Iindaba Ezilungileyo Zabantu Beentlanga Zonke

“Niya kuba ngamangqina am . . . nakwezona nxalenye zikude zomhlaba.”—IZENZO 1:8.

 1. Njengabafundisi beBhayibhile, yintoni esinikela ingqalelo kuyo, ibe kutheni sisenjenjalo nje?

ABAFUNDISI abafanelekayo abanikeli ingqalelo nje koko bakufundisayo kodwa bayinikela nakwindlela abafundisa ngayo. Njengabafundisi benyaniso yeBhayibhile nathi senjenjalo. Sinikela ingqalelo kwisigidimi esisishumayelayo nakwiindlela esizisebenzisayo. Isigidimi sethu, iindaba ezilungileyo zoBukumkani bukaThixo, asiguquki, kodwa sisebenzisa iindlela ezivumelana neemeko. Kutheni sisenjenjalo nje? Senzela ukuba sifikelele kubantu abaninzi kangangoko kunokwenzeka.

 2. Ngubani esimxelisayo xa sihlengahlengisa indlela yethu yokushumayela ukuze ivumelane neemeko?

² Xa sihlengahlengisa indlela esishumayela ngayo ukuze ivumelane neemeko, sixelisa abakhonzi bakaThixo bamandulo. Ngokomzekelo, cinga nje ngompostile uPawulos. Wathi: “KumaYuda ndaba njengomYuda . . . Kwabo bangenamthetho ndaba njengongenamthetho . . . Kwababuthathaka ndaba buthathaka, ukuze ndibazuze ababuthathaka. Ndiye ndaba zizinto zonke kubantu bazo zonke iintlobo, ukuze ngandlela zonke ndisindise abathile.” (1 Korinte 9:19-23) Ukuhlengahlengisa kukaPawulos iindlela awayezisebenzisa ukuze zivumelane neemeko kwaphumelela. Nathi sinokuphumelela ukuba sinikela ingqalelo kwiintswelo neemvakalelo zabantu esishumayela kubo size sivumelanise intshumayelo yethu neemeko zabo.

Ukusa “Eziphelweni Zomhlaba”

 3. (a) Luluphi ucelomngeni olukhoyo kumsebenzi wethu wokushumayela? (b) Azaliseka njani amazwi akuIsaya 45:22 namhlanje?

³ Olona celomngeni kwabo bashumayela iindaba ezilungileyo bubukhulu bentsimi abamele bayishumayele—“wonke umhlaba omiweyo.” (Mateyu 24:14) Kwinkulungwane edluleyo, abakhonzi abaninzi bakaYehova bazibhokoxa ukuze bafikelele kumazwe amatsha ngeendaba ezilungileyo. Yaba njani imiphumo? Kwabakho ulwando olumangalisayo ehlabathini lonke. Ekuqaleni kwenkulungwane yama-20, kwakushunyayelwa kumazwe ambalwa, kodwa ngoku amaNgqina kaYehova ashumayela kumazwe angama-235! Ngokwenene, iindaba ezilungileyo zoBukumkani zivakaliswa ‘naseziphelweni zomhlaba.’—Isaya 45:22.

4, 5. (a) Ngoobani abaye bafak’ isandla ekusasazeni iindaba ezilungileyo? (b) Ziye zathini ezinye iiofisi zamasebe ngabo bashiye amazwe abo baya kushumayela kwintsimi ephantsi kwesebe lazo?

⁴ Ibangelwa yintoni le nkqubela? Ziliqela izinto ezinegalelo. Abavangeli basemazweni abaqeqeshwe kwiSikolo seBhayibhile seWatchtower saseGiliyadi, nabo bangaphezu kwama-20 000 baphumelele kutshanje kwiSikolo Sokuqeqesha Abalungiseleli baye baba negalelo gqitha kule nkqubela. Kunjalo nangothotho lwamaNgqina aye asebenzisa ubuncwane bawo ukuze aye kufaka isandla kwezo ndawo zinentswelo engakumbi yabavakalisi boBukumkani. AmaKristu azincama ngolo hlobo—amadoda namabhinqa, aselula nakhulileyo, atshatileyo nangatshatanga—adlal’ indima ebalulekileyo ekushumayeleni isigidimi soBukumkani emhlabeni wonke. (INdumiso 110:3; Roma 10:18) Axatyiswa gqitha ngoku. Phawula oko kuye kwabhalwa ziiofisi zamasebe athile ngaloo maKristu asuke kude aya kukhonza apho kukho iintswelo engakumbi kwintsimi yalo masebe.

⁵ “La maNgqina athandekayo akhokela ekushumayeleni kwimimandla ekwanti, ancede ekusekeni amabandla amatsha aze afak’ isandla ekukhuleni kwabazalwana noodade balapha ngokomoya.” (E-Ecuador) “Ukuba amakhulu aba bazalwana balapha bavela kwamanye amazwe anokuhamba, ebeya kuchaneka gqitha amabandla. Yintsikelelo ukubakho kwabo.” (KwiDominican Republic) “Inkoliso yamabandla inoodade abaninzi, maxa wambi bade bafikelele kuma-70 ekhulwini. (INdumiso 68:11) Inkoliso yabo batsha enyanisweni, kodwa oodade abangoovulindlela abangatshatanga abavela kwamanye amazwe baluncedo ekuqeqesheni abo batsha. Aba dade bavela kwamanye amazwe basisipho sokwenene kuthi!” (Ilizwe laseMpuma Yurophu) Ngaba wakha wacinga ngokuya kukhonza kwelinye ilizwe?a—IZenzo 16:9, 10.

“Amadoda Alishumi Aphuma Kuzo Zonke Iilwimi”

 6. UZekariya 8:23 ubhekisela njani kucelomngeni lweelwimi ezininzi kumsebenzi wethu wokushumayela?

⁶ Olunye ucelomngeni yinkitha yeelwimi ezahlukahlukeneyo ezithethwa emhlabeni. ILizwi likaThixo laxela kwangaphambili ukuba: “Ngezo mini ke amadoda alishumi aphuma kuzo zonke iilwimi zeentlanga aya kubamba, ewe, okunene aya kubamba isondo lendoda engumYuda, esithi: ‘Siza kuhamba nani, kuba sivile ukuba uThixo unani.’” (Zekariya 8:23) Ukuzaliseka kwesi siprofeto namhlanje, amadoda alishumi amela isihlwele esikhulu, ekwaprofetwa ngaso kwiSityhilelo 7:9. Noko, phawula ukuba ngokutsho kwesiprofeto sikaZekariya, la “madoda alishumi” ayeza kuphuma kungekhona kwizizwe ezilishumi kodwa “kuzo zonke iilwimi zeentlanga.” Ngaba le nkalo ibalulekileyo yesi siprofeto iye yazaliseka? Ewe, kunjalo kanye.

 7. Ngawaphi amanani abonisa ukuba ngoku iindaba ezilungileyo zishunyayelwa kubantu ‘abaphuma kuzo zonke iilwimi’?

⁷ Khawuqwalasele olu balo. Kwiminyaka engama-50 edluleyo uncwadi lwethu lwalupapashwa ngeelwimi ezingama-90. Namhlanje, elo nani liye lantinga laya kutsho kuma-400. “Ikhoboka elithembekileyo neliyingqondi” lenze konke okusemandleni alo ukulungiselela iincwadi nangeelwimi ezithethwa ligcuntswana labantu. (Mateyu 24:45) Ngokomzekelo, uncwadi lweBhayibhile ngoku lufumaneka ngesi-Greenlandic (ulwimi oluthethwa ngabantu abangama-47 000), ngesiPalauan (esithethwa ngabantu abali-15 000), nangesiYapese (esithethwa yimbinana yabantu abangaphantsi kwama-7 000).

“Umnyango Omkhulu” Okhokelela Kumathuba Amatsha

8, 9. Ziziphi iinguqu eziye zasivulela “umnyango omkhulu,” ibe aye asabela njani amawaka amaNgqina?

⁸ Noko ke, kule mihla kusenokungabi yimfuneko ukuba siye kwamanye amazwe ukuze sishumayele iindaba ezilungileyo kubantu bazo zonke iilwimi. Ukufika kwezigidi zabemi basemzini kumazwe afumileyo kule minyaka, kuvelise iindawo zabaphambukeli ezithetha iilwimi ezininzi. Ngokomzekelo, eParis, eFransi kuthethwa iilwimi ezahlukeneyo ezimalunga ne-100. EToronto, eKhanada, zili-125; yaye eLondon, eNgilani zingaphezu kwama-300 iilwimi zasemzini ezithethwa apho! Obu bukho babantu abavela kwamanye amazwe kumasimi amabandla amaninzi kuvulela “umnyango omkhulu” okhokelela kumathuba amatsha okushumayela iindaba ezilungileyo kubantu bazo zonke iintlanga.—1 Korinte 16:9.

⁹ Kolu celomngeni amawaka amaNgqina asabela ngokufunda olunye ulwimi. Kunzima gqitha kwinkoliso yawo; kodwa avuyiswa kukunceda abaphambukeli neembacu zifunde inyaniso yeLizwi likaThixo. Kutshanje komnye unyaka, phantse ama-40 ekhulwini abo bonke abo baye babhaptizwa kwiindibano zesithili kwelinye ilizwe laseNtshona Yurophu bebevela kwamanye amazwe.

10. Uye wayisebenzisa njani incwadana ethi Good News for People of All Nations? (Bona ibhokisi ethi “Iimbalasane Zencwadana Ethi Good News for People of All Nations,” kwiphepha 26.)

¹⁰ Yinyaniso ukuba inkoliso yethu ayikho kwimeko eyenza ikwazi ukufunda ulwimi lwasemzini. Nalapho, singaba nenxaxheba ekuncedeni abemi basemzini ngokusebenzisa kakuhle incwadana esandul’ ukukhululwa ethi Good News for People of All Nations,b equlethe isigidimi seBhayibhile esibangel’ umdla ngeelwimi ezininzi ezahlukahlukeneyo. (Yohane 4:37) Ngaba uyayisebenzisa le ncwadana kubulungiseleli?

Xa Abantu Bengenamdla

11. Luluphi olunye ucelomngeni oluya luxhaphaka?

¹¹ Njengoko isanda impembelelo kaSathana emhlabeni, kukho olunye ucelomngeni oluya luxhaphaka—abantu abangenamdla. Kakade ke, akusothusi oku kuba uYesu wachaza ukuba kuza kufika amaxesha anjalo. Ebhekisela kulo mhla wethu wathi: “Luya kuphola uthando lwabaninzi.” (Mateyu 24:12) Eneneni, abaninzi baphelelwe lukholo kuThixo baze bayeka nokuhlonela iBhayibhile. (2 Petros 3:3, 4) Ngenxa yoko, kwamanye amazwe bambalwa abantu abaguqukayo babe ngabafundi bakaKristu. Noko ke, oko akuthethi kuthi ulilize umsebenzi wabazalwana noodade wethu abangamaKristu abashumayela ngokuthembeka kwezo ndawo zinabantu abanjalo. (Hebhere 6:10) Kutheni ungelolize nje? Cinga nje ngoku kulandelayo.

12. Ziziphi injongo ezimbini zokushumayela kwethu?

¹² Incwadi yeVangeli kaMateyu ibalaselisa iinjongo ezimbini ezibalulekileyo zokushumayela kwethu. Eyokuqala kukuba ‘senze abafundi abantu beentlanga zonke.’ (Mateyu 28:19) Eyesibini kukuze isigidimi sethu soBukumkani sibe “bubungqina.” (Mateyu 24:14) Zombini ezi njongo zibalulekile, kodwa le yesibini ibaluleke ngokukhethekileyo. Kutheni sisitsho nje?

13, 14. (a) Yiyiphi inkalo ebalulekileyo yomqondiso wobukho bukaKristu? (b) Yintoni esimele sihlale siyikhumbula, ngakumbi ukuba sishumayela kwintsimi enabantu abangenamdla?

¹³ Umbhali weBhayibhile uMateyu usichazela ukuba abapostile bakaYesu bambuza oku: “Uya kuba yintoni na umqondiso wobukho bakho nowokupheliswa kwenkqubo yezinto?” (Mateyu 24:3) UYesu wathi enye inkalo ebalulekileyo yalo mqondiso yayiza kuba kukushunyayelwa kweendaba ezilungileyo. Ngaba wayethetha ngokwenziwa kwabafundi? Akunjalo. Wathi: “Ezi ndaba zilungileyo zobukumkani ziya kushunyayelwa kuwo wonke umhlaba omiweyo kube bubungqina kuzo zonke iintlanga.” (Mateyu 24:14) Ngoko uYesu wabonisa ukuba umsebenzi wokushumayela ngoBukumkani wawuza kuba yinkalo ebalulekileyo yalo mqondiso.

¹⁴ Ngoko ke, njengokuba sishumayela iindaba ezilungileyo zoBukumkani, simele sikhumbule ukuba enoba asisoloko siphumelela ekwenzeni abafundi, kodwa siyaphumelela ekunikeleni “ubungqina.” Enoba abantu basabela njani, bayakwazi oko sikwenzayo, ngoko siba nenxaxheba ekuzalisekiseni isiprofeto sikaYesu. (Isaya 52:7; ISityhilelo 14:6, 7) UJordy, iNgqina eliselula laseNtshona Yurophu lathi: “Ndivuyiswa nje kukwazi ukuba ndisetyenziswa nguYehova ukuzalisekisa isiprofeto esikuMateyu 24:14.” (2 Korinte 2:15-17) Umele ukuba uvakalelwa ngolo hlobo nawe.

Xa Abantu Bechasa Isigidimi Sethu

15. (a) UYesu wabalumkisa ngantoni abalandeli bakhe? (b) Yintoni esinceda sikwazi ukuqhubeka sishumayela nangona sichaswa?

¹⁵ Inkcaso iza nolunye ucelomngeni ekushunyayelweni kweendaba ezilungileyo zoBukumkani. UYesu walumkisa abalandeli bakhe wathi: ‘Niya kuthiywa ziintlanga zonke ngenxa yegama lam.’ (Mateyu 24:9) NjengamaKristu okuqala, namhlanje abalandeli bakaYesu basoloko bethiyiwe, bechaswa yaye betshutshiswa. (IZenzo 5:17, 18, 40; 2 Timoti 3:12; ISityhilelo 12:12, 17) Kwamanye amazwe, bavalwe umlomo ngoorhulumente. Sekunjalo, kuba ethobela uThixo, amaKristu okwenyaniso akuloo mazwe ayaqhubeka eshumayela iindaba ezilungileyo zoBukumkani. (Amosi 3:8; IZenzo 5:29; 1 Petros 2:21) Wona namanye amaNgqina asehlabathini, ancedwa yintoni ukuze aqhubeke esenza oko? UYehova uwomeleza ngomoya wakhe oyingcwele.—Zekariya 4:6; Efese 3:16; 2 Timoti 4:17.

16. UYesu wakubonisa njani ukuba ngumtya nethunga kokushumayela nomoya kaThixo?

¹⁶ UYesu wagxininisa ukuba ngumtya nethunga komoya kaThixo nokushumayela xa wathi kubalandeli bakhe: “Niya kwamkela amandla xa umoya oyingcwele ufika kuni, yaye niya kuba ngamangqina am . . . nakwezona nxalenye zikude zomhlaba.” (IZenzo 1:8; ISityhilelo 22:17) Ibalulekile indlela ezilandelelaniswe ngayo iziganeko ezikwesi sibhalo. Kuqala, abafundi bafumana umoya oyingcwele, baze emva koko bashumayele ehlabathini lonke. Ngumoya kaThixo kuphela onokubanceda banyamezele ekunikeleni “ubungqina kuzo zonke iintlanga.” (Mateyu 24:13, 14; Isaya 61:1, 2) Kwakufanelekile ke ukuba uYesu abhekisele kumoya oyingcwele ‘njengomncedi.’ (Yohane 15:26) Wathi umoya kaThixo uya kubafundisa uze ubakhokele abafundi bakhe.—Yohane 14:16, 26; 16:13.

17. Xa sichaswa, usinceda njani umoya oyingcwele?

¹⁷ Ziziphi indlela osinceda ngazo namhlanje umoya kaThixo xa sichaswa kumsebenzi wokushumayela iindaba ezilungileyo? Uyasomeleza uze ulwe nabo basichasayo. Umzekelo woku, unokuwubona koko kwenzeka kuKumkani uSawule.

Ukuchaswa Ngumoya KaThixo

18. (a) Yiyiphi imeko emandundu awangena kuyo uSawule? (b) Ziziphi iindlela ezasetyenziswa nguSawule ukutshutshisa uDavide?

¹⁸ USawule waqala kakuhle njengokumkani wokuqala kwaSirayeli, kodwa wayeka ukuthobela uYehova. (1 Samuweli 10:1, 24; 11:14, 15; 15:17-23) Ngenxa yoko, umoya kaThixo wayeka ukumkhusela. USawule waba lugcwabevu nxamnye noDavide, owayethanjiswe njengokumkani oza kungena ezihlangwini zakhe nowayesele exhaswa ngumoya kaThixo. (1 Samuweli 16:1, 13, 14) UDavide wayekhangeleka elixhoba elilula. Ngapha koko, wayengaphathi sixhobo ngaphandle kohadi ngoxa uSawule wayenomkhonto. Ngoxa uDavide wayesadlala uhadi ngenye imini, “wabinza ke ngomkhonto uSawule waza wathi: ‘Ndiza kumqhama nodonga uDavide!’ kodwa uDavide waphepha ukusuka phambi kwakhe, kabini.” (1 Samuweli 18:10, 11) Emva koko, uSawule wamphulaphula unyana wakhe uYonatan, umhlobo kaDavide waza wafunga wathi: “Njengoko ephila uYehova, akayi kubulawa [uDavide].” Kodwa, uSawule waphinda “wafuna ukumqhama nodonga uDavide ngomkhonto.” Noko ke, uDavide “waphepha wasuka phambi koSawule, ngokokuze umkhonto ubethe eludongeni.” UDavide wasaba, kodwa uSawule wamsukela. Ngelo xesha linzima, umoya kaThixo walwa noSawule. Walwa njani naye?—1 Samuweli 19:6, 10.

19. Umoya kaThixo wamkhusela njani uDavide?

¹⁹ UDavide wasaba waya kumprofeti uSamuweli, kodwa uSawule wathumela amadoda akhe ukuba amlande nalapho. Noko ke, ukufika kwabo kuloo ndawo wayezimele kuyo uDavide “umoya kaThixo waba phezu kwabathunywa bakaSawule, baza bona baqala ukuzenza abaprofeti.” Umoya kaThixo waba namandla phezu kwabo de balibala ngoko bakuthunyiweyo. USawule wathumela amadoda ezinye izihlandlo ezibini ukuba eze noDavide kodwa kwenzeka into enye. Ekugqibeleni, uKumkani uSawule waya ngokwakhe kuDavide, kodwa naye zange amelane nomoya kaThixo. Eneneni, umoya oyingcwele wamenza akakwazi nokuhamba “yonke loo mini nobo busuku bonke”—nto leyo eyenza uDavide wanethuba elaneleyo lokusaba.—1 Samuweli 19:20-24.

20. Sisiphi isifundo esinokusifunda xa uDavide wayetshutshiswa nguSawule?

²⁰ Le ngxelo kaSawule noDavide iqulethe isifundo esikhuthazayo sokuba: Abo batshutshisa abakhonzi bakaThixo abanakuphumelela xa bechaswa ngumoya kaThixo. (INdumiso 46:11; 125:2) Injongo kaYehova yayikukuba uDavide abe ngukumkani kwaSirayeli. Akukho namnye owayenokukujika oko. Namhlanje, injongo kaYehova kukuba “ezi ndaba zilungileyo zobukumkani ziya kushunyayelwa.” Akukho bani unokuba ngumqobo koko.—IZenzo 5:40, 42.

21. (a) Ziziphi iindlela ezisetyenziswa ngabo bachasayo namhlanje? (b) Yintoni esiqiniseke ngayo?

²¹ Ezinye iinkokeli zonqulo nezopolitiko zisebenzisa ubuxoki nogonyamelo kwiinzame zokusithintela. Kodwa njengokuba uYehova wamkhuselayo uDavide, uya kubakhusela nabantu bakhe namhlanje. (Malaki 3:6) Ngoko, njengoDavide sinokutsho ngengqiniseko sithi: “Ndikholosa ngoThixo. Andiyi koyika. Unokundenza ntoni na umntu wasemhlabeni?” (INdumiso 56:11; 121:1-8; Roma 8:31) Ngoncedo lukaYehova, kwanga singaqhubeka sisilwa lonke ucelomngeni esijamelana nalo njengoko sityhalela phambili nomsebenzi esiwunikwe nguThixo wokushumayela iindaba ezilungileyo zoBukumkani kubantu beentlanga zonke.

[Imibhalo esemazantsi]

Uyakhumbula Na?

• Kutheni sisebenzisa iindlela ezivumelana neemeko nje ekushumayeleni kwethu?

• “Umnyango omkhulu” ukhokelela kwawaphi amathuba amatsha avulekileyo?

• Yintoni efezwa ngumsebenzi wethu wokushumayela, kwanokuba abantu abanamdla kwintsimi yethu?

• Kutheni kungekho bani unokukuthintela ukushunyayelwa kweendaba ezilungileyo zoBukumkani?

[Ibhokisi ekwiphepha 22]

Ukuziva Wanelisekile

“Bonwabile yaye bavuyiswa kukukhonza uYehova ngaxhathalinye.” Leyo yindlela echazwa ngayo intsapho eyafuduka eSpeyin yaya kukhonza eBolivia. Unyana waloo ntsapho waya apho ukuze ancedise iqela labavakalisi elikwanti. Bathi bakubona indlela onwabe ngayo kwintsapho yakhe bonke abaphozisa maseko—kuquka abafana abane abasusela kwiminyaka eli-14 ukusa kwengama-25 ubudala—baya kukhonza apho. Abathathu kwaba bafana bangoovulindlela abathe ngxi, lowa wokuqala yena usandul’ ukuya kwiSikolo Sokuqeqesha Abalungiseleli.

Angelica oneminyaka engama-30 waseKhanada, okhonza eMpuma Yurophu uthi: “Zininzi izinto ezilucelomngeni, kodwa ndandanelisekile kukunceda abantu kubulungiseleli. Ndikhuthazwa nangamazwi ombulelo angapheliyo amaNgqina alapho ahlala endibulela ngokuza kuwanceda.”

Abanye oodade ababini baseUnited States nabazalwa ngumntu omnye abakwiminyaka engaphezu kwama-25 ubudala, abakhonza kwiDominican Republic bathi: “Kwakukho izithethe ezahlukahlukeneyo ekwakufuneka siqhelane nazo. Kodwa sanyamezela, ibe ngoku kubantu esifunda nabo iBhayibhile abasixhenxe sele besiya kwiintlanganiso.” Aba dade babini baba luncedo ekulungelelaniseni iqela labavakalisi boBukumkani kwidolophu ekungekho bandla kuyo.

ULaura, udade oneminyaka engaphezu kwama-25, ukhonze kwamanye amazwe ngaphezu kweminyaka emine. Uthi: “Ndilwela ukuphila ubomi obulula. Oku kunceda abavakalisi babone ukuba ukuphila ubomi obulula yinto onokuzikhethela nebonisa ukuphila engqondweni, ayithethi kuba ulihlwempu. Ukunceda abanye, ngakumbi ulutsha kundigcina ndivuya de ndingeva nobunzima bokukhonza kwelinye ilizwe. Andinakunikezela lula ngale nkonzo, ndizimisele ukuyenza logama nje uYehova evuma.”

[Ibhokisi/Umfanekiso okwiphepha 26]

Iimbalasane Zencwadana ethi Good News for People of All Nations

Kwincwadana ethi Good News for People of All Nations kukho amaphepha angama-92 ngalinye kuwo linentshumayelo yolwimi olwahlukileyo. Isigidimi sayo sibhekisa kuloo mntu usifundayo. Ngoko, xa umninimzi esifunda iba ngathi uthetha naye ngokuthe ngqo.

Kuqweqwe olungaphakathi kukho imaphu yehlabathi. Sebenzisa le maphu ukwakha ubuhlobo naloo mntu ushumayela kuye. Usenokumalathisa elo lizwe uhlala kulo uze umbonise ukuba ufuna ukwazi ilizwe avela kulo yena. Ngaloo ndlela, unokumenza akhululeke nikwazi ukuncokola kakuhle.

Kwintshayelelo yale ncwadana kuchazwa izinto eziliqela ezimele zenziwe ukuze kuncedwe abo bathetha ulwimi esingalwaziyo. Nceda ufunde la manyathelo kakuhle uze uwasebenzise.

Isiqulatho sayo asaneli nje ukuba noludwe lweelwimi ezikule ncwadana kodwa sibonisa nonobumba abamela olo lwimi. Oku kwenza kube lula ukubona amaphecana nezinye iimpapasho zethu ezishicilelwe ngezo lwimi.

[Umfanekiso]

Ngaba uyayisebenzisa le ncwadana kubulungiseleli?

[Imifanekiso ekwiphepha 23]

Iimpapasho zethu zeBhayibhile ngoku zifumaneka ngeelwimi ezingaphezu kwama-400

EGHANA

ELAPLAND (ESWEDEN)

EPHILIPPINES

[Imifanekiso ekwiphepha 24, 25]

Ngaba ungakwazi ukukhonza apho kukho intswelo engakumbi yabavakalisi boBukumkani?

E-ECUADOR

KWIDOMINICAN REPUBLIC