Ngani Syambone Syaŵalembile Mateyu

21 Paŵaŵandichile ku Yelusalemu, ŵajimi ku Betifagi pa Litumbi lya Maolifi. Kaneko Yesu ŵatumile ŵakulijiganya ŵakwe ŵaŵili 2 ni kwasalila kuti, “Mjawule ku musi wamkuwuwonawo, ni chimkamsimane bulu ali amtaŵilile pampepe ni bulu jwamwana jwamkambako. Abuluwo mkagopole ni myiche nawo kwa une. 3 Mundu jwine pachakamwusye chilichose, mkamjanje kuti, ‘Ambuje akwasaka abuluŵa.’ Ndaŵi jijojo chakatumisye.”

4 Yeleyi yatendekwe pakwanilisya yaŵaŵechete Mlungu kupitila mwa jwakulochesya kuti, 5 “Mumsalile mwanache jwamkongwe jwa Siyoni kuti, ‘Mlole! Mwenye jwenu jukwisa kwa mmwejo. Juli jwakufasa soni jukwesile bulu, nditu bulu jwamwana jwamkambako.’”

6 Myoyo ŵakulijiganyawo ŵapite ni ŵatesile mpela muŵalamulile Yesu. 7 Jemanjajo ŵayiche najo bulujo pampepe ni bulu jwamwana jula, soni ŵakulijiganya ŵakwe ŵatandiche yakuwala yawo pa abuluwo ni Yesu ŵakwesile pa bulu jwamwanajo. 8 Ŵandu ŵajinji mugulujo ŵatandikaga yakuwala yawo mumsewu, soni ŵane ŵatemangulaga tunyambi twamasamba ga yitela ni kutujalaga mumsewumo. 9 Nambosoni gulu ja ŵandu jajaliji pasogolo pakwe soni jine jajamkuyaga munyuma jagumilaga kuti, “Mlungu jwetu, tukwaŵenda kuti amkulupusye Mwanache jwa Daudi! Jwana upile mundu jwakwika m’lina lya Yehofa! Tukwaŵenda kuti amkulupusye Mwanache jwa Daudi, ŵalakwe ŵakwinani!”

10 Sambano paŵajinjile mu Yelusalemu, msinda wosope watenganyiche mwamti ŵandu ŵawusyanaga kuti, “Ana jweleju ali ŵani?” 11 Gulu ja ŵandujo jajangaga kuti, “Jweleju ali Yesu jwakutyochela ku Nasaleti, mu chigawo* cha Galileya! Jwalakweju ali jwakulochesya juŵamsasile kala kuti chachiyika.”

12 Yesu ŵapite ku nyumba ja Mlungu ni kwatopola ŵandu wo­sope ŵaŵasumisyaga ni kusuma yindu panyumbajo. Jwalakwe ŵagudubwisyesoni matebulo ga ŵandu ŵakuchenga mbiya soni mabenchi* ga ŵandu ŵakusumisya ­ngunda. 13 Ni ŵasalile jemanjajo kuti, “Malemba gakusati, ‘Nyumba jangu chachijikolanga kuti nyumba jakupopelela,’ nambo jemanja mjitesile kuŵa mbanga ja ŵachiswamba.” 14 Ali panyumba ja Mlungujo, kwayichesoni ŵandu ŵangalola soni ŵalemale mwamti jwalakwe ŵaposisye.*

15 Ŵakulolela ŵakutaga mbopesi soni alembi ŵatumbile mnope paŵayiweni yakusimonjesya yaŵatesile jwalakwe soni kupikana anyamata ali mkugumila panyumba ja Mlungujo kuti, “Mlungu, tukwaŵenda kuti amkulupusye Mwanache jwa Daudi!” 16 Jemanjajo ŵamwusisye Yesu kuti, “Ana mkupikana yakuŵecheta anyamataŵa?” Yesu ŵajanjile kuti, “Elo. Ana jemanja nganimŵalanjeje maloŵe gakuti, ‘Ŵalakwewo atendekasisye pakamwa pa ŵanache soni makandi kuŵecheta maloŵe gakuyamichila’?” 17 Kaneko jwalakwe jwatyosile mumsindawo kwawula ku Betaniya ni ŵagonile kukoko.

18 Paŵawujilaga kumsindawo kundaŵindaŵipe, jwalakwe jamkwete sala. 19 Kaneko ŵachiweni chitela cha mkuju mumbali mwa msewu ni ŵapite pa chitelacho. Jwalakwe nganapata chilichose nambo masambape, ni ŵachisalile chitelacho kuti, “Ngasimsogolasoni mpaka kalakala.” Ndaŵi jijojo chitelacho chajumwile. 20 Ŵakulijiganyawo paŵayiweni yeleyi ŵasimonjile mnope ni ŵatite, “Ana yikomboleche wuli kuti chitela cha mkujuchi chijumule ndaŵi jijiji?” 21 Yesu ŵajanjile jemanjajo kuti, “Nditu ngumsalichisya kuti, naga mkwete chikulupi soni ngamkukayichila chimchitenda yekulungwa kupunda yandesile une ni chitela cha mkujuchi. Chimchikombola kulisalila litumbi ali kuti, ‘Mtyoche apano mkaliponye m’nyasa,’ mwamti yichitendekwa nditu. 22 Yindu yosope yampaka mŵende mwipopelo, chimchiyipochela naga mkwete chikulupi.”

23 Paŵayiche ku nyumba ja Mlungu, ŵakulolela ŵakutaga mbopesi soni achakulungwa ŵayiche kwa jwalakwe paŵaliji mkwiganya, ni ŵamwusisye kuti, “Ana mkwete ulamusi wakutendela yeleyi? Ana mwawujigele kwapi?” 24 Yesu ŵajanjile jemanjajo kuti, “Unesoni chinamwusye chiwusyo chimpepe. Naga mkunjanga, chinamsalilesoni kunajigele ulamusi wakutendela yindu yeleyi. 25 Ana ubatiso wa Yohane watyochele kwapi? Kwinani kapena kwa ŵandu?” Nambo jemanjajo ŵatandite kukambilana kuti, “Naga tukwanga kuti, ‘Watyochele kwinani,’ jwalakweju chatuwusye kuti, ‘Nambi ligongo chichi nganimumkulupilila?’ 26 Nambo naga tukwanga kuti, ‘Watyochele kwa ŵandu,’ tukusosekwa kogopa gulu ja ŵanduji ligongo wosopeŵa ŵamwonaga Yohane mpela jwakulochesya.” 27 Myoyo jemanjajo ŵamjanjile Yesu kuti, “Ngatukumanyilila.” Jwalakwejosoni jwajanjile kuti, “Unesoni nginamsalila kwanajigele ulamusi wakutendela yindu yeleyi.

28 “Ana jemanja mkuganisya wuli? Mundu jwine jwakwete ŵanache ŵaŵili. Jwalakwe jwapite kwa mwanache jwakwe jwandanda ni kumsalila kuti, ‘Mwanangu, lelo mjawule mkakamule masengo ku mgunda wangu wa mipeleya.’ 29 Mwanachejo jwajanjile kuti, ‘Nginjawula.’ Nambo kaneko jwachenjile nganisyo ni jwajawile. 30 Jwapitesoni kwa mwanache jwakwe jwaŵili ni kumsalila yilayila. Mwanachejo jwajanjile kuti, ‘Chinjawule Baba,’ nambo nganajawula. 31 Ana ŵani mwa ŵanache ŵaŵiliŵa juŵatesile yakusaka ya babagwe?” Jemanjajo ŵajanjile kuti, “Jwandandajo.” Yesu ŵasalile jemanjajo kuti, “Nditu ngumsalichisya kuti ŵakomesya msongo soni mahule akumpitilila jemanja ni kwinjila mu Uchimwene wa Mlungu. 32 Pakuŵa Yohane jwayiche ni kumlosya litala lya chilungamo, nambo jemanja nganimumkulupilila. Nambope, ŵakomesya msongo soni mahule ŵamkulupilile. Atamose jemanja mwayiweni yeleyi, nambo nganimchengape nganisyo kuti mumkulupilile jwalakwejo.

33 “Jemanja mpikanesoni chiwanichisyo chine achi: Mundu jwine jwakwete mgunda ni jwapandile mipeleya mumgundamo. Jwataŵile lutenje kusyungulila mgundawo soni jwalinganyisye malo gakuminyila mipeleya nambosoni jwataŵile sanja. Kaneko jwalakwe jwawulesile mgundawo mmyala mwa ŵamasengo ni jwapite ku chilambo chine. 34 Ndaŵi ja yisogosi pajakwanile, jwalakwe jwatumisye achikapolo ŵakwe kwa ŵamasengo ŵala kuti akajigale yisogosi yakwe. 35 Nambo ŵamasengowo ŵakamwile achikapolo ŵala, jwine ŵamputile, jwine ŵamwuleje soni jwine ŵamponyisye maganga. 36 Jwalakwe jwatumisyesoni achikapolo ŵane ŵajinji kupunda ŵapandanda ŵala, nambo ŵatesilesoni yilayila. 37 Pambesi pakwe ŵamtumisye mwanagwe ni kuŵecheta kuti, ‘Mwananguju chakamchimbichisye.’ 38 Ŵamasengowo paŵagambile kumwona mwanachejo, ŵatandite kuŵechetana kuti, ‘Jweleju ni juchachisigala ni chipanjechi. Kwende tumwulaje kuti chipanjechi chiŵe chetu!’ 39 Myoyo ŵamkamwile ni kumwutila kusa kwa mgunda soni ŵamwuleje. 40 Sambano pachachiyika msyene mgunda wa mipeleyawo, ana chachatenda chichi ŵamasengowo?” 41 Jemanjajo ŵajanjile kuti, “Ligongo ali ŵakusakala, jwalakwe chachajonanga ni kwapa mgundawo ŵamasengo ŵane, ŵele chachimpaga yisogosi pandaŵi jakwe.”

42 Yesu ŵasalile kuti, “Malemba gakusati, ‘Liganga lyele ŵakutaŵa nyumba ŵalikanile, liŵele liganga lyakusosekwa mnope lyapakona.* Ligangali lityochele kwa Yehofa, soni lili lyapajika m’meso mwetu.’ Ana jemanja nganimŵalanjeje yeleyi? 43 Ali ni ligongo lyakwe ngumsalila kuti, Mlungu chachimsumula jemanja Uchimwene wakwe ni kuwupeleka ku mtundu wakusogola yisogosi. 44 Soni mundu juchachikuŵala pa ligangali chachiwulala mnope. Nambo kwa mundu jwele ligangali lichimgwila, lichimjonanga.”

45 Ŵakulolela ŵakutaga mbopesi ni Afalisi paŵapikene yiwanichisyo yosopeyi, ŵayimanyi kuti jwalakwe aŵecheteje ya jemanjajo. 46 Atamose kuti jemanjajo ŵasakaga kumkamula* Yesu, ŵajogopaga gulu ja ŵandu, ligongo jamwonaga jwalakwe mpela jwakulochesya.