọ “ohó Ahọluduta lọ tọn” kavi “wẹndagbe Ahọluduta lọ tọn” sọgan yinuwado ahun mítọn ji, bọ mí sọ dona dike ni wàmọ.—Matiu 13:19; 24:14.

Etẹwẹ hodidọ lọ “ahọluduta Jiwheyẹwhe tọn tin to mì mẹ” zẹẹmẹdo?

Mẹdelẹ ko yin hinhẹn biọ bẹwlu mẹ gando fie Ahọluduta lọ te taun go, na aliho he mẹ nuhe Luku 17:21 dọ lẹ yin didọ te to lẹdogbedevomẹ Biblu tọn delẹ mẹ wutu. Di apajlẹ, lẹdogbedevomẹ La Bible du Roi Jacques tọn dọ ẹ dole dọmọ: “Ahọluduta Jiwheyẹwhe tọn tin to mì mẹ.” Nado yọ́n nue dọ wefọ ehe te taun, mí dona lẹnnupọndo nuhe hodọ wefọ devo he lẹdo e lẹ te ji.

To ojlẹ lọ mẹ, Jesu to hodọna Falesi lẹ wẹ, yèdọ pipli nukọntọ sinsẹ̀n tọn lẹ tọn de he to nukundiọsọ ẹ bosọ to ayiha kàn to pọmẹ do okú etọn go. (Matiu 12:14; Luku 17:20) Be e sọgbe hẹ lẹnpọn dagbe nado lẹndọ Ahọluduta lọ yin ninọmẹ ahun mẹ tọn de to ohò mẹhe tindo ahun sinsinyẹn ehelẹ tọn mẹ ya? Jesu dọna yé dọmọ: “To homẹ, mì gọ́ na yẹnuwiwa po sẹ́nhẹngba po.”—Matiu 23:27, 28.

Lẹdogbedevomẹ Biblu tọn devo lẹ hẹn nue dọ Jesu te to Luku 17:21 mẹ họnwun to aliho he sọgbe mẹ dọmọ: “Ahọludu Jiwheyẹwhe tọn tin to gblagbla mìtọn mẹ.” (Míwlẹ wẹ zinnudo hogbe delẹ ji; Biblu Wiwe lọ—Gun Alada) “Ahọluduta Jiwheyẹwhe tọn tin to mì ṣẹnṣẹn.” (Biblu Lẹdogbedevomẹ Aihọn Yọyọ Tọn) Ahọluduta olọn tọn tin to “gblagbla” Falesi lẹ tọn mẹ kavi to “ṣẹnṣẹn” yetọn, na Jesu, mẹhe Jiwheyẹwhe ko de nado yin Ahọlu gandudu ehe tọn ko to ote to nukọn yetọn wutu.—Luku 1:32, 33.