Ngani Syambone Syaŵalembile Luka

10 Payamasile yindu yeleyi, Ambuje ŵasagwile ŵandu ŵane 70 ni kwatumisya ŵaŵiliŵaŵili kuti alongole kwawula mumsinda uliwose soni kulikose kwele Ambujewo ŵasosekwaga kwawula. 2 Kaneko ŵasalile jemanjajo kuti, “Yisyene, yagowola yili yejinji, nambo ŵamasengo ali ŵamnono. Myoyo, mumŵende Msyene masengo gakugowola kuti atumisye ŵandu ŵajinji kumasengo gakwe gakugowola. 3 Mŵe ŵakusamala! Ngumtumisya jemanja mpela tuŵanache twa ngondolo pasikati pa masogo.* 4 Mkajigala yikwama ya mbiya kapena mwakusunjila yakulya kapena sapato, soni mkasimkokoŵaga pakupeleka moni mwitala. 5 Pamyiche panyumba ja mundu, chandanda mjileje kuti, ‘Mtendele uŵe panyumba ajino.’ 6 Naga panyumbapo pana mundu jwamtendele, mtendele wenu uchiŵa pa mundujo. Nambo naga pangali, mtendele wenu uchiwujila kwa jemanja. 7 Myoyo mtameje panyumba ja mundu jwamtendelejo, mlyeje soni kumwa yindu yachampeje, pakuŵa jwamasengo akuŵajilwa kupochela malipilo gakwe. Mkanonyelaga kutyoka panyumba jine ni kuja kwinjila jine.

8 “Nambosoni pamjinjile mumsinda ni akumpochela chenene, mlyeje yakulya yachampeje mwelemo 9 soni mwaposyeje* ŵandu ŵakulwala ŵali mwelemo, ni kwasalilaga kuti, ‘Uchimwene wa Mlungu uŵandichile.’ 10 Nambo naga pamjinjile mumsinda ngakumpochela chenene, mjawuleje ku misewu jakwe jekulungwa ni kuŵecheta kuti, 11 ‘Tukung’unda luwundu lwa mumsinda mwenu muno kusajo kwetu. Nambo mmanyilile ayi, Uchimwene wa Mlungu uŵandichile.’ 12 Ngumsalichisya jemanja kuti chilango* chachichigwila msinda welewo chichiŵa chakogoya mnope kupunda cha Sodomu.

13 “Mkwete likungu* jemanja ŵandu ŵa ku Kolasini! Mkwete likungu jemanja ŵandu ŵa ku Betisaida! Ligongo masengo gamachili gagatendekwe kwa jemanja gakaŵe kuti gatendechele ku Tulo ni ku Sidoni, ŵandu ŵa kweleko akaŵele ali agalawiche kala mtima, mwakuwala yiguduli soni kutama paliwu. 14 Nambo chilango chachichimgwila jemanja pa lisiku lyakuwelusya chichiŵa chakogoya mnope kupunda chilango cha Tulo ni Sidoni. 15 Nambosoni jemanja ŵandu ŵa ku Kapelenawo, ana mwine chamchikwesya kwinani? Iyayi, ku Malembe* ni kwachimchijawula!

16 “Jwalijose jwakumpikanila jemanja akumbikanilasoni une. Nambo jwalijose jwangakumpikanila jemanja ngakumbikanilasoni une. Nambosoni jwalijose jwangakumbikanila une ngakumpikanilasoni jwele juŵandumile une.”

17 Kaneko ŵandu 70 ŵala ŵawusile ali mkusangalala, ni ŵatite, “Ambuje, atamose yiŵanda yaliji mkutupikanila patwakamulichisyaga masengo lina lyawo.” 18 Pelepo Yesu ŵasasile kuti, “Nam’weni Satana ali agwile kala kutyochela kwinani mpela njasi. 19 Mpikane! Une nampele jemanja ulamusi wakuti mpondeponde majoka ni makoloto. Nampelesoni ulamusi pa machili gosope ga mdanijo, soni pangali chilichose champaka chimwulasye. 20 Nambope mkasangalalaga ligongo lyakuti misimu jampikanilaga, nambo msangalalaje ligongo lyakuti mena genu galembedwe kwinani.” 21 Pandaŵi jijiji, msimu weswela wamtendekasisye Yesu kusangalala mnope, ni jwatite, “Ngwayamichila pameso pa wosope, wawo Atati, Ambuje ŵakwinani soni chilambo chapasi, ligongo ayisisile mwakusamala yindu yeleyi kwa ŵandu ŵalunda soni ŵakumanyilila yindu nambo ayisasile kwa tuŵanache. Elo Atati, ligongo ŵalakwe ŵajitichisye kuti yiŵe m’litala lyeleli. 22 Atati ŵangu apeleche yindu yosopeyi kwa une, soni pangali jwalijose jwakummanyilila Mwanache akaŵe Atatipe. Nambosoni pangali jwalijose jwakwamanyilila Atati akaŵe Mwanachepe, soni jwalijose jwele Mwanachejo asachile kummanyisya yakwamba Atatiwo.”

23 Kaneko jwalakwe ŵasalile ŵakulijiganya ŵakwepe kuti, “Ŵana upile ŵandu ŵakuyiwona yindu yamkuyiwona jemanjayi. 24 Pakuŵa ngumsalichisya kuti, ŵakulochesya ŵajinji soni mamwenye ŵasachililaga ali ayiweni yindu yamkuyiwona jemanjayi nambo nganayiwona, soni ŵasachililaga ali apikene yindu yamkupikana jemanjayi nambo nganayipikana.”

25 Sambano mundu jwine jwakumanyilila mnope Chilamusi jwajimi kuti amlinje Yesu. Mundujo jwatite, “Mwalimu, ana ngusosekwa kutenda chichi kuti ngapate umi wangamala?” 26 Jwalakwe ŵamjanjile kuti, “Ana mu Chilamusi ŵatite chichi? Ana mkusapikanamo yamtuli?” 27 Mundujo jwamjanjile kuti, “‘Mumnonyeleje Yehofa Mlungu jwenu ni mtima wenu wosope, ni umi wenu wosope, ni machili genu gosope soni ni nganisyo syenu syosope,’ soni ‘mumnonyeleje mjenu mpela mwamkusalinonyelela mwasyene.’” 28 Jwalakwe ŵamsalile mundujo kuti, “Mjanjile chenene. Mpitilisye kutenda yeleyo mwamti chimchipata umi.”

29 Nambo mundujo pakusaka kulilosya kuti ali jwakulungama, jwamwusisye Yesu kuti, “Ana mjangu ali ŵani kusyesyene?” 30 Yesu ŵajanjile kuti, “Mundu jwine jwatyochelaga ku Yelusalemu ni kwawulaga ku Yeliko. Ali mwitala, jwasimene ni ŵachiswamba. Jemanjaji ŵamwusile yakuwala, soni kumputa ni kumleka ali asigele panandi kuwa. 31 Sambano yagambile kutendekwa kuti jwakutaga mbopesi jwapitagasoni mumsewu uwuwu, nambo paŵam’weni mundujo jwagambile kumŵambala. 32 Nombenajo Mlefi, paŵayiche pamalopo ni kumwona mundujo, ŵagambile kumŵambala. 33 Nambo Msamaliya jwine juŵajendaga mumsewuwo jwayiche pamalopo, soni paŵam’weni mundujo chamkamwile chanasa. 34 Myoyo jwalakwe jwapite pajwagonile mundujo. Ŵamtasile mawuta ni finyo m’maŵanga gakwe, ni kugataŵa. Kaneko ŵamkwesisye pa bulu jwakwe ni kwawula najo kunyumba jagona achalendo kwele ŵamsamalile chenene. 35 Palisiku lyakuyichisya jwalakwe jwajigele mbiya siŵili sya dinali ni kumpa msyene nyumbajo, soni ŵamsalile kuti, ‘Amsamalile munduju, soni naga akonanga mbiya syakupunda syelesi, chinjawuchisya pakuwuja.’ 36 Pa ŵandu ŵatatuŵa, ana ŵani jwamkumwona kuti jwalitesile kuŵa mjakwe jwa mundu juŵamwulesye ŵachiswamba jula?” 37 Jwalakwe ŵamjanjile kuti, “Ali mundu juŵamtendele chanasa jula.” Pelepo Yesu ŵamsalile jwalakwejo kuti, “Mmwejosoni mjawule mkatendeje yeleyo.”

38 Sambano paŵaliji mkupitilisya ulendo wawo, ŵajinjile m’musi wine. Jwamkongwe jwine m’musiwo lina lyakwe Malita ŵampochele jwalakwejo kunyumba jakwe mpela mlendo. 39 Jwalakwe jwakwete mpwakwe lina lyakwe Maliya. Maliya jwatemi chiŵandika sajo sya Ambujewo ni kupikanilaga maloŵe gawo. 40 Nambo Malita jwatanganidwe ni masengo gejinji. Myoyo jwalakwe jwapite kwa Yesu ni kumsalila kuti, “Ambuje, ana ngakuyiwona kuti apwangaŵa andechele jika masengo? Ŵasalile kuti ayiche kukungamuchisya.” 41 Ambujewo ŵamjanjile jwalakwejo kuti, “Malita, Malita, mkudandawula soni kutanganidwa ni yindu yejinji. 42 Yindu yakusosekwatu yili yamnono, kapenasoni chindu chimpepe basi. Nambo Maliya kumbali jakwe, asagwile chindu chambone, soni pangali juchachimsumula.”