Ano ang ginhimo sang mga hari sang Israel nga ginkabig ni Jehova nga mga matutom? Ginsimba nila sia sa husto nga paagi. Para kay Jehova, indi matutom ang kalabanan nga hari bangod ginsikway nila ang iya Kasuguan kag nagsimba sila sa butig nga mga dios. (1 Hari 21:​25, 26; 2 Cron. 12:1) Ngaa ginhimo gid ni Jehova nga basihan ang pagsimba sa iya sa husto nga paagi? Kay man, responsibilidad sang mga hari nga buligan ang mga tawo nga simbahon si Jehova sa husto nga paagi. Kag indi gid maayo ang resulta kon magsimba sa butig nga mga dios ang iya katawhan. Posible himuan nila sing malain ang iban kag masulay sila nga maghimo sang serioso nga mga sala. (Os. 4:​1, 2) Nadedikar man kay Jehova ang mga hari sang Israel kag ang mga Israelinhon. Gani sa kada tion nga nagasimba sila sa butig nga mga dios, ginpaanggid ini sang Biblia sa pagpakighilahi. (Jer. 3:​8, 9) Kon magpakighilahi ang isa ka tawo, masakitan gid ang iya asawa ukon bana. Sing kaanggid, kon nagasimba sa butig nga mga dios ang isa ka alagad ni Jehova nga nadedikar sa Iya, nasakitan gid si Jehova.​—Deut. 4:23. w24.07 22-23 ¶12-15

Kon ginsikway sa kongregasyon ang isa ka indibiduwal, ginapanikasugan sang mga gulang nga ilugon ang kaluoy ni Jehova sa iya. Halimbawa, wala ginhulat ni Jehova nga maghinulsol anay ang iya rebelyuso nga katawhan nga mga Israelinhon antes niya sila ginbuligan. Sa baylo, ginpadala niya ang iya mga manalagna bisan pa wala sila sing may ginhimo nga pagbag-o. Ginpakita ni Jehova nga maluluy-on gid sia sang ginsilingan niya si manalagna Oseas nga patawaron niya ang iya asawa kag kuhaon niya sia liwat bisan pa padayon sia nga nagahimo sang serioso nga sala. (Os. 3:1; Mal. 3:7) Bilang pag-ilog kay Jehova, gusto gid sang mga gulang nga makabalik sa kongregasyon ang nakasala, kag wala nila ginapabatyag sa iya nga mabudlay ini himuon. Sa ilustrasyon ni Jesus parte sa rebelyuso nga anak, “nagdalagan [ang amay] kag ginhakos ang iya anak kag mapinalanggaon nga ginhalukan.” (Luc. 15:20) Talupangda nga wala ginhulat sang amay nga mangabay anay ang iya anak nga patawaron sia. Sa baylo, nagdalagan sia pakadto sa iya anak bangod palangga niya sia. Amo gid sina ang ginabatyag ni Jehova sa mga nagbiya sa iya. w24.08 27-28 ¶7-8

Ginapakita sang teksto sini nga adlaw nga wala ginatago ni Jehova ang iya kaalam. Sa baylo, maalwan niya ini nga ginahatag sa iban. Talupangda man nga kon nagahatag si Jehova sang kaalam, ginahimo niya ini nga “wala nagapangtamay,” ukon “wala nagapangita sang sayop.” Buot silingon, wala niya kita ginapakanubo kon nagapangabay kita sa iya nga giyahan niya kita. Ang matuod, gusto niya nga magpagiya kita sa iya. (Hulu. 2:​1-6) Bilang pag-ilog kay Jehova, paano naton mapaambit sa iban ang aton kaalam? (Sal. 32:8) Madamo sang kahigayunan ang katawhan ni Jehova para mapaambit nila sa iban ang ila natun-an. Halimbawa, ginahanas naton sa pagbantala ang mga bag-uhan. Mapinasensiahon nga ginahanas sang mga gulang ang ministeryal nga mga alagad kag ang bawtismado nga mga brother sa paghimo sang ila mga asaynment sa kongregasyon. Kag sa bahin sang mga kauturan nga may eksperiensia sa konstruksion kag sa pagmentinar sang mga pasilidad sang organisasyon, ginahanas man nila ang iban kon paano ini himuon. w24.09 28-29 ¶11-12