Ngaba Ubusazi?

Umpostile uPawulos wahamba ngayiphi indlela xa wayesiya eRoma okokuqala?

▪ IZenzo 28:13-16 zithi inqanawa awayehamba ngayo uPawulos yaya eItali yaza yafika ePuteyoli (namhlanje ekuthiwa yiPozzuoli), kunxweme lwaseNaples. Ukusuka apho waya eRoma ngendlela yaseApiyo, eyona ndlela enkulu eya esixekweni.

Indlela yaseApiyo yayithiywe ngoApiyo Klawudiyo Caecus, igosa laseburhulumenteni laseRoma elaqalisa ukuyakha ngowe-312 B.C.E. Le ndlela, eyayiziimitha ezintlanu ukuya kwezintandathu ububanzi neyayakhiwe ngamatye amakhulu, yade yagubungela umgama oziikhilomitha ezingama-583 ukusuka emzantsi mpuma ukuya eRoma. Yayidibanisa iRoma kunye nezibuko laseBrindisi, indlela eya eMpuma. Abakhenkethi babesima kwiindawo ezithile kule ndlela—ezazishiyana ngeekhilomitha ezingama-24—ukuze bathenge, balale okanye batshintshe amahashe neenqwelo zabo.

Kodwa ke, kusenokwenzeka ukuba uPawulos yena wayehamba ngeenyawo. Inxalenye yendlela yaseaApiyo awahamba kuyo yayiziikhilomitha ezingama-212 ubude. Inxalenye yale ndlela yayinqumla ePontine Marshes, indawo enemigxobhozo eyabangela omnye umbhali waseRoma akhalaze ngenxa yeengcongconi nevumba layo elibi. Kumantla aloo migxobhozo kwakukho iNdawo yeMarike ka-Apiyo eyayikwiikhilomitha ezingama-65 ukusuka eRoma—kunye neeTaveni eziNtathu, indawo yokuphumla eyayikwiikhilomitha ezingama-50 ukusuka esixekweni. Kwakukho amaKristu aseRoma awayelinde uPawulos kwezi ndawo zokuphumla zimbini. “UPawulos wambulela uThixo waza womelela” esakuwabona.—Izenzo 28:15.

Luhlobo olunjani lwecwecwe lokubhala ekuthethwa ngalo kuLuka 1:63?

▪ Ingxelo yeVangeli kaLuka ithi abahlobo bakaZekariya bambuza ukuba laliza kuba ngubani igama lonyana wakhe owayeza kuzalwa. UZekariya “wacela icwecwe waza wabhala oku: ‘NguYohane igama lakhe.’” (Luka 1:63) Ngokutsho komnye umphengululi, ibinzana lesiGrike eliguqulelwe apha ngokuthi “icwecwe” libhekisela “kwicwecwe elincinane elalidla ngokwenziwa ngomthi lize lityhidwe ngomthwebeba.” La macwecwe ayesalekwa ngomthwebeba weenyosi. Umntu wayenokubhala kuwo. Ezo zinto zibhaliweyo zazidla ngokucinywa kuze kubhalwe ezinye.

Incwadi ethi Reading and Writing in the Time of Jesus ithi: “Imizobo yasePompeii, imifanekiso eqingqiweyo evela kwiindawo ezahlukeneyo zoBukhosi baseRoma nezinye izinto ezininzi ezembiwa kumanxuwa ahlukahlukeneyo aseYiputa ukuya kwiHadrian’s Wall, [eMantla eBritani] zibonisa ukuba ayesetyenziswa ngokubanzi la macwecwe.” Baninzi abantu abasenokuba babewasebenzisa—abarhwebi, amagosa karhulumente mhlawumbi namanye amaKristu enkulungwane yokuqala.

[Umfanekiso okwiphepha 11]

Indlela YaseApiyo

[Umfanekiso okwiphepha 11]

Icwecwe elalisetyenziswa ngenkulungwane yesibni

[Inkcazelo]

By permission of the British Library