Ngani Syambone Syaŵalembile Luka

12 Kaneko gulu ja ŵandu masausande gejinji jasongene mwamti ŵandu ŵaliji mkupondanapondana. Pelepo Yesu ŵatandite kuŵecheta kaje ni ŵakulijiganya ŵakwe kuti, “Msamale ni chakusasaŵisya cha Afalisi, chachili chinyengo. 2 Pangali chindu chewunichile chenene chele ngasichiwonechela, soni pangali chindu chakusisika chele ngasichimanyika. 3 Myoyo yiliyose yamkuŵecheta mli m’chipi, yichipikanika pakulanguka, soni yamkuŵecheta mwakusongona m’yipinda yenu, yichilalichidwa penani pa nyumba. 4 Nambosoni ngumsalila jemanja achimjangu kuti, mkasimwajogopa ŵandu ŵakusawulaga chilu ŵele nganaŵa akombwele kutendasoni chine chakupunda pelepa. 5 Nambo chinamsalile jwamkusosekwa kumjogopa: Mumjogopeje Jwele jwakusati pawuleje mundu akusakolasoni machili gakumponya ku Gehena.* Nditu ngumsalila jemanja kuti, mumjogopeje Jwelejo. 6 Ana paja tujuni msano* ngaŵa akusatusumisya ni tumakobili tuŵili twakutuluka mnope? Nambotu pangali atamose kamo kampaka Mlungu akaliŵalile. 7 Soni atamose wumbo syosope sya mumtwe mwenu akusasiŵalangaga. Myoyo mkasimtenda woga, jemanja mli ŵakusosekwa mnope kupunda tujuni twejinji.

8 “Ngumsalila jemanja kuti, jwalijose jwakusanjitichisya une pameso pa ŵandu, nombe najo Mwanache jwa mundu chachimjitichisya jwalakwejo pameso pa malayika ga Mlungu. 9 Nambo jwalijose jwakungana une pameso pa ŵandu, nombe najo chachikanidwa pameso pa malayika ga Mlungu. 10 Soni jwalijose jwakuŵecheta maloŵe gakunyosya Mwanache jwa mundu, chachikululuchidwa. Nambo jwakunyosya msimu weswela, ngasakululuchidwa. 11 Ŵandu pachachimjigalila jemanja ku luŵala lwamagambo, kwa achakulungwakulungwa ŵa boma, soni kwa ŵakulamulila, mkasidandawula kuti chimkaŵechete mwamtuli pakulichenjela kapena kuti chimkaŵechete chichi. 12 Pakuŵa msimu weswela uchimjiganya ndaŵi jijojo yindu yamkusosekwa kuŵecheta.”

13 Kaneko mundu jwine mugulujo jwamsalile jwalakwejo kuti, “Mwalimu, amsalile mlongo mjangu kuti angaŵile chipanje cha baba.” 14 Yesu ŵamjanjile mundujo kuti, “Mmwe, ŵani ŵaŵambisile une kuŵa jwakuwelusya kapena jwakugaŵanya chipanje chenucho?” 15 Kaneko Yesu ŵasalile ŵanduwo kuti, “Mŵe mesope soni msamale ni kumbila kulikose kwakusakala, ligongo atamose mundu ali akwete yejinji, umi wakwe wangatyochela mu yindu yakweteyo.” 16 Ali aŵechete yeleyi, jwalakwe ŵasalile ŵanduwo chiwanichisyo. Ŵatite, “Mundu jwine jwakusichila jwagowele yejinji mumgunda mwakwe. 17 Myoyo jwalakwe jwatandite kuganisya kuti, ‘Sambano ana ndende chichi ligongo nganingola mwakusunjila yagowola yanguyi?’ 18 Kaneko jwatite, ‘Chindende ayi: Chingwisye ngokwe syangusi ni kutaŵa sine syekulungwakulungwa, kaneko chinayiŵiche mwelemo yagowola yangu yosope soni yindu yangu yosope. 19 Soni chinjilisalila namsyene kuti, “Ngwetetu yindu yambone yejinji yampaka yisunjidwe kwa yaka yejinji. Sambanotu mbumule, soni ndyeje, kumwa, ni kusangalalaga.”’ 20 Nambo Mlungu ŵamsalile jwalakwejo kuti, ‘Mmwe mundu jwangali lunda, chilo chinochino mmwejo chim’we. Sambano yindu yamsunjileyi yichiŵa ya ŵani?’ 21 Mwelemu ni mwayikusaŵela ni mundu jwaliwunjichile chipanje nambo nganaŵa jwakusichila kwa Mlungu.”

22 Kaneko jwalakwe ŵasalile ŵakulijiganya ŵakwe kuti, “Ni ligongo lyakwe ngumsalila jemanja kuti, mleche kudandawula ya umi wenu kuti chimchilya chichi soni kuti chimchiwala chichi. 23 Pakuŵa umi uli wakusosekwa mnope kupunda yakulya, soni chilu chili chakusosekwa mnope kupunda yakuwala. 24 Mganichisye ya makungulu: Gangapanda mbeju kapena kugowola, soni gangakola pakusunjila yakulya kapena ngokwe, nambo Mlungu akusagalisya. Ana jemanja nganimŵa ŵakusosekwa mnope kupunda yijuni? 25 Ana ŵani mwa jemanja jwampaka alewuye panandipe umi wakwe ligongo lya kudandawula? 26 Myoyo jemanja naga nganimŵa mkombwele kutenda kandu kamnono keleka, ni ligongo chichi mkusadandawula ya yindu yineyo? 27 Mganichisye mwagakusakulila maluŵa. Gangakamula masengo kapena kulitotela yakuwala. Nambo ngumsalichisya kuti atamose Solomo mu uchimbichimbi wakwe wosope nganawala yakusalala mpela limo mwa maluŵa gelega. 28 Sambano naga Mlungu akusayiwecha chamti myiyi yakumela yamwitinji yele yikusatama lelope, malaŵi ni kuyiponya pamoto, ana jwalakwe ngasam’wecha jemanja kupunda pelepa, jemanja ŵachikulupi chapanandimwe? 29 Myoyo mleche kudandawula kuti chimchilya chichi soni kuti chimchimwa chichi, soni mleche kulaga mnope nganisyo, 30 pakuŵa ŵandu ŵamitundu jine pachilambopa ni ŵakulimbichila mnope kusosasosa yindu yeleyi. Nambo Atati ŵenu akusamanyilila kuti jemanja mkusosechela yindu yeleyi. 31 Mmalomwakwe, mpitilisye kusosasosa Uchimwene wakwe, ni kaneko jwalakwe chachimpa jemanja yindu yeleyi.

32 “Mkatenda woga, jemanja kagulu ka ngondolo, pakuŵa Atati ŵenu ajitichisye yakumpa Uchimwene. 33 Mkasumisye yindu yamkwete ni mkatendele yambone ŵandu ŵakulaga. Mlipatile yikwama ya mbiya yele nganiyiŵa yimasile, yayikugopolela chipanje changamala kwinani, kwele jwawiyi nganaŵa ayiche soni kwele yijosolo nganiyiŵa yijonasile. 34 Pakuŵa kwachili chipanje chenu, mtima wenu ukusaŵasoni kukoko.

35 “M’wale chenene soni mkoseche* soni nyali syenu siŵeje sili mkukolela, 36 soni mŵeje mpela ŵandu ŵakwembecheya kwika kwa ambuje ŵawo kutyochela ku pwando ja ulombela, ni chakulinga chakuti ambujewo pachayiche ni kugogoda, jemanjajo ŵawugulile ndaŵi jijojo. 37 Ŵana upile achikapolo ŵele ambuje ŵawo pakwika chachasimana ali mkwembecheya! Nditu ngumsalichisya jemanja kuti, ambujewo chachikosechela kukamula masengo soni chachatamika patebulo achikapolo ŵakwewo ni kutanda kwatumichilaga. 38 Ŵana upile ŵelewo naga ambuje ŵawo pakwika pa ulonda waŵili kapena watatu* akwasimana ali mkwembecheya. 39 Nambo jemanja mmanyilile kuti naga msyenenyumba ali ajimanyi ndaŵi jakwika jwawiyi, nganaŵa akundile kuti jwawiyijo aposokole nyumbajo ni kwinjila. 40 Jemanjasoni mŵeje ŵakoseka, ligongo Mwanache jwa mundu chachiyika pandaŵi jele ngamkujiganichisya.”

41 Kaneko Petulo ŵatite, “Ambuje, ana chiwanichisyochi akutusalila m’wejipe kapena jwalijose?” 42 Pelepo Ambujewo ŵatite, “Ana ŵani kusyesyene jwali jwamasengo jwakulupichika ni jwalunda jwele ambuje ŵakwe chachimŵika kuti ŵaloleleje ŵamasengo wosope ŵa panyumba, ni kwapaga chakulya chakwanila pandaŵi jakwe? 43 Kapolo jwelejo chachiŵa jwakusangalala naga pakwika ambuje ŵakwe chachimsimana ali mkutenda yeleyo. 44 Nditu ngumsalichisya jemanja kuti, ambuje ŵakwewo chachimŵika jwalakwejo kuti aloleleje yindu yawo yosope. 45 Nambo naga kapolojo akuŵecheta mumtima mwakwe kuti, ‘Ambuje ŵangu akuchelewa kwika,’ ni akutanda kwaputa ŵamasengo ŵachalume ni ŵachakongwe soni kulya ni kumwaga nambosoni kukolelwa, 46 ambuje ŵa kapolojo chachiyika pa lisiku lyele jwalakwejo ngakulijembecheya soni pandaŵi jakuti ngakujimanyilila, ni chachimpa chilango* chakogoya mnope soni chachimponya kwali ŵandu ŵangakulupichika. 47 Sambano kapolo juŵapikanichisye yakusaka ya ambuje ŵakwe nambo nganaŵa jwakoseka soni nganatenda yaŵamsalile, chachimkwapula yikoti yejinji. 48 Nambo kapolo jwele nganapikanichisya mwamti atesile yindu yakusosekwa kumkwapula yikoti yejinji, chachimkwapula yikoti yamnono. Yisyene, mundu jwampele yejinji, pachisosekwasoni yejinji kutyochela kwa jwalakwejo, nambosoni mundu juŵamŵisile kuti aloleleje yindu yejinji, pachisosekwasoni yejinji kutyochela kwa jwalakwejo.

49 “Nayiche kukutandisya moto pachilambo chapasi, soni naga motowo ukolele kala, ana panasoni chine champaka sache? 50 Yisyene, ngwete ubatiso wangusosekwa kubatisidwa, soni ngulagasika mnope mpaka ubatisowo uli utendekwe. 51 Ana jemanja mkuganisya kuti nayiche kukupeleka mtendele pachilambo chapasi? Iyayi, nambo nayiche kukwalekanganya ŵandu. 52 Pakuŵa kutandila apano m’nyumba jimpepe muchisimanikwa ŵandu msano ŵangakamulana, ŵatatu kulimbanaga ni ŵaŵili soni ŵaŵili kulimbanaga ni ŵatatu. 53 Pachiŵa kulekangana, mtati chachilimbanaga ni mwanagwe jwamlume soni mwanache jwamlume ni babagwe, mama ni mwanache jwawo jwamkongwe soni mwanache jwamkongwe ni mamagwe. Mama chachilimbana ni mkwegwe jwawo jwamkongwe soni jwamkongwe ni akwegwe ŵakwe ŵakongwe.”

54 Kaneko ŵajisalile gulu ja ŵandujo kuti, “Pamliweni liwunde lili mkukwela kutyochela kundiŵililolyuŵa, ndaŵi jijojo jemanja mkusati, ‘Kukwika wula ja mbungo,’ mwamti yikusaŵaga mmomo. 55 Soni pamjiweni mbungo ja mwela jili mkupuga, jemanja mkusati, ‘Chikuŵe chitukuta,’ mwamti yikusaŵaga mmomo. 56 Jemanja ŵandu ŵachinyengo, mkusamanyilila kugopolela kawoneche ka chilambo soni kwinani, nambi ligongo chichi mkulepela kumanyilila kugopolela kwa yindu yayikutendekwa pandaŵi ajino? 57 Ligongo chichi jemanja pajika ngamkumanyilila chachili chakulungama? 58 Mwachisyasyo, pamkwawula kwa jwakulamulila ni mjenu jwakusaka kumjimba magambo mmwejo, mlinjelinje kumasya nganijo mli mwitala ni chakulinga chakuti mjenujo akampeleka mmwejo kwa jwakulamula magambo, nambosoni kuti jwakulamula magambojo akampeleka kwa msilikali jwa ku luŵala lwamagambo, soni msilikalijo ni kumponya m’nyumba ja ukayidi. 59 Nditu ngumsalichisya, ngasimkopokamo mpaka mli mpeleche kambiya kenu kakumalisya.”