Wancedwa yintoni uKorneli ukuze abhaptizwe? IBhayibhile ithi ‘yena nayo yonke indlu yakhe babemoyika uThixo.’ Enye into wayehlala ethandaza kuThixo. (IZe. 10:2) Xa uPetros wamshumayeza iindaba ezilungileyo, yena nentsapho yakhe bakholwa kuKristu baza bakhawuleza babhaptizwa. (IZe. 10:47, 48) Ngokuqinisekileyo wayekulungele ukutshintsha nantoni na ekwakufuneka ayitshintshe ukuze yena nentsapho yakhe bakhonze uYehova. (Yosh. 24:15; IZe. 10:24, 33) UKorneli wayenokuvumela isikhundla awayekuso simenze angade abe ngumKristu. Kodwa zange ayivumele loo nto. Ngaba ukwazi inyaniso kuza kufuna ubutshintshe kakhulu ubomi bakho? Ukuba uthi ewe, uYehova uza kukunceda. Uza kukusikelela xa uzimisele ukumkhonza usebenzisa imigaqo yeBhayibhile ebomini bakho. w25.03 5 ¶12-13

Ukuba uva kuthethwa kakubi ngentlangano okanye ngabazalwana abakhokelayo, khumbula indlela iintshaba zikaThixo ezamphatha ngayo uYesu nabafundi bakhe. Namhlanje abantu bakaYehova baphethwe kakubi futhi kuyaxokwa ngabo njengokuba iBhayibhile yayitshilo. (Mat. 5:11, 12) Soze silahlekiswe ngamabali obuxoki ukuba siyamazi oyena mntu uwakhuthazayo futhi siyakhawuleza ukuzikhusela kuwo. Sinokuzikhusela njani? Sukuwamamela amabali obuxoki. Umpostile uPawulos wasibonisa ukuba simele senze ntoni xa siweva. Wathi uTimoti ‘makayalele abanye ukuba bayeke ukumamela amabali obuxoki, bahambele kude kuwo.’ (1 Tim. 1:3, 4) Sihambela kude kumabali obuxoki kuba siyazi ukuba asuka kubani. Sibambelela ‘kwimfundiso ephilileyo’ yenyaniso.—2 Tim. 1:13. w24.04 11 ¶16; 13 ¶17

Hlala umanyene nabo bathembekileyo kuYehova. UThixo ufuna simkhonze simanyene. Xa sibambelele enyanisweni siza kuhlala simanyene. Abantu abasasaza izinto eziphikisana nenyaniso bayaliqhekeza ibandla, yiloo nto uThixo esithi ‘masibaphephe.’ Ukuba asiyenzi loo nto, sinokuzibona sesiyishiya inyaniso. (Roma 16:17) Xa siyibona inyaniso size sibambelele nkqi kuyo, siza kuhlala sinokholo olomeleleyo. (Efe. 4:15, 16) Asizukulahlekiswa bubuxoki bukaSathana, nangentlungu engathethekiyo uYehova uza kuhlala esikhusela. Ungayeki ukubambelela nkqi enyanisweni. ‘UThixo woxolo uza kuba nawe.’—Fil. 4:8, 9. w24.07 13 ¶16-17