Genesesi

2 Myoyo kwinani ni chilambo chapasi soni yindu yosope yayili mwelemo,* yamasile kuyipanganya. 2 Pakwikaga palisiku lya 7, Mlungu ŵaliji ali amalisisye masengo gosope gaŵatendaga. Kaneko palisiku lya 7 lyeleli jwalakwe ŵatandite kupumula pamasengo gakwe gosope gaŵatendaga. 3 Myoyo Mlungu ŵalipele upile lisiku lya 7 soni ŵalitesile kuti liŵe lyapajika, ligongo lisiku lyeleli ni lyele Mlungu ŵapumwile pamasengo gakwe gosope gaŵatesile soni pa yosope yaŵasachile kuyipanganya.

4 Aji ni mbili jakulondesya mwayaŵelele paŵapanganyaga kwinani ni chilambo chapasi, palisiku lyele Yehofa* Mlungu ŵapanganyisye chilambo chapasi soni kwinani.

5 Pachilambo chapasi paliji pangali yitela soni paliji pangali yakumela yiliyose yayatandite kumela. Yaliji myoyo ligongo lyakuti Yehofa Mlungu ŵaliji mkanagwisye wula pachilambo chapasi soni paliji pangali mundu jwalijose jwakulima petaka. 6 Nambo lipundugulu lyakwelaga mwinani kutyochela pachilambo chapasi. Ni kaneko lyatulukaga ni kunyoŵesya litaka lyosope.

7 Kaneko Mlungu ŵampanganyisye mundu kutyochela ku luwundu lwa pachilambo chapasi. Ni ŵampepelele mundujo mpweya wa umi mumbula mwakwe, mwamti mundujo jwaŵele jwaumi.* 8 Nambosoni Yehofa Mlungu ŵalinganyisye mgunda ku Edeni chakungopokolyuŵa. Ni ŵamŵisile mundu juŵampanganyisye jula mumgundamo. 9 Myoyo Yehofa Mlungu ŵatendekasisye kuti palitaka pamele yitela yakusalala soni yakola yisogosi yambone kulya. Nambosoni ŵamelesye chitela cha umi pasikati pa mgundawo soni chitela chakumanyikasya yambone ni yakusakala.

10 Sambano lwapali lusulo lwalwatandile mu Edenimo, ni kwitililaga mgundawo. Lusulolo lwagaŵikangene ni kuŵa sulo mcheche. 11 Lina lya lusulo lwandanda lili Pisoni. Lusulo lwelelu ni lwalusyungulile chilambo chosope cha Hafila, kwakuli golide. 12 Golide jwa chilambo chelechi ali jwambone. Kweleku kwanasoni mawuta gakununjila mnope soni maganga ga mtengo wapenani ga onekisi. 13 Lina lya lusulo lwaŵili lili Gihoni. Lusulo lwelelu ni lwalusyungulile chilambo chosope cha Kusi. 14 Lina lya lusulo lwatatu lili Hidekeli.* Lusulo lwelelu lukusajawula chakungopokolyuŵa kwa Asiliya. Soni lusulo lwamcheche luli lwa Filate.

15 Yehofa Mlungu ŵamjigele mundu jula ni kumŵika mumgunda wa Edeni ni chakulinga chakuti awulimeje ni kuwusamalila. 16 Yehofa Mlungu ŵampelesoni mundujo lilamusi lyakuti, “Mlyeje yisogosi ya m’chitela chilichose chachili mumgundamu. 17 Nambo ngamkusosekwa kulya yisogosi ya m’chitela chakumanyikasya yambone ni yakusakala. Ligongo palisiku lyachimchilya yisogosi ya m’chitela chelechi, chimchiwa nditu.”

18 Kaneko Yehofa Mlungu ŵatite, “Nganiyiŵa yambone kuti munduju apitilisye kutama jika. Chinampanganyichisye jwakumkamuchisya kuti aŵe mjakwe jwakuŵajilana najo.” 19 Sambano Yehofa Mlungu ŵatandite kupanganya yinyama yamtundu uliwose yamwitinji soni yaguluka mwinani yamtundu uliwose kutyochela ku litaka. Ni ŵatandite kwika nayo kwa mundu jula kuti alole mena gele mundujo chayipeje yinyamayo, mwamti lina lyele mundujo ŵachipaga chaumi chilichose, lyaŵele lina lyakwe. 20 Myoyo mundujo ŵayipele mena yinyama yosope yakulanga. Ŵayipelesoni mena yaguluka yosope yamwinani, soni chinyama chilichose chamwitinji. Nambo mundujo nganakola jwakumkamuchisya kuti aŵe mjakwe jwakuŵajilana najo. 21 Myoyo Yehofa Mlungu ŵamtendekasisye mundujo kugona mnope lugono. Mundujo ali mlugono myoyo, Mlungu ŵatyosisye luŵalati lumo lwa mundujo ni kuwugala malo gaŵatyosisye luŵalatigo ni mnowu. 22 Kaneko Yehofa Mlungu ŵagumbile jwamkongwe kutyochela ku luŵalati lwaŵalutyosisye mwa mundu jula, ni ŵayiche najo jwamkongwejo kwa mundujo.

23 Pelepo mundu jula jwatite:

24 Ni ligongo lyakwe jwamlume chachaleka babagwe soni mamagwe ni kuja kulipwatika kwa ŵamkwakwe,* mwamti jemanjajo chachiŵa chilu chimpepe. 25 Wosope ŵanaŵaŵili ŵalume ni ŵakongwe ŵala ŵaliji makonope, nambo nganatendaga sooni.