Ngani Syambone Syaŵalembile Luka

4 Sambano Yesu, mwamachili ga msimu weswela, ŵatyosile ku Yolodani. Msimuwo wamlongolele ku chipululu mwamti waliji mkumjendesya kweleko 2 kwa masiku 40. Kaneko Satana ŵayiche kukumlinga. Kwa masiku gelega, jwalakwe nganalyaga kalikose. Sambano masikuga pagamasile, jwalakwe jamkwete sala. 3 Pelepo Satana ŵamsalile kuti, “Naga wawojo ali mwanache jwa Mlungu alisalile ligangali kuti liŵe mkate.”* 4 Nambo Yesu ŵamjanjile kuti, “Malemba gakusati, ‘Mundu ngaŵa mkutama ni umi ni chakulyape.’”

5 Kaneko Satana ŵamjigele Yesu ni kwawula najo pamalo gakwela mnope ni ŵamlosisye mauchimwene gosope ga pachilambo chapasi m’kandaŵi kamnono. 6 Ni Satana ŵamsalile jwalakwe kuti, “Chinape ulamusi pa mauchimwene gosopega ni uchimbichimbi wakwe, ligongo yosopeyi yili yangu, soni mpaka nayipeleche kwa jwalijose jwangusaka kuti nampe. 7 Naga wawojo akundindiŵalila ni kunjimbichisya une kamope basi, yosopeyi chiyiŵe yawo.” 8 Yesu ŵamjanjile jwalakwe kuti, “Malemba gakusati, ‘Yehofa Mlungu jwenu ni jwamkusosekwa kumtindiŵalila soni jwalakwe jika ni jwamkusosekwa kumtumichila.’”

9 Kaneko Satana ŵamjigele jwalakwe ni kwawula najo ku Yelusalemu, ni ŵamkwesisye pamalo gakwela mnope ga pa nyumba ja Mlungu ni ŵamsalile kuti, “Naga wawojo ali mwanache jwa Mlungu aligwisye pasi kutyochela apano, 10 pakuŵa Malemba gakusati, ‘Jwalakwe chachigalamula malayika gakwe pakwamba ya wawojo kuti gakulupusye,’ 11 soni, ‘Gachajangata mmyala kuti akaliputikasya sajo syawo ku liganga.’” 12 Pelepo Yesu ŵamjanjile jwalakwejo kuti, “Malemba gakusasala kuti, ‘Mkasimumlinga Yehofa Mlungu jwenu.’” 13 Satana paŵamasile kumlinga Yesu, ŵatyosile, kwembecheya ndaŵi jine jambone.

14 Sambano Yesu, mwamachili ga msimu weswela, ŵawujile ku Galileya. Soni mbili jambone jakwamba jwalakwe jawandile m’misi josope jakusyungulila. 15 Nambosoni jwalakwe ŵatandite kwiganya ŵandu mu masunagoge* mwawo, mwamti ŵajinji ŵaliji mkumchimbichisya.

16 Kaneko Yesu ŵapite ku Nasaleti kuŵakulile, soni mwakamulana ni yaŵanonyelaga kutenda pa lisiku lya Sabata, jwalakwe ŵajinjile mu sunagoge, ni ŵajimi kuti aŵalanje Malemba. 17 Myoyo ŵampele mpukutu wa jwakulochesya Yesaya. Paŵatambasukwile mpukutuwo, jwalakwe ŵapatile pamalo paŵalembile kuti, 18 “Msimu wa Yehofa uli pa une. Jwalakwe ŵasagwile une kuti lalichile ngani syambone kwa ŵakulaga. Ŵandumisye kuti lalichile ya kugopoledwa kwa ŵandu ŵali mu ukapolo, soni yakuti ŵangalola atande kulola. Ŵandumisyesoni kukwagopola ŵakulagasidwa kuti aŵe pamtendele, 19 soni kuti lalichile yakuti ndaŵi jikwanile jakuti Yehofa alosye umbone wakwe kwa ŵandu.” 20 Paŵamalisisye kuŵalanga, ŵawupindile mpukutuwo ni kuwupeleka kwa jwakutumichila, kaneko ŵatemi pasi. Pelepo ŵandu wosope ŵaŵaliji mu sunagogemo ŵagambaga kumlolechesya. 21 Kaneko ŵasalile jemanjajo kuti, “Lelo, lilemba lyagambile kulipikanali likwanilichikwe.”

22 Ŵandu wosopewo ŵatandite kuŵecheta yambone pakwamba jwalakwe, soni ŵasimongaga mnope ligongo lya maloŵe gambone soni gakusangalasya gagakopokaga pakamwa pakwe. Jemanjajo ŵaŵechetaga kuti, “Ana jweleju ngaŵa mwanache jwa Yosefe?” 23 Nambo jwalakwe ŵasalile kuti, “Mwangakayichila jemanja chimchigakamulichisya masengo pa une maloŵe agala gakuti: ‘Mmwe ŵakwaposya* ŵane, mliposyetu mwasyene.’ Myoyo chimchiŵechetaga kuti, ‘Twapikene ya yindu yimwatesile ku Kapelenawo, myitendetu yeleyosoni kumangwenu kuno.’” 24 Kaneko ŵasalile kuti, “Nditu ngumsalichisya, jwakulochesya jwangachimbichika mu dela jakumangwakwe. 25 Nambo ngumsalichisya kuti, ku Yisalayeli kwapali achakongwe ŵamasije ŵajinji m’masiku ga Eliya pandaŵi jele kwinani kwawugaliche kwa yaka yitatu ni myesi 6, mwamti sala jekulungwa jagwile m’chilambo chosopecho. 26 Nambotu Mlungu nganamtumisya Eliya kwa jwalijose mwa achakongwe ŵeleŵa, nambo ŵamtumisye kwa jwamkongwe jwamasije jwa ku Salefati m’chilambo cha Sidoni. 27 Nambosoni, kwapali ŵamatana ŵajinji ku Yisalayeli mundaŵi ja jwakulochesya Elisa. Nambotu pangali jwalijose jwa jemanjajo juŵamposisye,* nambo Namani jikape jwa ku Siliya.” 28 Sambano wosope ŵaŵapikanaga maloŵe gelega mu sunagogemo ŵatumbile mnope. 29 Jemanjaji ŵamkamwile Yesu ni kwawula najo mwachitemachitema kusa kwa msinda. Kaneko ŵapite najo chamumbesi musyesyene mwa msindawo kuti akamponye kwichenje pakuŵa msindawo ŵawutaŵile penani palitumbi. 30 Nambo jwalakwe ŵagambile kutyoka pasikati pawo ni kwawulaga.

31 Kaneko jwalakwe ŵapite ku msinda wa Kapelenawo, ku Galileya. Kweleko ŵaliji mkwajiganya ŵandu pa lisiku lya Sabata, 32 soni ŵanduwo ŵasimonjile mnope ni kajiganye kakwe, pakuŵa ŵaliji mkwajiganya mpela mundu jwakola ulamusi wakupedwa ni Mlungu. 33 Sambano, mu sunagogemo mwapali mundu juŵakwete msimu wakusakala. Mundujo jwagumisile ni maloŵe gamachili kuti, 34 “Ana akusaka kututenda chichi, wawo Yesu jwa ku Nasaleti? Ana ayiche kuti atujonanje? Une ngwamanyilila chenene wawojo kuti ali Jwamswela jwa Mlungu.” 35 Nambo Yesu ŵawujamwiche msimu wakusakalawo kuti, “Mjile jii, soni mkopoche mwa munduju.” Pelepo msimu wakusakalawo wamgwisisye mundujo pasi pasikati pa ŵanduwo, kaneko wakopweche mwa mundujo nambo nganiwumwulasya. 36 Ŵanduwo paŵayiweni yeleyi ŵasimonjile mnope mwamti ŵatandite kambilana kuti, “Ana kaŵechete keleka kamtuli? Pakuŵa jwalakwe akwete ulamusi soni machili gakujilamula misimu jakusakala, soni misimujo jikukopoka mwa ŵandu!” 37 Myoyo mbili jakwamba jwalakwejo jawandile mnope m’madela gosope gakusyungulila.

38 Paŵatyosile ku sunagogeko, jwalakwe ŵapite kumangwakwe Simoni. Kweleko, ŵasimene akwegwe ŵawo Simoni ali mkulwala, chilu chili chikolele mnope moto ni ŵamŵendile Yesu kuti ŵakamuchisye mayiwo. 39 Myoyo Yesu ŵapite ni kwima paŵagonile mayiwo kaneko ŵaposisye. Ndaŵi jijojo mayiwo ŵajimwiche ni kutanda kwalinganyila yakulya jemanjajo.

40 Nambo lyuŵa palyatiŵilaga, wosope ŵaŵakwete ŵandu ŵakulwala yilwele yakulekanganalekangana ŵayiche nawo kwa jwalakwe. Jwalakwe ŵaposisye wosopewo mwakwasajika makono gakwe. 41 Nombenayo yiŵanda yakopokaga mwa ŵandu ŵajinji ni yagumilaga kuti, “Wawo ali Mwanache jwa Mlungu!” Nambo jwalakwe ŵayijamukaga yiŵandayo, soni nganayikundaga kuti yiŵechetesoni ya jwalakwejo, pakuŵa yamanyililaga kuti jwalakwe ali Klistu.

42 Pakwachele, jwalakwe ŵatyosile ni kwawula kumalo kwajika. Nambo ŵandu ŵatandite kumsosasosa jwalakwe mpaka ŵampatile, mwamti jemanjajo ŵalinjilile kumlekasya kuti akatyoka. 43 Nambo jwalakwe ŵasalile jemanjajo kuti, “Ngusosekwasoni kulalichila ngani syambone sya Uchimwene wa Mlungu ku misinda jinesoni, pakuŵa yeleyi ni yiŵandumile kuti nayitende.” 44 Myoyo jwalakwe ŵapitilisye kulalichila mu masunagoge ku Yudeya.