Oonyana Bomntu Omnye Ababa Nesimo Sengqondo Esingafaniyo

IZIGQIBO ezenziwa ngabazali ngokuqinisekileyo ziyabachaphazela abantwana babo. Oku kunjalo nanamhlanje njengokuba kwakunjalo kumyezo wase-Eden. Ikhondo lemvukelo lika-Adam noEva laluchaphazela ngokunzulu uluntu luphela. (Genesis 2:15, 16; 3:1-6; Roma 5:12) Ukanti, ngamnye kuthi unethuba lokuzakhela ulwalamano oluhle noMdali wethu ukuba sikhetha ukwenjenjalo. Umzekelo woku siwufumana kwingxelo kaKayin noAbheli, oonyana bokuqala abazalwa ngumntu omnye kwimbali yoluntu.

Akukho ngxelo yeZibhalo ebonisa ukuba uThixo wathetha noAdam noEva emva kokugxothwa kwabo e-Eden. Sekunjalo, uYehova akazange ayeke ukunxibelelana noonyana babo. Ngokungathandabuzekiyo, uKayin noAbheli bafunda isifundo koko kwakwenzeke kubazali babo. Babenokuzibona ‘iikherubhi nencakuba yekrele enelangatye nejikajikayo eyayiqhubeka ilinde indlela eya emthini wobomi.’ (Genesis 3:24) Kwakhona la madoda abubona ubunyaniso bamazwi awathethwa nguThixo okuba ukuze umntu aphile kwakuya kufuneka abile esoma aze atyhubele kwiintlungu ezininzi.—Genesis 3:16, 19.

UKayin noAbheli bamele ukuba babewaqonda amazwi awathethwa nguYehova kwinyoka, athi: “Ndiya kubeka ubutshaba phakathi kwakho nomfazi naphakathi kwembewu yakho nembewu yakhe. Yona iya kukutyumza intloko uze wena uyityumze isithende.” (Genesis 3:15) Oko babekwazi uKayin noAbheli ngoYehova kwakunokubenza bakwazi ukuhlakulela ukuba nobuhlobo obuhle naye.

Ukucinga ngesiprofeto sikaYehova nangeempawu zakhe njengoMncedi onothando kumele ukuba kwenza uKayin noAbheli banomnqweno wokuzuza inkoliseko kaThixo. Kodwa babeza kuwuhlakulela ukusa kuwuphi umkhamo loo mnqweno? Ngaba babeza kwenza ngokuvisisana nomnqweno wabo wemvelo wokunqula uThixo baze bakhulise uxabiso lwabo ngezinto zokomoya ukusa kwinqanaba lokuba babonakalise ukholo kuye?—Mateyu 5:3.

Oonyana Bomntu Omnye Bazisa Iminikelo

Ekuhambeni kwexesha, uKayin noAbheli bazisa iminikelo kuThixo. UKayin wazisa iziqhamo zomhlaba yaye uAbheli wanikela ngamazibulo omhlambi wakhe. (Genesis 4:3, 4) Ngelo xesha, kusenokwenzeka ukuba la madoda ayeneminyaka emalunga ne-100 ubudala, kuba uAdam wayeneminyaka eli-130 ukuzala kwakhe unyana wakhe, uSete.—Genesis 4:25; 5:3.

Iminikelo yabo yayibonisa ukuba uKayin noAbheli babeziqonda ukuba banesono yaye babenqwenela ukuzuza inkoliseko kaThixo. Kusenokwenzeka ukuba babecinga ngesithembiso sikaYehova ngokuphathelele inyoka neMbewu yomfazi. Alichazwanga ixesha abalichithayo nomgudu abawenzayo uKayin noAbheli ekuhlakuleleni ulwalamano oluhle noYehova. Kodwa indlela awasabela ngayo uThixo kwiminikelo yabo ityhila oko kwakucingwa nguye ngamnye wabo.

Abanye abaphengululi babonisa ukuba uEva wayemgqala uKayin ‘njengembewu’ eyayiza kutshabalalisa inyoka, kuba ekuzaleni kwakhe uKayin wathi: “Ndivelise umntu ngoncedo lukaYehova.” (Genesis 4:1) Ukuba uKayin wayekholelwa ngendlela efanayo, wayephazama kakhulu. Kwelinye icala, uAbheli wayeqhutywa lukholo xa wayesenza umnikelo wakhe. Ngaloo ndlela, “ngokholo uAbheli wanikela kuThixo umbingelelo oxabiso likhulu ngakumbi kunokaKayin.”—Hebhere 11:4.

Ukuqonda kuka-Abheli izinto zokomoya nokungaziqondi kukaKayin kwakungekuphela komahluko phakathi kwabo. Nesimo sabo sengqondo sasahlukile. Ngako ke, “ngoxa ke uYehova wambabalayo uAbheli nomnikelo wakhe, akazange ambabale uKayin nomnikelo wakhe.” Kusenokwenzeka ukuba uKayin akazange acingisise ngokunzulu ngomnikelo wakhe, wayedlulisela nje usana kunina xa wayewunikela. Kodwa uThixo akazange akholiswe lunqulo lwenkwalambisa. UKayin waba nentliziyo engendawo, yaye uYehova waphawula ukuba uneentshukumisa ezimbi. Indlela awasabela ngayo uKayin xa umnikelo wakhe ungazange wamkelwe yatyhila esona simo sengqondo wayenaso. Kunokuba afune ukulungisa izinto, “uKayin wavutha kakhulu ngumsindo, wakhangeleka ethe khunubembe.” (Genesis 4:5) Indlela awaziphatha ngayo yabonisa ukuba wayeneengcamango neenjongo ezingendawo.

Indlela Awasabela Ngayo Xa Elunyukiswa

Esazi isimo sengqondo sikaKayin, uThixo wamluleka, wathi: “Kutheni uvutha ngumsindo nje yaye kutheni ukhangeleka uthe khunubembe? Ukuba uyaguquka wenze okulungileyo, akusayi kuphakanyiswa yini na? Kodwa ukuba akuguquki wenze okulungileyo, isono sibuthumile ngasesangweni, sikhanuka wena; yaye ngaba wena uya kusongamela na?”—Genesis 4:4-7.

Ikho into esinokuyifunda koku. Eneneni, isono sibuthume emnyango, silindele ukusitshabalalisa. Ukanti, uThixo usinike inkululeko yokuzikhethela, yaye sinako ukuzikhethela ukwenza okulungileyo. UYehova wabongoza uKayin ukuba ‘aguquke enze okulungileyo,’ kodwa akazange amnyanzele ukuba aguquke. UKayin wazikhethela eyakhe indlela.

Ingxelo ephefumlelweyo ihlabela mgama isithi: “Emva koko uKayin wathi kuAbheli umntakwabo: ‘Masiye endle.’ Kwathi ke ngoxa babesendle wasuka uKayin wamhlasela uAbheli umntakwabo waza wambulala.” (Genesis 4:8) Ngaloo ndlela, uKayin akazange athobele, waba ngumbulali ongenamfesane. Akazange azisole nakancinane xa uYehova wambuza wathi: “Uphi na uAbheli umntakwenu?” Kunoko, ngendlela ebonakalisa ukuqaqadeka, uKayin waphendula wathi: “Andazi. Ndingumlindi womntakwethu yini na?” (Genesis 4:9) Ubuxoki obuphandle ngolo hlobo nokukhanyela kwabonakalisa ukungabi namfesane kukaKayin.

UYehova wamqalekisa uKayin waza wamgxotha e-Eden. Kuyabonakala ukuba isiqalekiso esasisele senziwe ngokuphathelele umhlaba sasiza kuba qatha ngakumbi kuKayin, yaye umhlaba wawungayi kuba namveliso xa ewulima. Wayeza kuphila njengesibhadubhadu nembacu emhlabeni. Ukukhalaza kukaKayin ngenxa yokuba qatha kwesigwebo awasifumanayo ngokubulala kwakhe umntakwabo kwakubonisa ukuba wayexhalabele ukuba wayeza kufumana impindezelo ngenxa yoko, kodwa akazange aguquke ngokunyanisekileyo. UYehova wammisela “umqondiso” uKayin—mhlawumbi umyalelo obalulekileyo owawusaziwa yaye uthotyelwa ngabanye owawumiselwe ngenjongo yokumkhusela ukuba kungabikho bani uya kumbulala ngenjongo yokuphindezela.—Genesis 4:10-15.

Ngoko, uKayin “wemka ebusweni bukaYehova waza wahlala kwilizwe leeMbacu ngasempuma ye-Eden.” (Genesis 4:16) Ekubeni wayezithabathele umfazi phakathi koodade wabo okanye abatshana bakhe, wakha isixeko awasithiya ngoEnoki, izibulo lakhe. ULameki owayeyinzala kaKayin waba nogonyamelo njengokhokho wakhe owayengamhloneli uThixo. Kodwa umnombo wenzala kaKayin watshatyalaliswa ngoMkhukula womhla kaNowa.—Genesis 4:17-24.

Oko Sikufundayo

Ikho into esinokuyifunda kwingxelo kaKayin noAbheli. Umpostile uYohane ubongoza amaKristu ukuba athandane, ‘angabi njengoKayin, owaphuma kulowo ungendawo waza wambulala ngogonyamelo umntakwabo.’ ‘Imisebenzi kaKayin yayingendawo, kodwa yona eyomntakwabo yayiyeyobulungisa.’ UYohane uphinda athi: “Lowo umthiyileyo umzalwana wakhe usisibulala-mntu, yaye niyazi ukuba akukho sibulala-mntu sinobomi obungunaphakade obuhleliyo kuso.” Ewe, indlela esiwaphatha ngayo amanye amaKristu iyaluchaphazela ulwalamano lwethu noThixo namathemba esinawo ngokuphathelele ikamva. Asinakuze sithiye naliphi na elinye ikholwa size sizuze inkoliseko kaThixo.—1 Yohane 3:11-15; 4:20.

UKayin noAbheli bamele ukuba babekhuliswe ngendlela efanayo, kodwa uKayin wayengenalukholo kuThixo. Eneneni, wabonakalisa umoya kaMtyholi, ‘isibulala-mntu santlandlolo noyise wabo bonke ubuxoki.’ (Yohane 8:44) Ikhondo elathatyathwa nguKayin libonisa ukuba sonke sinako ukuzikhethela, abo bakhetha ukona bazahlukanisa noThixo, nokuba uYehova uyabagweba abo bangaguqukiyo.

Kwelinye icala, uAbheli wabonakalisa ukholo kuYehova. Eneneni, “ngokholo uAbheli wanikela kuThixo umbingelelo oxabiso likhulu ngakumbi kunokaKayin, kholo olo awathi ngalo wangqinelwa ukuba ulilungisa, uThixo enikela ubungqina ngokuphathelele izipho zakhe.” Nangona kungekho nalinye ilizwi elathethwa nguAbheli eZibhalweni, ngokholo lwakhe olungumzekelo “usathetha.”—Hebhere 11:4.

UAbheli wayengowokuqala kubagcini bengqibelelo abaninzi. Igazi lakhe, ‘eladanduluka kuYehova emhlabeni,’ alikalityalwa. (Genesis 4:10; Luka 11:48-51) Ukuba siqhelisela ukholo njengoAbheli, nathi sinokunandipha ulwalamano oluxabisekileyo noluhlala luhleli noYehova.

[Ibhokisi ekwiphepha 22]

UMLIMI NOMALUSI

Ukulima umhlaba nokunyamekela izilwanyana yeminye yemisebenzi eyanikwa uAdam nguThixo ntlandlolo. (Genesis 1:28; 2:15; 3:23) UKayin unyana wakhe waba ngumlimi, yaye uAbheli waba ngumalusi. (Genesis 4:2) Noko ke, ekubeni uluntu lwalusitya iziqhamo nemifuno de kwasemva koMkhukula, yintoni eyayibangela kufuywe izimvu?—Genesis 1:29; 9:3, 4.

Ukuze zityebe, izimvu zifuna ukunyanyekelwa ngumntu. Umsebenzi owawusenziwa nguAbheli ungqina ukuba kususela ekuqaleni umntu wayefuye ezi zilwanyana zasekhaya. IZibhalo azichazi enoba abantu bokuqala babelusebenzisa ubisi lwezilwanyana kusini na, kodwa nabantu abatya imifuno banokubusebenzisa uboya bemvu. Yaye xa izimvu zisifa, izikhumba zazo ziyasetyenziswa. Ngokomzekelo, ukuze anxibise uAdam noEva, uYehova wabenzela “izambatho ezinde zezintsu.”—Genesis 3:21.

Enoba kuyintoni na, kubonakala kusengqiqweni ukucinga ukuba ekuqaleni uKayin noAbheli babesebenzisana. Babevelisa izinto ezaziyimfuneko ukuze intsapho inxibe yaye yondleke.

[Umfanekiso okwiphepha 23]

‘Imisebenzi kaKayin yayingendawo, kodwa yona eyomntakwabo yayiyeyobulungisa’