“Unoyolo Umntu Ofumene Ubulumko”

WAYEYIMBONGI, eligcisa lokwakha, engukumkani. Ekubeni wayefumana umvuzo osisi-1,5 samawaka ezigidi zeerandi ngonyaka, wayesisityebi kunaye nawuphi na omnye ukumkani emhlabeni. Le ndoda yayisaziwa nangobulumko eyayinabo. Ukumkanikazi owayetyelele wachukumiseka kangangokuba wadanduluka esithi: “Khangela! andixelelwanga nesiqingatha esi. Ugqwesile ngobulumko nempumelelo kwizinto eziviweyo endiye ndaziphulaphula.” (1 Kumkani 10:4-9) Eso ke yayisisikhundla sikaKumkani uSolomon kaSirayeli wamandulo.

USolomon wayenobutyebi nobulumko. Yaye oko kwamenza wakufanelekela ngokukhethekileyo ukukhetha okona kubaluleke ngokwenene phakathi kwezi zinto zimbini. Wabhala esithi: “Unoyolo umntu ofumene ubulumko, nomntu ozuze ukuqonda, kuba inzuzo yabo ilunge ngakumbi kunenzuzo yesilivere nemveliso yabo kunegolide. Buxabiseke ngakumbi kuneekorale, nazo zonke ezinye izinto oyoliswa zizo azinakulinganiswa nabo.”—IMizekeliso 3:13-15.

Noko ke, bunokufunyanwa phi obu bulumko? Kutheni buxabiseke ngakumbi kunobutyebi? Ziziphi izinto ezenza bube nomtsalane? Isahluko 8 sencwadi yeBhayibhile yeMizekeliso, eyabhalwa nguSolomon, siyayiphendula le mibuzo ngendlela ebangel’ umdla. Apho ubulumko bumntwisiwe, ngokungathi buyakwazi ukuthetha nokwenza. Yaye ubulumko buzichaza ngokwabo indlela obunomtsalane nobuxabiseke ngayo.

“Budanduluka Kakhulu”

Isahluko 8 seMizekeliso siqala ngombuzo-buciko othi: “Abumemezi na ubulumko, nokuqonda akulivakalisi na ilizwi lako?”a Ewe, ubulumko nokuqonda buyamemeza, kodwa ngokungafaniyo nomfazi oziphethe kakubi oncathama kwiindawo ezimnyama aze asebezele umfana oyinkom’ edla yodwa nongenamava emlukuhla. (IMizekeliso 7:12) “Buzimisa phezulu, ekudibaneni komendo, kwiindawo eziphakamileyo. Ecaleni kwamasango, emasangweni edolophu, ekungeneni emasangweni budanduluka kakhulu.” (IMizekeliso 8:1-3) Ilizwi lobulumko elibukhali liviwa ngokucacileyo kwiindawo zembutho—emasangweni, ekudibaneni komendo, ekungeneni emasangweni esixeko. Abantu banokuliva ngokulula elo lizwi baze basabele.

Ngubani onokulikhanyela elokuba ubulumko bobuthixo ekuthethwa ngabo kwiLizwi likaThixo eliphefumlelweyo, iBhayibhile, buyafumaneka phantse kuye nabani na apha emhlabeni onqwenela ukubufumana? IThe World Book Encyclopedia ithi: “IBhayibhile yeyona ncwadi iye yafundwa ngokubanzi embalini.” Yongezelela isithi: “Kuye kwasasazwa imibhalo yeBhayibhile emininzi ukudlula nayiphi na enye incwadi. Kanjalo, iBhayibhile iye yaguqulelwa izihlandlo ezininzi, nakwiilwimi ezininzi ukudlula nayiphi na enye incwadi.” Ekubeni iBhayibhile epheleleyo okanye iinxalenye zayo zifumaneka ngeelwimi ezingaphezu kwama-2 100, abantu abangaphezu kwama-90 ekhulwini bayakwazi ukufunda iLizwi likaThixo ngolwimi lwabo.

AmaNgqina kaYehova avakalisa ekuhleni isigidimi seBhayibhile kuyo yonke indawo. Kumazwe angama-235, ashumayela iindaba ezilungileyo zoBukumkani bukaThixo ngenkuthalo yaye afundisa abantu iinyaniso ezifumaneka eLizwini likaThixo. Oolindixesha bawo abasekelwe eBhayibhileni IMboniselo, epapashwa ngeelwimi ezingaphezu kwe-140, noVukani!, oshicilelwa ngeelwimi ezimalunga nama-83, basasazwa ngomlinganiselo wezigidi ezingaphezu kwama-20 emnye. Ngokuqinisekileyo ubulumko buyadanduluka kwiindawo zikawonke-wonke!

“Ilizwi Lam Lisingiswa Koonyana Babantu”

Ubulumko obumntwisiweyo buqalisa ukuthetha, busithi: “Kuni, madoda, ndiyabiza, yaye ilizwi lam lisingiswa koonyana babantu. Owu nina bangenamava, buqondeni ubuqili; nani baziziyatha, yiqondeni intliziyo.”—IMizekeliso 8:4, 5.

Ubulumko bubiza uluntu luphela. Bumema uluntu lonke. Kwanabo bangenamava bamenyelwa ukuba bafumane ubuqili, okanye ubulumko, yaye abaziziyatha bamenyelwa ukuba bafumane ukuqonda. Eneneni, amaNgqina kaYehova akholelwa ukuba iBhayibhile yincwadi yabantu bonke yaye azabalazela ukukhuthaza wonk’ ubani adibana naye ukuba ayihlolisise aze afumane amazwi obulumko ewaquletheyo.

“Inkalakahla Yam Ithetha Inyaniso”

Bubonisa indlela obunomtsalane ngayo, ubulumko buyaqhubeka busithi: “Phulaphulani, ngokuba ndithetha izinto ezibalaseleyo, nokuvula imilebe yam kuthe tye. Ngokuba inkalakahla yam ithetha inyaniso ngesandi esiphantsi; nobungendawo buyinto ecekisekayo emilebeni yam. Onke amazwi omlomo wam abubulungisa. Phakathi kwawo akukho nto ijijekileyo okanye igwenxa.” Ewe, iimfundiso zobulumko zibalasele yaye zithe tye, ziyinyaniso nobulungisa. Akukho nto iyinkohliso okanye igwenxa kuzo. “Onke acacile koqondayo, yaye athe tye kwabo bafumana ukwazi.”—IMizekeliso 8:6-9.

Ngokufanelekileyo, ubulumko buyabongoza busithi: “Thabathani ingqeqesho yam kunesilivere, nokwazi kunegolide.” Esi sibongozo sisengqiqweni, “ngokuba ubulumko bulunge ngakumbi kuneekorale, nazo zonke ezinye izinto eziyolisayo azinakulinganiswa nabo.” (IMizekeliso 8:10, 11) Kodwa ngoba? Yintoni eyenza ubulumko buxabiseke ngaphezu kobutyebi?

“Isiqhamo Sam Silunge Ngakumbi Kunegolide”

Izipho zobulumko ezifunyanwa ngulowo ubuphulaphulayo zixabiseke ngaphezu kwegolide, isilivere okanye iikorale. Buchaza ezi zipho, ubulumko buthi: “Mna, bulumko, ndihleli nobuqili ndaza ndafumana kwanolwazi lwamandla okucinga. Ukoyika uYehova kuthetha ukuthiya okubi. Ukuziphakamisa nekratshi nendlela embi nomlomo onobugwenxa ndikuthiyile.”—IMizekeliso 8:12, 13.

Ubulumko bumnika ubuqili namandla okucinga lowo unabo. Umntu onobulumko bobuthixo uyamoyika uThixo, kuba “ukoyika uYehova kukuqala kobulumko.” (IMizekeliso 9:10) Ngenxa yoko, ukuthiyile oko uYehova akuthiyileyo. Ukuziphakamisa, ikratshi, ukuziphatha okubi nentetho egwenxa ayifumaneki kuye. Ukuthiya kwakhe oko kubi kuyamkhusela kwimiphumo eyonakalisayo yokusetyenziswa kakubi kwegunya. Hayi indlela ekubaluleke ngayo ukuba abo bakwizikhundla zembopheleleko kumabandla obuKristu, kunye neentloko-ntsapho, bafune ubulumko!

Ubulumko buhlabela mgama busithi: “Ndinecebo nobulumko bobuqili. Mna—ndinokuqonda; ndinamandla. Ookumkani balawula ngam, namagosa aphakamileyo amisela ubulungisa. Iinkosana zilawula ngam njengeenkosana, nazo zonke izidwangube zigweba ngobulungisa.” (IMizekeliso 8:14-16) Isiqhamo sobulumko siquka ukuqonda namandla—oothunywashe abayimfuneko kakhulu kubalawuli, amagosa aphakamileyo nezidwangube. Ubulumko bubalulekile kwabo basemagunyeni nakwabo baluleka abanye.

Ubulumko bokwenene buyafumaneka kubantu bonke, kodwa asingabo bonke ababufumanayo. Abanye bayabugatya okanye bayabuphepha, kwanokuba sele buphambi kwabo. Ubulumko buthi: “Abo bandithandayo ndiyabathanda nam, nabo bandifunayo bayandifumana.” (IMizekeliso 8:17) Ubulumko buyafumaneka kwabo babufuna ngokunyanisekileyo.

Iindlela zobulumko zithe tye yaye zibubulungisa. Buyabazuzisa ababufunayo. Ubulumko buthi: ‘Ubutyebi nozuko zezam, lilifa lezinto ezixabisekileyo nobulungisa. Isiqhamo sam silunge ngakumbi kunegolide, kwanangaphezu kwegolide esulungekileyo, nemveliso yam ngaphezu kwesilivere esulungekileyo. Ndihamba kumendo wobulungisa, phakathi kwiindlela zomgwebo, ukuze abo bandithandayo ndibadlise ilifa; ndize ndibagcine bezele oovimba babo.’—IMizekeliso 8:18-21.

Ukongezelela kwezo mpawu zibalaseleyo njengobuqili, amandla okucinga, ukuthobeka, nokuqonda, ezinye izipho zobulumko ziquka ubutyebi nembeko. Umntu olumkileyo unokuzuza ubutyebi ngeendlela zobulungisa, yaye uya kuphumelela ngokomoya. (3 Yohane 2) Ubulumko bumzisela imbeko umntu. Ngapha koko, ufumana ulwaneliseko ngoko akuzuzayo, yaye uba noxolo lwengqondo nesazela esicocekileyo kuThixo. Ewe, unoyolo umntu ozuze ubulumko. Eneneni, isiqhamo sobulumko silunge ngakumbi kunegolide nesilivere esulungekileyo.

Hayi indlela elifaneleke ngayo eli cebiso kuthi, ekubeni siphila kwihlabathi elithanda izinto eziphathekayo apho kugxininiswa ekufumaneni ubutyebi nokuba kungayiphi na indlela! Ngamana singangaze silahlekelwe ngumbono wendlela obuxabiseke ngayo ubulumko size sibhenele kwiindlela zokufumana ubutyebi ezingezozabulungisa. Masingaze siwatyeshele amalungiselelo asinika ubulumko—iintlanganiso zethu zamaKristu nofundisiso lwethu lobuqu lweBhayibhile kunye neempapasho ezilungiselelwe ‘likhoboka elithembekileyo neliyingqondi’—ngenxa nje yokufuna ukuzuza ubutyebi.—Mateyu 24:45-47.

“Ndamiswa Ukususela Kwixesha Elingenammiselo”

Ubulumko obumntwisiweyo obufumaneka kwisahluko 8 seMizekeliso abuyondlela nje yokuchaza iinkalo zolu phawu. Ngendlela efuziselayo bubhekisela kweyona ndalo kaYehova ibalulekileyo. Ubulumko buhlabela mgama busithi: “UYehova wandivelisa njengentlahlela yendlela yakhe, oyena ungaphambili kwizinto awazifezayo kwakudala. Ndamiswa ukususela kwixesha elingenammiselo, ukususela ekuqaleni, ukususela kumaxesha angaphambi komhlaba. Engekabikho amanzi anzongonzongo ndazalwa ngenimba, ingekabikho imithombo enamanzi amaninzi. Ngaphambi kokuzinziswa kweentaba, ngaphambi kweenduli, ndazalwa ngenimba, engekawenzi umhlaba nezithuba ezivulekileyo nenxalenye yokuqala yothuli yelizwe elinemveliso.”—IMizekeliso 8:22-26.

Hayi indlela le nkcazelo ingasentla yobulumko obumntwisiweyo efana ngayo naleyo ichazwe eZibhalweni ngokuphathelele “uLizwi”! Umpostile uYohane wabhala esithi: “Ekuqaleni wayekho uLizwi, uLizwi wayekunye noThixo, yaye uLizwi wayenguthixo.” (Yohane 1:1) Ubulumko obumntwisiweyo ngokufuziselayo bubhekisela kuNyana kaThixo, uYesu Kristu, ngaphambi kokuba aphile njengomntu.b

UYesu Kristu “izibulo kwindalo yonke; ngenxa yokuba zadalwa ngaye zonke ezinye izinto emazulwini nasemhlabeni, izinto ezibonakalayo nezinto ezingabonakaliyo.” (Kolose 1:15, 16) Ubulumko obumntwisiweyo buyaqhubeka busithi: “Ekuwalungiseni kwakhe [uYehova] amazulu ndandikho; ekumiseleni kwakhe isazinge phezu kwamanzi anzongonzongo, ekuqiniseni kwakhe iingqimba zamafu phezulu, ekomelezeni kwakhe imithombo yamanzi anzongonzongo, ekumiseleni kwakhe ulwandle ummiselo ukuba amanzi afanele angawugqithi umyalelo wakhe, ekumiseleni kwakhe iziseko zehlabathi, ngoko ndandisecaleni kwakhe njengomsebénzi onobuchule, yaye wayendithanda ngokukhethekileyo imihla ngemihla, ndichulumanca phambi kwakhe amaxesha onke, ndichulumanca kwilizwe elinemveliso lomhlaba wakhe, nezinto endazithandayo zazikoonyana babantu.” (IMizekeliso 8:27-31) UNyana kaYehova olizibulo wayesecaleni kukaYise, esebenza naye ngenkuthalo—uMdali ongenakuthelekiswa namntu wamazulu nehlabathi. Xa uYehova uThixo wadala umntu wokuqala uNyana Wakhe waba nenxaxheba kuloo msebenzi njengoMsebénzi Onobuchule. (Genesis 1:26) Akumangalisi ke ngoko ukuba uNyana kaThixo abe nomdla kangaka eluntwini yaye aluthande!

“Unoyolo Umntu Ondiphulaphulayo”

Njengobulumko bumntwisiwe, uNyana kaThixo uthi: “Ke kaloku, bonyana, ndiphulaphuleni; ewe, banoyolo abazigcinayo kanye iindlela zam. Phulaphulani ingqeqesho nize nilumke, yaye ningabonisi ukungakhathali. Unoyolo umntu ondiphulaphulayo ngokuhlala ephaphile eminyangweni yam imihla ngemihla, ngokulinda emigubasini yeminyango yam. Ngokuba ondifumanayo mna uya kufumana ubomi ngokuqinisekileyo, azuze nenkoliseko kaYehova. Kodwa lowo undiphosayo ugonyamela umphefumlo wakhe; bonke abo bandithiya kakhulu bathanda ukufa.”—IMizekeliso 8:32-36.

UYesu Kristu ububulumko bukaThixo bumntwisiwe. “Nguye uvimba wabo bonke ubuncwane bobulumko nolwazi.” (Kolose 2:3) Ngoko ke, masimphulaphule ngenyameko size silandele emanyathelweni akhe ngokusondeleyo. (1 Petros 2:21) Ukumgatya kukugonyamela umphefumlo wethu nokuthanda ukufa, kuba “akukho lusindiso kuye nabani na ongomnye.” (IZenzo 4:12) Eneneni, masimamkele uYesu njengalowo ulungiselelwe nguThixo ukuze sisindiswe. (Mateyu 20:28; Yohane 3:16) Ngaloo ndlela siya kuzuza ulonwabo olufumaneka ‘ekufumaneni ubomi nenkoliseko kaYehova.’

[Imibhalo esemazantsi]

[Imifanekiso ekwiphepha 26]

Ubulumko bubalulekile kubantu abakwizikhundla zembopheleleko

[Imifanekiso ekwiphepha 27]

Musa ukuwatyeshela amalungiselelo akunika ubulumko