Ko ha talavou ʻokú ne siofi ʻa e kakai ʻoku ʻalu ki he Fale Fakatahaʻangá

ʻEKE ʻE HE TOʻUTUPÚ

Ko e Hā ke Maʻu Ai ʻa e Ngaahi Fakataha ʻi he Fale Fakatahaʻangá?

ʻOku fai ʻa e ngaahi fakataha ʻa e Kau Fakamoʻoni ʻa Sihová ʻo tuʻo ua ʻi he uike, ʻi honau feituʻu faiʻanga lotú, ʻa ia ʻoku ui ko e ngaahi Fale Fakatahaʻangá. Ko e hā ʻoku fai ʻi aí, pea ʻe anga-fēfē haʻo maʻu ʻaonga mei haʻo ʻalu ki ai?

Ko e hā ʻoku fai ʻi ha Fale Fakatahaʻanga?

Ko e Fale Fakatahaʻangá ko e senitā ia ʻo e ako ʻa ia ʻoku fakahangataha ki he ngaahi tokoni ʻaonga mei he Tohi Tapú. Ko e ngaahi fakatahá te ne tokoniʻi koe ke:

ako ʻa e moʻoni fekauʻaki mo e ʻOtuá.
mahinoʻi ʻa e ʻuhinga ʻo e ngaahi meʻa ʻoku lolotonga hokó.
hoko ko ha tokotaha lelei ange.
maʻu ʻa e ngaahi kaumeʻa lelei tahá.

Naʻá ke ʻiloʻi? Ko e feituʻu faiʻanga fakataha ʻa e Kau Fakamoʻoni ʻa Sihová ʻoku ui ko e Fale Fakatahaʻanga koeʻuhí ʻoku toutou lāulea ai ki he Puleʻanga ʻo e ʻOtuá.—Māt. 6:9, 10; 24:14; Luke 4:43.

Ko e hā ke ke maʻu ai ʻa e fakatahá?

ʻE tokoni ʻa e fakamatalá kiate koe. Ko e ngaahi tefitoʻi moʻoni Fakatohitapu ʻoku lāulea ki ai ʻa e ngaahi fakataha ʻa e Kau fakamoʻoni ʻa Sihová te ne tokoniʻi koe ke “maʻu mai ʻa e potó.” (Palōveepi 4:5) ʻOku ʻuhingá ʻe lava ʻa e Tohi Tapú ʻo tokoniʻi koe ke fai ʻa e ngaahi fili lelei ʻi he moʻuí. ʻE lava foki ke ne tokoniʻi koe ke tali ʻa e ngaahi fehuʻi mahuʻinga ʻi he moʻuí, ʻo kau ai ʻa e:

Ko e hā ʻa e ʻuhinga ʻo e moʻuí?
ʻOku totonu ke tukuakiʻi ʻa e ʻOtuá ki heʻetau faingataʻaʻiá?
Ko e hā ʻoku hoko ʻi he taimi ʻoku tau mate aí?

Ko e kaveinga eni ʻe niʻihi ʻo e ngaahi malanga ʻoku fai ʻi heʻemau ngaahi fakataha ʻi he fakaʻosinga ʻo e uiké:

Ko e Hā ke Tataki Ai ʻe he Tohi Tapú?
Ko Fē ʻe Lava Ke Ke Maʻu Mei Ai ʻa e Tokoni ʻi he Taimi ʻo e Faingataʻá?
Meʻa ʻOku Fai ʻe he Puleʻanga ʻo e ʻOtuá Maʻatautolu he Taimi Ní.

“Naʻe haʻu ha kaungāako ki he taha ʻo e ngaahi fakatahá. Naʻá ne nofo mo homau fāmilí, pea naʻa mau vahevahe ʻemau ʻū tohí mo ia. Hili iá, naʻá ne tala mai kiate au naʻe maongo moʻoni ʻa e ngaahi tali naʻe fai lolotonga ʻa e ngaahi konga ʻoku kau ki ai ʻa e kau fanongó. Naʻá ne toe pehē ko hono siasí ʻoku ʻikai te nau maʻu ha naunau ako hangē ko kitautolú.”—Brenda.

Naʻá ke ʻiloʻi? ʻOku taʻetotongi ʻa e nofoʻanga ʻi he Fale Fakatahaʻangá, pea ʻoku ʻikai fai ai ha tānaki paʻanga.

Ko e feohí te ne fakalototoʻaʻi koe. ʻOku pehē ʻe he Tohi Tapú ko e ʻuhinga ʻe taha ʻoku totonu ke fakatahataha fakataha ai ʻa e kau Kalisitiané ke nau “fefakalototoʻaʻaki.” (Hepelū 10:24, 25) Ko e feohi lelei ʻa e kakai ʻoku nau fakamuʻomuʻa ʻa e ʻOtuá mo e niʻihi kehé ʻiate kinautolú, ʻoku fakaivifoʻou ia ʻi he fuʻu māmani siokita ko ení.

“Hili ha ngāue ʻaho kakato, ʻoku ou ongoʻi mamahi nai mo helaʻia, ka ko e faʻahinga ʻi he Fale Fakatahaʻangá ʻoku nau ʻai maʻu pē au ke u ongoʻi lelei ange. ʻI heʻeku foki ki ʻapi ʻi he hili ʻa e fakatahá, ʻoku ou ongoʻi fiefia pea mateuteu ki he ʻaho ngāue hokó.”—Elisa.

Naʻá ke ʻiloʻi? ʻOku laka hake ʻi he fakatahaʻanga ʻe 120,000 ʻa e Kau Fakamoʻoni ʻa Sihova takatakai ʻi he māmaní, pea ʻoku nau fakataha ʻi he feituʻu laka hake he 60,000. ʻI he taʻu taki taha, ko e fakaʻavalisí, ko e Fale Fakatahaʻanga nai ʻe 1,500 ʻoku langa ke fakalato ʻa e tupu ʻi he tokolahi ʻo e kau maʻu fakatahá.a

Meʻa ʻoku leaʻaki ʻe ho toʻumeʻá

“ʻI he taimi naʻá ku kei ʻi he kolisí ai, naʻá ku haʻu mo ha kaungāako ki he ngaahi fakataha ʻe niʻihi, pea naʻe maongo kiate ia ʻa e taʻu kehekehe ʻo e kau ako Tohi Tapú ka ʻoku nau ako fakataha kotoa pē. Ki muí ni mai naʻe haʻu ʻeku pule ngāué, pea naʻe maongo ki ai ʻetau toutou ngāueʻaki ʻa e Tohi Tapú. ʻI he sio ki heʻene houngaʻia ʻi he fakatahá naʻe tupulaki ai ʻa ʻeku houngaʻiá tonu!”—Jessica.

“Ko e ngaahi fakatahá ʻoku nau ʻomai kiate au ʻa e fakafiemālie mei he ngaahi ngāue fakaʻahó mo e ngaahi loto-moʻuá. ʻOku tau ako ki he founga ke maʻu ai ha moʻui fiemālie, hoko ko ha tokotaha lelei ange, mo e ngaahi meʻa lahi ange. ʻOku ou mavahe maʻu pē mei he Fale Fakatahaʻangá mo e ongoʻi loto-toʻa mo fakaivifoʻou.”—Timothy.

“ʻI he hili ʻa e fakatahá naʻe pehē ʻe ha tangata naʻá ku fakaafeʻi: ‘Naʻá ku maʻu pē ʻa e fakatahá koeʻuhi ke u fakamoʻoniʻi ʻa e hala hoʻomou ngaahi tuí. Kae ʻosi angé ko haʻakú tui naʻe halá!’ Naʻe maongo foki ki ai ʻa e anga-fakakaumeʻa ʻa e Kau Fakamoʻoni ʻa Sihová. Naʻá ne pehē: ‘Neongo naʻá ku toki feʻiloaki pē mo kimoutolu, ka naʻa mou fakafeangai mai kiate au ʻo hangē naʻá ku ʻosi ʻiloʻi kimoutolu ʻi ha ngaahi laui taʻu!’”—Jacob.

“Naʻe ʻi ai ha ngaahi taimi naʻá ku fakakaukau, ‘ʻI he tuku pē ʻa e fakatahá te u mavahe leva.’ Ka ʻi he lolotonga ʻa e fakatahá, naʻe mole atu ʻa e ongoʻi ko iá. Hili ʻa e fakatahá, naʻá ku talanoa ki he kakaí pea ʻikai ke u manatuʻi ʻa e ʻuhinga naʻá ku ongoʻi pehē ai ki muʻá. Kapau naʻe ʻikai ʻa e ngaahi fakatahá, naʻe ʻikai ke u mei maʻu ʻa e ngaahi kaumeʻa ʻoku ou maʻu ʻi he taimi ní.”—Madison.

a Ke kumi ha feituʻu faiʻanga fakataha, ʻalu ki he peesi ʻa e “Fakataha ʻa e Fakatahaʻanga ʻa e Kau Fakamoʻoni ʻa Sihová” pea lomi ʻi he “Kumi ha Feituʻu Ofi kia Koé.”