Isikolo SaseGiliyadi—Nangona Sineminyaka Engama-50 Sisaqhubeka Ngamandla!

KWIKLASI yokuqala yaseGiliyadi ngoFebruwari 1, 1943, uN. H. Knorr wathi ngomhla wokuvulwa kwesi sikolo: “Kukho iindawo ezininzi ubungqina obungoBukumkani obungekanikelwa kakhulu kuzo.” Waza wongezelela wathi: “Kumele kubeko amakhulu namawaka abantu abangakumbi ebebenokufikelelwa ukuba bekunokubakho abasebenzi abangakumbi entsimini. Ngobabalo lweNkosi, kuya kubakho abangakumbi.”

Ibe kuye kwakho abasebenzi abangakumbi—izigidi zabangakumbi! Izintlu zabavakalisi boBukumkani ziye zanda ukususela kwabali-129 070 kumazwe angama-54 ngowe-1943 ukuya kwabazizi-4 472 787 kumazwe angama-229 ngowe-1992! ISikolo saseGiliyadi siye sanegalelo elikhulu kubungqina obuye bangumphumo wolu lwando. Emva kweminyaka engama-50 sisaqhubeka sinendima ebalulekileyo ekuqeqesheni abasebenzi abangabavangeli basemazweni bokukhonza naphi na apho bafuneka khona kwintsimi yehlabathi.

NgoMatshi 7, 1993, kwakukho iindwendwe ezimenyiweyo ezingama-4 798 namalungu entsapho yaseBheteli yaseUnited States ezazihlanganisane kwiHolo yeNdibano yeSixeko saseJersey, eNew Jersey ukuze zivuyisane nababephumelele kwiklasi yama-94. Esi sihlandlo sikhetheke ngokwenene sakwanikela ithuba lokukhangela emva kwiminyaka engama-50 yeSikolo saseGiliyadi. Ngaba ungathanda ukwazi okuthile ngolo cwangciso?

Emva kwengoma yokuvula, uGeorge D. Gangas olilungu leQumrhu Elilawulayo watsho ngomthandazo ochukumisayo. Kwaza, emva kwamagqabaza olwamkelo kasihlalo, uCarey W. Barber, abaphumelele kwesi sikolo—nabo bonke ababekho kucwangciso—baphulaphula ngenyameko ungcelele lweentetho ezimfutshane.

URobert W. Wallen waba ngowokuqala ukunikela intetho, ngomxholo othi “Akuze Ube Wedwa.” Ngelizwi elinobubele, wathi: ‘Kwiintsuku ezizayo, kuza kubakho izihlandlo ebomini benu eniya kuba nesithukuthezi kakhulu, nikude kakhulu neentsapho nabahlobo benu.’ Ngoko ke, kunokutshiwo njani ukuthi, “Anisayi kuba nesithukuthezi”? Wacacisa: ‘Ngenxa yokuba nonke niya kuba nako ukunxibelelana noYehova uThixo.’ Wabongoza abo babephumelele ukuba balixabise ilungelo lomthandazo baze balisebenzise mihla le. Baya kwandula ke, njengoYesu, bakwazi ukuthi, “Andindedwa.” (Yohane 16:32) Hayi indlela awayekhuthaza ngayo loo mazwi kwabo babephumelele!

Ethetha ngomxholo othi “Bambelelani Ngokuqinileyo Kwithemba Lenu” (owawusekelwe kwitekisi yosuku kaMatshi 7), uLyman A. Swingle olilungu leQumrhu Elilawulayo emva koko wathetha ngeempawu ezimbini ezifunekayo—ukunyamezela nethemba. Wathi, ‘Ukungcikivwa, ubutshaba, intiyo, ukuvalelwa entolongweni, kwanokufa zizizathu ezibangela ukuba umKristu kufuneke abe nonyamezelo. Amandla aqhelekileyo amaNgqina kaYehova athembekileyo anokuthembela kuwo ngamaxesha anzima awasikelwanga mda. Ngokuqinisekileyo oku kulukhuthazo, ingakumbi kuni nina baphumeleleyo.’ Kuthekani ngethemba? Wathi ‘Ithemba libalulekile. Njengesigcina-ntloko esikhusela lowo usinxibileyo, ngoko nethemba losindiso lilondoloza lize likhusele amandla engqiqo yomKristu limnceda ukuba agcine ingqibelelo.’—1 Tesalonika 5:8.

Isithethi esilandelayo, uRalph E. Walls, wakhetha umxholo obangel’ umdla othi, “Kunokwenzeka Njani Ukuze Sifumane Ukhuseleko ‘Lwendawo Ebanzi’?” Yintoni ‘indawo ebanzi’? (INdumiso 18:19) Isithethi sachaza, “Kukukhululeka okukubangela ukuba ube noxolo lwengqondo nokhuseleko lwentliziyo.” Sifuna ukukhululwa entwenini? ‘Kuwe siqu—iintsilelo zakho.’ Wongezelela ngelithi: ‘Okunye, kwizinto ezikungqongileyo ezibangelwa nguSathana.’ (INdumiso 118:5) Sinokwenza njani ukuze sifumane ukhuseleko lwendawo ebanzi? ‘Ngokufuna imiyalelo kaYehova kuko konke esikwenzayo nangokucela kuYehova ngazo zonke izinto ezisixhalabisayo sinokholo.’

“Yintoni ekulindeleyo?” lowo ngumxholo owakhethwa nguDon A. Adams. Yaye yintoni eyayilindele aba bavangeli basemazweni batsha? Wathi, lithuba lokuhlengahlengisa. “Kukwakho neentsikelelo ezininzi phambi kwenu.” Ngokomzekelo, wabalisa ngabavangeli basemazweni ababini abatsha nabathi emva kokuba sele bezinzile kwisabelo sabo babhala oku: “Cinga ngolona suku wakha walunandipha enkonzweni, injalo imeko yethu yonke imihla. Asikwazi ukuphatha uncwadi olwaneleyo, yaye abantu baqhubeka becela ukufundelwa.” Isithethi sagqabaza sibhekisa kwiintsapho nabahlobo babo babephumelele: ‘Akukho sizathu sokuba nixhalabe ngaba baphumeleyo. Ningabanceda ngokuba nibabhalele amazwi okhuthazo.’—IMizekeliso 25:25.

Emva koko kwathetha abayaleli besikolo. UJack D. Redford wakhetha umxholo othi “Musa Ukulindela Nto Mntwini.” Olunye ucelo mngeni abo baphumeleleyo abaya kujamelana nalo kukuqhubana nabantu. Yintoni enokunceda? “Zibetheni ngoyaba iimpazamo zabo. Musani ukulindela okungakumbi kwabanye abantu. Musani ukusoloko nilindele ukufumana konke oko nikugqala njengokunifaneleyo. Bacingeleni abanye abantu ukuba abafezekanga, yaye obo bubele buya kuninceda ukuba nikwazi ukuqhubeka. Ukukwazi kwenu ukusebenzisana nabanye abantu kuya kuba luncedo ekukhuleni kwenu.” (IMizekeliso 17:9) Ngokuqinisekileyo, ukusebenzisa esi siluleko sobulumko kuya kunceda abo baphumeleleyo ukuba bakwazi ukuhlengahlengisa ukuze babe ngabavangeli basemazweni kumazwe asemzini!

Eyesi-2 kwabaseKorinte 4:7 ithi, “Obu butyebi sibuphethe ngezitya zodongwe.” U-Ulysses V. Glass, umbhalisi wabo bafikayo kwiSikolo saseGiliyadi, wagqabaza ngesi sibhalo njengoko wayethetha ngomxholo othi “Thembela Kubazalwana Bakho, Abangqineke Bethembekile.” Ziyintoni ‘izitya zodongwe’? Waphawula, “Ezi zimele ukuba zibhekisa kuthi njengabantu abangafezekanga.” Buyintoni ‘ubutyebi’? Wachaza, “Bubulungiseleli bethu bamaKristu.” (2 Korinte 4:1) Yaye kufanele kwenziwe ntoni ngobu butyebi? “Ubutyebi uYehova asinike bona abumele bufihlwe. Ngoko, nina bathandekayo baza kuba ngabavangeli basemazweni, sasazani obu butyebi naphi na apho nihamba khona, nize nifundise abanye abaninzi indlela yokubusasaza.”

Yaba sisihlandlo esabakhumbuza mandulo xa uAlbert D. Schroeder waqalisa ukuthetha, kuba wayengumbhalisi wabafundi beSikolo saseGiliyadi ukuqalisa kwaso. Umxholo wakhe wawusithi “Isiqingatha Senkulungwane Soqeqesho Lobuthixo.” Wathi, “UYehova uyakwazi ukuqeqesha abantu ngokunempumelelo, yaye oku koko akwenzileyo.” Njani? UMzalwana uSchroeder wabhekisela kuqeqesho olufunyanwa ngezikolo ezibini ezamiselwa iminyaka engama-50 eyadlulayo—ISikolo Sobulungiseleli Sobuthixo kunye neSikolo saseGiliyadi. Wabonisa ukuba iNew World Translation iye yasisixhobo esifanelekileyo ukuze kufunyanwe ulwazi oluchanileyo. Abo baphumeleleyo wabaqinisekisa wathi: “Ninokuya kwizabelo zenu kwamanye amazwe ninentembelo enkulu yokuba uMbutho uya kusoloko uninika ulwazi oluchanileyo ngeenjongo zikaYehova.”

UMilton G. Henschel, umongameli weWatch Tower Bible and Tract Society of Pennsylvania, wathetha ngomxholo othi “Aningaboyisi Nje Kuphela.” UMzalwana uHenschel wawuthabatha umxholo wakhe kumxholo wonyaka wowe-1943: “Sigqithisele ekoyiseni ngenxa yalowo wasithandayo.” (Roma 8:37, King James Version) Wachaza ukuba yayingumxholo wonyaka ofanelekileyo kuba phakathi kwiMfazwe Yehlabathi II, abazalwana bethu kumazwe amaninzi babefumana intshutshiso ekrakra. UMzalwana uHenschel wafunda ezinye iingcaphulo kwinkupho yeMboniselo eyayixubusha ngaloo mxholo wonyaka waza wathi: “Eli nqaku leMboniselo [yesiNgesi kaJanuwari 15, 1943] lafundwa ngenyanga kaFebruwari yiklasi yokuqala yaseGiliyadi, yaye labalungiselela oko kwakuphambi kwabo.” Wacacisa wathi, abaninzi abaphumelelayo kwiminyaka engama-50 edluleyo sele bezingqine bengaboyisi. Kuthekani ngeklasi yama-94? “Sondelani kuYehova, sondelani kuthando lwakhe, ngokuqinisekileyo niya koyisa.”

Emva kweentetho zakusasa, usihlalo wadlulisela eminye imibuliso eyayivela kumazwe awahlukahlukeneyo. Kwandula kwafika isihlandlo esasingxanyelwe zizibini ezitshatileyo ezingama-24—ukunikezelwa kweziqinisekiso zabo baphumeleleyo. Ewe, abafundi baseGiliyadi ngoku babengabo baphumeleleyo ngokusemthethweni eGiliyadi! Babevela kumazwe amahlanu kodwa ngokwezabelo zabo bathunyelwa kumazwe angama-17, kuquka iHong Kong, iTaiwan, iMozambiki, nemimandla yeMpuma Yurophu.

Emva konqumamo, kwaqalisa ucwangciso lwasemva-kwemini ngoshwankathelo lweSifundo seMboniselo, esasiqhutywa nguRobert L. Butler. Emva koko abaphumeleleyo banikela amava athile abalaseleyo abaye bawanandipha ngoxa babenikela ubungqina kufuphi neWallkill, eNew York. Ucwangciso lwabonisa enye yezinto ngokuqinisekileyo ezababangela ukuba babeseGiliyadi—uthando lwabo olunzulu ngenkonzo yasentsimini.

Emva kocwangciso lwabafundi, abaninzi kubaphulaphuli babezibuza enoba ucwangciso lwaluza kubalaselisa nto ithile ikhethekileyo ukubhiyozela ama-50 eminyaka eSikolo saseGiliyadi. Abazange baphoxeke!—Bona ibhokisi ehamba kunye neli nqaku, “Ukukhangela Emva Kwiminyaka Engama-50 Yesikolo SaseGiliyadi.”

Kwiminyaka engama-50 edluleyo, uMzalwana uKnorr wabonisa ukuba wayeyindoda yokholo neqondayo. Ukholo lwakhe lokuba iSikolo saseGiliyadi sasiya kuphumelela lwaboniswa ngamazwi akhe okuvula iklasi yokuqala, xa wathi: “Sikholelwa kwelokuba, enyanisweni, ‘imfumba yobungqina’ iya kusuka kule ndawo iye kuyo yonke imimandla yehlabathi nokuba ubungqina obunjalo buya kuhlala busisikhumbuzo kuzuko lukaThixo esingasokuze sitshatyalaliswe. Nina njengabalungiseleli abamiselweyo niya kuthembela ngokuzeleyo kOsenyangweni, nisazi ukuba uya kunalathisa aze anikhokele ngalo lonke ixesha nifuna oko, yaye niya kukwazi nokuba ukwanguThixo wentsikelelo.”a

Kwiminyaka engama-50 kamva, iSikoko saseGiliyadi sisaqhubeka ngamandla! Abo baphumeleleyo kwiklasi yama-94 ngoku banelungelo lokulandela abo baphumelelayo ngaphambi kwabo abangaphezu kwama-6 500. Kwanga bangathembela ngokuzeleyo kOsenyangweni njengoko besenza indima yabo ekufumbeni ‘imfumba yongqina’ eya kuhlala isisikhumbuzo ukuze kuzukiswe uYehova uThixo.

[Umbhalo osemazantsi]

[Ibhokisi ekwiphepha 25]

Amanani Abafundi

Isimbuku senani labafundi: 48

Inani lamazwe abawameleyo: 5

Inani lamazwe ababelwe kuwo: 17

Umlinganiselo weminyaka yabo: 32

Umlinganiselo weminyaka besenyanisweni: 15,3

Umlinganiselo weminyaka bekwinkonzo yexesha elizeleyo: 9,6

[Ibhokisi ekwiphepha 26, 27]

UKUKHANGELA EMVA KWIMINYAKA ENGAMA-50 YESIKOLO SASEGILIYADI

Yiyiphi enye indlela elunge ngakumbi yokukhangela emva kwimbali yeGiliyadi ngaphandle kwamava abo babephila apho—abo baphumelelayo mandulo, abayaleli, kunye nabanye abancedayo ekusilungiseleleni? Abaphulaphuli bachwayita njengoko babephulapule inxalenye ethi “Ukukhangela Emva Kwiminyaka Engama-50 Yesikolo SaseGiliyadi,” eyayiqhutywa nguTheodore Jaracz.

Yintoni eyabangela kumiselwe esi sikolo? Umzalwana uSchroeder wachaza ukuba yena nabanye abalungiseleli ababini banikwa nje iinyanga ezine zokuba balungiselele isikolo. “Kodwa ngoMvulo, ngoFebruwari 1, 1943, sasilungele unikezelo.”

Kwakunjani ukuba ngabavangeli basemazweni bokuqala abathunyelwayo? UMzalwana uHenschel wakhumbula oku: “Salungiselela ukuba isebe lokuthumela loMbutho lifake ezibhokisini zonke izinto ababefuna ukuhamba nazo. Xa zafikayo iibhokisi, bazivula ngenyameko baza bathatha izinto zabo. Kodwa ke emva koko basebenzisa ezo bhokisi ekwenzeni ifanitshala.” Ekugqibeleni wachaza ukuba, uMbutho walungiselela amakhaya abavangeli basemazweni afanelekileyo.

Ngokulandelayo kolo kucwangciso, abanye abaphumelela kwiiklasi zaseGiliyadi zangaphambili ngoku abangamalungu entsapho yaseBheteli yaseUnited States babalisa ngezinto ababezikhumbula, iimvakalelo zabo, kunye namava abo. Enyanisweni amagqabaza abo azichukumisa iintliziyo zabo bonke ababekho.

“Emva kokufumana isimemo sokuya kwiklasi yokuqala, ndeva ukuba umama wayenomhlaza. Kodwa ekubeni wayenguvulindlela ukususela kubudala beminyaka eli-16 ukusa phambili, wandicebisa ukuba ndisamkele isimemo. Ngoko ndithatha ndibeka yaye ndinentembelo kuYehova, ndaya eMzantsi Lansing. Ndalunandipha ngokuzeleyo ndaza ndaluxabisa ngokunzulu uqeqesho lwaseGiliyadi. Umama waligqiba ikhondo lakhe lasemhlabeni emva kokuba ndiphumelele.”—NguCharlotte Schroeder, owakhonza eMexico nase-El Salvador.

“Ekubeni uYehova wayesele endinyamekele kwinxalenye yomhlaba endandikuyo, ndagqiba kwelokuba naphi na apho ndandinokuya khona kwakusesemhlabeni yaye wayenokundinyamekela. Ngoko ndakuvuyela ukwamkela isimemo sokuya kwiklasi yokuqala.”—NguJulia Wildman, owakhonza eMexico nase-El Salvador.

“Kwakuvuyisa ngokumangalisayo! Sasithetha kuyo yonke iminyango. Kwinyanga yokuqala, ndahambisa iincwadi ezili-107 ndaza ndaqhuba izifundo zeBhayibhile ezili-19. Kwinyanga yesibini ndandinezifundo zeBhayibhile ezingama-28. Eneneni, zazikhona izinto ekwakufuneka siqhelane nazo—ubushushu, ukufuma, izinambuzane. Kodwa kwakulilungelo elimangalisayo ukuba lapho. Yinto endiya kuhlala ndiyixabisa.”—NguMary Adams, owaphumelela kwiklasi yesibini, ebhekisela kwisabelo sakhe saseCuba.

“Imozulu yayisesinye sezona ziphazamiso zikhulu ekwafuneka sizinyamezele eAlaska. Emantla, kwakubanda ngolona hlobo, amaqondo obushushu ayengamaqondo [angama-50 ngaphantsi kuka-0 ngokukaCelsius] kubanda nangaphezulu. Iidolophana ezazihlala amaIndiya neendawana ezincinane ezazisecaleni kumzantsi mpuma weAlaska zazifikelelwa ngephenyane okanye ngenqwelo-moya.”—NguJohn Errichetti, owaphumelela kwiklasi yesithathu.

“Kum iGiliyadi yayisisimemo esivela kuYehova ngentlangano yakhe esemhlabeni ukuze isomeleze ngokomoya ize isibonise indlela ebalaseleyo yobomi.”—NguMildred Barr, owaphumelela kwiklasi ye-11, owayekhonza eIreland.

Kwalandela udliwano ndlebe oluvuyisayo—uLucille Henschel (owaphumelela kwiklasi ye-14, owayekhonza eVenezuela), uMargareta Klein (owaphumelela kwiklasi yama-20 owayekhonza eBolivia), uLucille Coultrup (owaphumelela kwiklasi yama-24, owayekhonza ePeru), uLorraine Wallen (owaphumelela kwiklasi yama-27, owayekhonza eBrazil), UWilliam noSandra Malenfant (abaphumelela kwiklasi yama-34, abakhonza eMorocco), uGerrit Lösch (owaphumelela kwiklasi yama-41, wakhonza eAustria), noDavid Splane (owaphumelala kwiklasi yama-42, owakhonza eSenegal).

Kuthekani ngabazalwana abakhonza njengabayaleli? Uninzi lwabo nalo kwenziwa udliwano ndlebe nalo—uRussell Kurzen, uKarl Adams, uHarold Jackson, uFred Rusk, uHarry Peloyan, uJack Redford, noUlysses Glass. Bakugqala njengelungelo labo, baza bavakalisa indlela elibachaphazele ngayo kude kube namhla.

Ubungqina obuvuyisayo bempumelelo yabavangeli basemazweni abaqeqeshwe eGiliyadi banikelwa nguLloyd Barry, owakhonza eJapan. Ngowe-1949, xa abavangeli basemazweni abali-15 bathunyelwa apho, kwakukho abavakalisi abambalwa kuneshumi kuyo yonke iJapan. Kodwa kwiminyaka engama-44 kamva, kwakukho abavakalisi boBukumkani abangaphezu kwe-175-000 kwelo lizwe! Wandula uRobert Wallen wachaza ngempumelelo engummangaliso abanye babavangeli basemazweni abaye banayo ekuncedeni abantu ukuba bangene enyanisweni, kuquka nomnye udade ongomvangeli wasemazweni owayesePanama iminyaka engaphezu kwama-45 noye wanceda abantu abali-125 bada bazahlulela baza babhaptizwa.

Uvutho-ndaba lwalo lonke ucwangciso lwafikelelwa xa kwacelwa bonke abaphulaphuli ababephumelele eGiliyadi ukuba beze eqongeni. Yayisisihlandlo esichukumisayo ngenene. Umngcelele wabazalwana noodade bethe chu—ama-89 entsapho yaseBheteli ukongezelela kwabaphumeleleyo ababeziindwendwe—behla ngendlela ephakathi kwezihlalo benyuka baya eqongeni. Bathelelwa ngabazalwana ababekhonze njengabayaleli kwiminyaka edluleyo, nayiklasi yama-94—malunga ne-160 bebonke!

Umzalwana uJaracz wabuza, “Ngaba umsebenzi weSikolo saseGiliyadi wokuqeqesha abavangeli basemazweni ukuba baye kumazwe asemzini uye wanempumelelo ethile? Ubungqina beminyaka engama-50 edluleyo bunguewe omkhulu!”

[Umfanekiso okwiphepha 25]

Abapelele Kwiklasi Yama-94 YeSikolo SeBhayibhile SeWatchtower SaseGiliyadi

Kuludwe olungezantsi, kubalwa ukuska kwabemi kuluhlu olungaphambili ukuya kwabangasemva, yaye amagama adweliswe ukusuka ngasekhohlo ukuya ngasekunene kuluhlu ngalunye.

(1) De La Garza, C.; Borg, E.; Arriaga, E.; Chooh, E.; Purves, D.; Fosberry, A.; Delgado, A.; Drescher, L. (2) Scott, V.; Fridlund, L.; Kettula, S.; Copeland, D.; Arriaga, J.; Thidé, J.; Olsson, E.; Widegren, S. (3) Delgado, F.; Keegan, S.; Leinonen, A.; Finnigan, E.; Fosberry, F.; Halbrook, J.; Berglund, A.; Jones, P. (4) Watson, B.; Frias, C.; Chooh, B.; Halbrook, J.; Purves, J.; Finnigan, S.; Jones, A.; Cuccia, M. (5) Scott, G.; Copeland, D.; Drescher, B.; De La Garza, R.; Leinonen, I.; Keegan, D.; Watson, T.; Kettula, M. (6) Widegren, J.; Borg, S.; Cuccia, L.; Berglund, A.; Olsson, B.; Frias, J.; Fridlund, T.; Thidé, P.