Wafundisa Ntoni UYesu Ngesihogo?

UYesu wathi: “Ukuba iliso lakho likwenza wone, likhuphe. Kubhetele ungene eBukumkanini bukaThixo uneliso elinye kunokuba ungene esihogweni unamehlo amabini. Apho zingafiyo iimpethu, nalapho umlilo ungacimiyo.”—Marko 9:47, 48, Contemporary English Version.

Ngesinye isihlandlo uYesu wathetha ngexesha lomgwebo apho wayeza kuthi kwabangendawo: “Mkani kum nina niqalekisiweyo, niye emlilweni ongunaphakade owalungiselelwa uMtyholi neengelosi zakhe.” Wahlabela mgama wathi aba babeza “kufumana isohlwayo sikanaphakade.”—MATEYU 25:41, 46, New American Bible.

XA UQALA ukuweva la mazwi kaYesu angasentla asenokuvakala ngathi axhasa imfundiso yesihogo somlilo. Ngokuqinisekileyo uYesu wayengafuni ukuphikisana neLizwi likaThixo elithi: “Abafileyo abazi nto kwaphela.”—INtshumayeli 9:5, NAB.

Ngoko wayebhekisela entwenini uYesu xa wathi abantu baphoswa “esihogweni somlilo”? Ngaba ‘umlilo ongunaphakade’ awayethetha ngawo uYesu yayingowokoqobo okanye yayingowokomfuziselo? Abangendawo baya ngayiphi ingqiqo ‘kwisohlwayo sikanaphakade’? Makhe sihlole ngamnye wale mibuzo.

Wayebhekisela entwenini uYesu xa wathi abantu baphoswa “esihogweni somlilo”? Igama lantlandlolo lesiGrike eliguqulelwe ngokuthi “isihogo” kuMarko 9:47 nguGeʹen·na. Eli gama lithatyathwe kwigama lesiHebhere elinguGeh Hin·nomʹ, elithetha “iNtlambo kaHinom.” INtlambo kaHinom yayingaphandle kweYerusalem yamandulo. Ngemihla yookumkani bakwaSirayeli, kwakubingelelwa kuyo ngabantwana—into awayeyicekisa kakhulu uYehova. UThixo wathi wayeza kubatshabalalisa abo babebingelela ngabantwana. Ngenxa yoko iNtlambo kaHinom yayibizwa ngokuba ‘yintlambo yokubulala,’ kulapho zaziphoswa khona “izidumbu zabantu.” (Yeremiya 7:30-34, King James Version) UYehova waxela kwangaphambili ukuba iNtlambo kaHinom yayingayi kuba yindawo ekuthuthunjiswa kuyo abantu, kodwa kwakuza kulahlwa kuyo izidumbu zabantu.

Ngemihla kaYesu, abantu baseYerusalem babewalahla kule Ntlambo amabibi. Babephosa nezidumbu zezaphuli-mthetho yaye umlilo owawutshisa ezi zidumbu namabibi wawungacimi.

Xa uYesu wayethetha ngeempethu ezingafiyo nomlilo ongacimiyo wayebhekisela kuIsaya 66:24. Xa ethetha ‘ngezidumbu zamadoda anxaxhileyo [kuThixo],’ uIsaya uthi “iimpethu aziyi kufa nomlilo wawo awuyi kucima.” (KJ) UYesu nabo babemphulaphule babesazi ukuba la mazwi ayebhekisela kwizidumbu zabantu ezazingafanele kungcwatywa.

Ngoko ke, uYesu wasebenzisa iNtlambo kaHinom okanye iGehena njengomfuziselo wokufa ekungekho luvuko kuko. Wayibethelela le ngongoma ngokuthi uThixo “angatshabalalisa umphefumlo nomzimba eGehena.” (Mateyu 10:28, NAB) IGehena ngumfuziselo wentshabalalo kanaphakade, kungekhona intuthumbo kanaphakade.

Ngaba ‘umlilo ongunaphakade’ awayethetha ngawo uYesu yayingowokoqobo okanye yayingowokomfuziselo? Phawula ukuba umlilo ongunaphakade athetha ngawo uYesu kuMateyu 25:41 walungiselelwa “uMtyholi neengelosi zakhe.” Ucinga ukuba izidalwa zokomoya zinokutshiswa ngumlilo ongunaphakade? Okanye ngaba uYesu wayesebenzisa ibinzana elithi “umlilo” ngokufuziselayo? Ngokuqinisekileyo ‘izimvu neebhokhwe’ ezikhankanywe kwesi sahluko ayizizo ezokoqobo; kodwa zifuzisela iindidi ezimbini zabantu. (Mateyu 25:32, 33) Umlilo ongunaphakade awayethetha ngawo uYesu uza kubatshisa ngokomfuziselo abangendawo.

Abangendawo baya ngayiphi ingqiqo ‘kwisohlwayo sikanaphakade’? Nangona iinguqulelo ezininzi zisebenzisa igama elithi ‘isohlwayo’ elikuMateyu 25:46, ngokuyintloko igama lesiGrike elithi koʹla·sin lithetha “ukuhlola indlela ekhula ngayo imithi,” okanye ukuyithena, ukususa amasebe angafunekiyo. Ngoko ngoxa ababumvu befumana ubomi obungunaphakade, abo bangaguqukiyo bafaniswa neebhokhwe baya kuya ‘kwisohlwayo sikanaphakade,’ baya kutshatyalaliswa ngonaphakade.

Ucinga Ntoni?

UYesu akazange afundise ukuba abantu banomphefumlo ongafiyo. Noko ke, wayesoloko efundisa ngokuvuswa kwabafileyo. (Luka 14:13, 14; Yohane 5:25-29; 11:25) Ukuba uYesu wayekholelwa ekubeni umphefumlo awufi, kwakutheni ukuze athi abafileyo baza kuvuswa?

UYesu akazange afundise ukuba uThixo uza kuthuthumbisa abantu abangendawo ngonaphakade. Kunoko wathi: “UThixo walithanda ihlabathi kangangokuba wanikela ngoNyana wakhe okuphela kwamzeleyo, ukuze bonke abanokholo kuye bangatshabalali kodwa bafumane ubomi obungunaphakade.” (Yohane 3:16, NAB) Kwakutheni ukuze uYesu athi abo bangenalukholo kuye baya kufa? Ukuba ngokwenene wayethetha ukuba baza kuphila ngonaphakade, bethuthunjiswa kwisihogo somlilo, wayeza kutsho.

Imfundiso yokuba isihogo yindawo ekuthuthunjiswa kuyo abantu ayisekelwanga eBhayibhileni. Yimfundiso yobuhedeni ekwenziwa ngathi yeyobuKristu. (Funda ibhokisi ethi “Imbali Emfutshane Yesihogo” kwiphepha 6.) UThixo akabathuthumbisi esihogweni abantu ngonaphakade. Ukufunda ngesihogo kunokuyichaphazela njani imbono yakho ngoThixo?

[Ibhokisi ekwiphepha 6]

IMBALI EMFUTSHANE YESIHOGO

SIVELA KWIINKOLELO ZOBUHEDENI: AmaYiputa amandulo ayekholelwa kwisihogo somlilo. IThe Book Ȧm-Ṭuat, eyabhalwa ngowe-1375 B.C.E., ithetha ngabo “baya kuphoswa emhadini womlilo; yaye . . . soze bakwazi ukuphuma apho.” Intanda-bulumko yamaGrike uPlutarch (owayephila ngowama-c.46-120 C.E.) yathetha ngabantu abaphila ngaphantsi komhlaba isithi: “Benza isijwili njengoko bethuthunjiswa ngokoyikekayo, ngokulihlazo yaye besohlwaywa kabuhlungu.”

NAMAYUDA AYEYIKHOLELWA: Umbhali-mbali uJosephus (owayephila ngowama-37-c.100 C.E.) wathi amaEssene, ihlelo lamaYuda, lalikholelwa ukuba “imiphefumlo ayifi, iphila ngonaphakade.” Walek’ umsundulo wathi: “Oku kuyafana nenkolelo yamaGrike . . . Acinga ukuba imiphefumlo engendawo ivalelwe kwindawo emnyama neyoyikekayo, yaye ihlala ithuthunjiswa.”

UKUNGENA KWAYO “KUBUKRISTU”: Kwinkulungwane yesibini yeXesha Eliqhelekileyo incwadi engaphefumlelwanga ethi Apocalypse of Peter yathi ngabangendawo: “Balungiselelwe umlilo ongacimiyo.” Ihlabela mgama isithi: “UEzrael, ingelosi yengqumbo, itshisa inxalenye yemizimba yamadoda nabafazi ize iyiphose kwintsunguzi yobumnyama, esihogweni; ibohlwaya.” Kwangexesha elifanayo, umbhali uTheophilus wakwa-Antiyokhwe wacaphula umprofetikazi wamaGrike uSibyl, eprofeta ngokohlwaywa abangendawo esithi: “Niza kuphoswa emlilweni ovuthayo, nize nitshe apho yonke imihla.” UTheophilus wathi la mazwi “ayinyaniso, ayasebenziseka, asesikweni, yaye aluncedo kubo bonke abantu.”

KUMAXESHA APHAKATHI KWAKUTHETHELELWA UGONYAMELO NGESIHOGO SOMLILO: Ukumkanikazi waseNgilani, uMary I (owayelawula ngowe-1553-1558) owayedume ngokubulala abantu watshisa amaProtestanti aphantse abe ngama-300 esibondeni, wathi: “Kanye njengokuba imiphefumlo yabawexuki iza kutshiswa ngonaphakade esihogweni, kuhle ukuba ndixelise impindezelo kaThixo ngokubatshisa apha emhlabeni.”

INGCACISO YAKUTSHANJE: Kwiminyaka yakutshanje amanye amahlelo aye ayihlaziya imfundiso yawo yesihogo. Ngokomzekelo, ngowe-1995 iBhunga Leemfundiso ZeCawa YaseTshetshi lathi: “Isihogo asiyondawo abathuthunjiswa ngonaphakade kuyo abantu, kodwa yindlela azikhethela yona umntu ochasene noThixo, yaye ngenxa yoko akanakuze aphile ngonaphakade.”

[Ibhokisi/Umfanekiso okwiphepha 7]

YINTONI “IDIKE LOMLILO”?

ISityhilelo 20:10 sithi uMtyholi uya kuphoswa “edikeni lomlilo” aze “athuthunjiswe imini nobusuku ngonaphakade kanaphakade.” (King James Version) Ukuba uMtyholi ebeza kuthuthunjiswa ngonaphakade, uThixo ebemele amgcine ephila, kodwa iBhayibhile ithi uYesu uza “kumtshabalalisa.” (Hebhere 2:14, KJ) Idike lomlilo lifuzisela “ukufa kwesibini.” (ISityhilelo 21:8) Oku asikokufa kokuqala ekuthethwe ngako eBhayibhileni, okwabangelwa sisono sika-Adam, abaza kuvuswa kuko abantu. (1 Korinte 15:21, 22) Ngenxa yokuba iBhayibhile ayitsho ukuba abo ‘bakwidike lomlilo’ baza kukhutshwa kulo, ngoko “ukufa kwesibini” kumele ukuba lolunye uhlobo lokufa, ukufa kukanaphakade.

Abo “bakwidike lomlilo” bathuthunjiswa ngonaphakade ngayiphi ingqiqo? Maxa wambi “ukuthuthumbisa” kunokuthetha “ukuthintelwa” ekwenzeni izinto ozithandayo. Ngesinye isihlandlo xa uYesu wayekhupha iidemon, zadanduluka zathi: “Ngaba uze kusithuthumbisa [kusivalela enzonzobileni] ngaphambi kwexesha?” (Mateyu 8:29; Luka 8:30, 31; KJ) Ngoko ke, bonke abo ‘basedikeni’ baya ‘kuthuthunjiswa’ ngonaphakade, okanye ‘bafe okwesibini.’