Detulonomo

1 Mose ŵaŵechetene ni Ayisalayeli wosope paŵaliji mudela ja ku Yolodani, mu chipululu chachaliji mwakulolegana ni Sufi, pasikati pa Palana, Tofeli, Labani, Haseloti soni Disahabu. 2 Kutyochela ku Holebe kuja kwika ku Kadesi-balineya kupitila mudela jamatumbi ja Seili uli ulendo wa masiku 11. 3 Mose ŵasalile Ayisalayeliwo yosope yaŵamtumile Yehofa kuti ŵasalile jemanjajo. Jwalakwe ŵatesile yeleyi palisiku lyandanda lya mwesi wa 11, m’chaka cha 40, chikopochele Ayisalayeli m’chilambo cha Iguputo. 4 Yeleyi yatendekwe panyuma pakuti jwalakwe amgomeche Sihoni mwenye jwa Aamoli juŵatamaga ku Hesiboni. Nambosoni panyuma pakuti amgomeche Ogi mwenye jwa ku Basana juŵatamaga ku Asitaloti. Mwenye jweleju ŵamgomechele ku Edileyi. 5 Paŵaliji mudela ja ku Yolodaniko m’chilambo cha Mowabu, Mose ŵatandite kulondesya Chilamusi cha Mlungu mwakuŵecheta kuti:

6 “Yehofa Mlungu jwetu ŵatusalile ku Holebe kuti, ‘Jemanja mtamilisye mu dela jamatumbiji. 7 Mjawule ku dela jamatumbi ja Aamoli nambosoni ku madela gosope gakuŵandikana ni dela jeleji. Madela gakwe ni aga: dela ja Alaba, dela jamatumbi, dela ja Sefela, dela ja Negebu soni dela ja mumbali mwa nyasa. Chelechi chili chilambo cha Akanani. Mjawule kweleko mpaka mkayiche ku Lebanoni soni ku lusulo lwekulungwa lwa Filate. 8 Nditu chilambo chelechi nampele kuti chiŵe chenu. Chelechi chili chilambo chele une Yehofa nalumbile kuti chinjapa achinangolo ŵenu, Abulahamu, Isaki soni Yakobo pampepe ni yisukulu yakwika panyuma pawo. Mjawule m’chilambo chelechi ni mkachijigale kuti chiŵe chenu.’

9 “Pandaŵi jelejo une Mose namsalile jemanja kuti, ‘Une nganimba ngombwele kukamula jikape masengo gakumlongolela jemanja. 10 Yehofa Mlungu jwenu atendekasisye kuti jemanja mŵe ŵajinji, mwamtitu apano mtupile mnope mpela ndondwa syakwinani. 11 Nambosoni Yehofa Mlungu jwa achinangolo ŵenu amtendekasye jemanja kuti mtupe maulendo gejinji kupunda mwamŵelele apano, soni jwalakwe ampe upile jemanja mwakamulana ni chilanga chaŵatesile jwalakwejo kwa jemanja. 12 Une nganimba ngombwele kumlolela jikape ligongo jemanja mli katundu jwausito soni mkusanonyela yakanganakangana. 13 Myoyo msagule kutyochela pasikati pa mbumba syenu achalume ŵalunda, ŵakupikanichisya soni ŵakumanyilila yindu. Ŵandu ŵelewo une chinjaŵika kuti aŵe ŵakumlongolela jemanja.’ 14 Pelepo jemanja mwanjanjile kuti, ‘Yindu yamtusalile kuti tutendeyi yili yambone.’ 15 Myoyo une najigele achakulungwakulungwa ŵaŵalongolelaga mbumba syenuwo, ŵaŵaliji achalume ŵalunda soni ŵakumanyilila yindu ni naŵisile kuti aŵe ŵakulongolela ŵenu, ŵakulongolela ŵandu masausande, ŵakulongolela ŵandu mahandede, ŵakulongolela ŵandu ŵakupunda 50, ŵakulongolela ŵandu ŵakupunda 10, soni ŵane kuŵa ŵakulolela ŵa mu mbumba syenu.

16 “Pandaŵi jelejo nalamwile ŵakwelusya magambo ŵenu kuti, ‘Naga mundu pasikati penu ayiche ni ngani kwa jemanja kuti m’welusye, mkusosekwa kwelusya nganijo mwachilungamo, chinga nganijo jili pasikati pa ŵandu ŵaŵili ŵa Chiyisalayeli kapena pasikati pa Myisalayeli ni mundu jwamtundu wine jwakutama pasikati penu. 17 Mkatendaga lusagu pamkwelusya magambo. Mpikanileje magambo ga mundu jwalijose, chinga ali mundu wamba kapena jwakuchimbichika. Pamkwelusya magambo mkasimumjogopaga mundu ligongo mkwelusya mmalo mwa Mlungu. Nambo naga magambogo jemanja gamsawisye mnope myicheje nago kwa une. Pelepo une chinjiwelusya magambogo.’ 18 Pandaŵi jelejo une namsalile yindu yosope yamkusosekwa kuti mtendeje.

19 “Kaneko pakukuya yaŵatulamwile Yehofa Mlungu jwetu, twatyosile ku Holebe ni kwenda m’chipululu chekulungwa soni chakogoya chimwachiweni chila pakwawula ku dela jamatumbi ja Aamoli. Pambesi pakwe twayiche ku Kadesi-balineya. 20 Patwayiche kweleko une namsalile jemanja kuti, ‘Sambanotu myiche ku dela jamatumbi ja Aamoli, dela jele Yehofa Mlungu jwetu akutupa m’weji. 21 Mlole! Yehofa Mlungu jwenu achipeleche chilambochi kwa jemanja. Sambanotu mnyakuche mjigale chilambochi kuti chiŵe chenu, mwakamulana ni yaŵamsalile Yehofa Mlungu jwa achinangolo ŵenu. Mkatenda woga kapena kutetemela.’

22 “Nambope jemanja wosope mwayiche kwa une ni kusalila kuti, ‘Kwende tusagule achalume ni twatumisye kuti akachisonde chilambocho, ni chakulinga chakuti pachawuje jemanjajo atusalile litala lyambone lyampaka tupitile kuti tukayiche kweleko. Nambosoni atusalile mwajiŵelele misinda jachitukajisimane kweleko.’ 23 Yamwasalileyi nayiweni kuŵa yambone. Myoyo, nasagwile achalume 12 kutyochela mu mbumba syenu, jwamlume jumo kutyochela mu mbumba jilijose. 24 Achalume ŵeleŵa ŵanyakwiche ni kwawula ku dela jamatumbi mpaka ŵapite kwika ku Chitiŵi* cha Esikolo. Paŵayiche kweleko ŵachisondile chilambocho. 25 Jemanjajo paŵawujaga ŵatujigalile yine mwa yisogosi ya m’chilambocho, soni paŵayiche ŵatusalile kuti, “Chilambo chakutupa Yehofa Mlungu jwetu chili chambone kwabasi.” 26 Nambo jemanja mwakanile kwawula ku chilambocho soni mwakanile kupikanila yaŵamlamwile Yehofa Mlungu jwenu. 27 Jemanja mwaliji mkudandawula ku matenti genu mli mkuŵecheta kuti, ‘Yehofa ŵatukopwesye m’chilambo cha Iguputo ligongo lyakuŵengana ni m’weji ni kutupeleka mmyala mwa Aamoli kuti atupyajile wosope. 28 M’we ngatukusaka kwawula ku chilambo chelecho. Achalongo achimjetu ŵaŵechete maloŵe gakututendekasya kwasa mtima gakuti, “Ŵandu ŵakweleko ali ŵamachili soni ŵachalewulewu kutupunda m’wejo. Misinda jawo jili jekulungwa soni jikwete ndenje syakulimbangana syelewu, syakwika mpaka kwiwunde. Kweleko twasimenesoni ŵandu ŵa mtundu wa Aanaki.”’

29 “Pelepo une namsalile jemanja kuti, ‘Mkatenda woga kapena kutetemela ni jemanjajo. 30 Yehofa Mlungu jwenu chachiŵa pasogolo penu kumputila ngondo jemanja, mpela muŵatendele ku Iguputo pameso pa jemanja. 31 Atamosesoni pamwaliji m’chipululu mula jemanja mwaliwonele jika yaŵatesile Yehofa Mlungu jwenu pakumnyakula paulendo wenu kulikose kwamwajawulaga mpaka kwika pamalo agano, mpela yakusatenda baba pakumnyakula mwanagwe.’ 32 Nambo atamose ŵamtendele yosope yeneyi, jemanja nganimumkulupilila Yehofa Mlungu jwenu, 33 jwele juŵaliji mkwenda pasogolo penu ni kumsoselaga malo gakuti mkunjeje matenti genu. Jwalakwe ŵalosisye kuti ali ni jemanja pakumlongolela litala lyakuti mjendeje pakamulichisya masengo liwunde, musi ni chilo. Chilo liwundeli lyaŵalaga mpela moto.

34 “Pandaŵi josope jamwaliji mkuŵecheta yindu mpela yeleyi Yehofa ŵampikanaga, mwamti jwalakwe ŵamtumbilile mnope jemanja mpaka ŵalumbile kuti, 35 ‘Pangali mundu jwalijose jwa mu m’bado* wakusakala welewu juchachichiwona chilambo chambonecho chinalumbile kwa achinangolo ŵenu kuti chinjapa. 36 Nambo Kalebe mwanache jwa Yefune, jwelepejo ni juchachichiwona chilambocho. Chinjimpa jwalakwejo soni ŵanache ŵakwe chilambo chiŵapondilecho ligongo lyakuti jwalakwejo ampikanile Yehofa ni mtima wakwe wosope.’ 37 Yehofa ŵandumbilile ni une jwakwe ligongo lya jemanja mwamti ŵatite, ‘Mmwejosoni ngasimjinjila m’chilambocho. 38 Nambo Yoswa mwanache jwa Nuni jwakusajima pameso penu ni jwele juchakajinjile m’chilambocho. Mumtendekasye jwalakwejo kuti aŵe jwamachili* ligongo jwalakwe ni juchiŵalongolele Ayisalayeli kuti akachijigale chilambocho.’ 39 Mlungu ŵamsalilesoni jemanja kuti, ‘Ŵanache ŵenu ŵamteje ŵala kuti chachiŵa achikapolo, ŵelesoni ngakumanyilila kulekanganya yambone ni yakusakala, jemanjajo ni ŵachachijinjila m’chilambomo soni une chinjapa jemanjajo chilambocho kuti atameje mwelemo. 40 Nambo jemanja mnyakuche ni kuwujila ku chipululu kupitila litala lyakwinjilila ku Nyasa Jechejewu.’

41 “Pamwapikene yeleyi jemanja mwasalile une kuti, ‘M’weji tumlemwechesye Yehofa. Sambano tuli ŵakoseka kukwela matumbiga kwawula kuti tukapute ngondo, mpela yaŵatite pakutulamula Yehofa Mlungu jwetu.’ Myoyo jwalijose jwa jemanjajo ŵakoseche ali ajigele yida yakwe ya ngondo. Jemanja mwaganisyaga kuti ngayija kumsawusya kumatumbi kumwajawulagako. 42 Nambo Yehofa ŵasalile une kuti, ‘Mwasalile jemanjajo ayi: “Mkajawula kumatumbi kweleko kukuputa ngondo pakuŵa une ngimba ni jemanja. Naga mkwawula kweleko adani ŵenu chakamgomeche.”’ 43 Myoyo une namsalile jemanja maloŵe gelega nambo nganimumbikanila. Nganimpikanila yaŵamlamwile Yehofa soni mwakulikwesya mwawutandite ulendo wakwawula kumatumbiko. 44 Kaneko Aamoli ŵaŵatamaga ku dela jamatumbijo ŵayiche kuti amenyane ni jemanja mwamti ŵamtopwesye mpela mwasikusatendela nyuchi. Pakutila, jemanja mwabalalikangene kutandila ku Seili mpaka kuja ku Holima. 45 Myoyo pamwawujile mwatandite kulila pameso pa Yehofa, nambo Yehofajo nganapikana kulila kwenuko kapena kuyikosya ya jemanja. 46 Ni ligongo lyakwe jemanja mwatemi ku Kadesi kwa ndaŵi jelewu.