Ko ha Fiemaʻu Pau Ia ke Kau ki ha Kautaha Lotu?
Tali ʻa e Tohi Tapú
ʻIo, koeʻuhi ʻoku fiemaʻu ʻe he ʻOtuá ʻa e kakaí ke fakatahataha ke lotu. ʻOku pehē ʻi he Tohi Tapú: “Pea tuku ke tau fetokangaʻaki koeʻuhi ke fakaʻaiʻai ai kitautolu ki he ʻofá mo e ngaahi ngāue leleí, ʻo ʻoua ʻe liʻaki ʻa ʻetau fakataha fakatahatahá.”—Hepelū 10:24, 25, fakamatala ʻi lalo.
Naʻe fakahaaʻi ʻe Sīsū ko hono kau muimuí te nau hoko ko ha kulupu fokotuʻutuʻu maau ʻi heʻene pehē kiate kinautolu: “Ko e meʻa eni ʻe ʻilo ai ʻe he faʻahinga kotoa ko ʻeku kau ākonga kimoutolú—ʻo kapau ʻoku mou maʻu ʻa e ʻofá ʻi homou lotolotongá.” (Sione 13:35) Ko e founga tefito hono fakahāhā ʻe he kau ākonga ʻa Kalaisí ʻa e ʻofa ko ení, ko ʻenau feohi mo e ngaahi kaungātuí. ʻE fokotuʻutuʻu maau kinautolu ki ha ngaahi fakatahaʻanga ʻoku nau fakataha maʻu pē ke lotu. (1 Kolinitō 16:19) ʻI he tuʻunga ko ha kulupu, te nau hoko ko ha fetokouaʻaki ʻi māmani lahi.—1 Pita 2:17.
Fiemaʻu ha meʻa lahi ange ʻo ʻikai ko e kau pē ki ha lotu
Lolotonga ʻoku fakahaaʻi he Tohi Tapú ʻoku totonu ke fakatahataha ʻa e kakaí ke lotu ki he ʻOtuá, ʻoku ʻikai akoʻi mai ai ʻe lava ke fakahōifuaʻi ʻe ha taha ʻa e ʻOtuá ʻi haʻane hoko pē ko ha mēmipa ʻo ha lotu. Ke fakahōifua ki he ʻOtuá, ko e lotu ʻoku kau ki ai ʻa e tokotahá kuo pau ke ne tākiekina ʻene moʻui fakaʻahó. Ko e fakatātaá, ʻoku pehē ʻi he Tohi Tapú: “Ko e founga lotu ʻoku maʻa mo taʻeʻuliʻi ʻi he anga ʻo e vakai ʻa hotau ʻOtuá mo e Tamaí ʻa eni: Ke tokangaʻi ʻa e kau paeá mo e kau uitoú ʻi heʻenau faingataʻaʻiá, pea ke te tauhi kita ke taʻehaʻila mei he māmaní.”—Sēmisi 1:27, fakamatala ʻi lalo.