Ngani Syambone Syaŵalembile Yohane

7 Payamasile yeleyi, Yesu ŵapitilisye kulalichila* ku Galileya. Jwalakwe nganasakaga kutenda yeleyi ku Yudeya ligongo kweleko Ayuda ŵasakaga kumwulaga. 2 Nambope, Chisangalalo cha Masakasa cha Ayuda chaliji chili chiŵandichile. 3 Myoyo achapwakwe Yesu ŵamsalile jwalakwejo kuti, “Atyoche akuno ni ajawule ku Yudeya, kuti nombenawo ŵakulijiganya ŵawo akalole yakutenda wawojo. 4 Pakuŵa pangali mundu jwakusatenda yindu mwakusisa naga ali mkusaka kuti jwalakwejo amanyiche kwa wosope. Myoyo yindu yakutendayi, ayilosyetu pameso pa ŵandu.” 5 Achapwakwe Yesuwo ŵaŵechete yeleyi ligongo lyakuti nganamkulupililaga jwalakwejo. 6 Myoyo Yesu ŵasalile jemanjajo kuti, “Ndaŵi jangu nganijiŵe kwana, nambo jemanja mpaka ajawule kweleko ndaŵi jilijose. 7 Chilambo nganichikola ligongo lililyose kuti chiŵenganeje ni jemanja, nambo chikusaŵengana ni une. Chikusatenda yeleyi ligongo ngusapeleka umboni wakuti masengo gakwe gali gakusakala. 8 Jemanja mjawuleje ku chisangalaloko. Nambo une nginjawula apanopano, ligongo ndaŵi jangu nganijiŵe kwana.” 9 Yesu paŵasalile jemanjajo yindu yeleyi, ŵasigalile ku Galileyako.

10 Nambo achapwakwe ŵala paŵapite ku chisangalalo kula, kaneko nombenajo Yesu ŵapite kukoko. Jwalakwe nganajawula mwakulilosya nambo mwakulisisa. 11 Myoyo Ayuda ŵatandite kumsosasosa jwalakwejo ku chisangalaloko. Ŵawusyanaga kuti, “Ana mundu jweleju ali kwapi?” 12 Soni ŵandu ŵajinji ŵaliji mkuŵechetana chapasipasi yakwamba jwalakwejo. Ŵane ŵaliji mkuŵecheta kuti, “Jwejula ali mundu jwambone.” Nambo ŵane ŵaŵechetaga kuti, “Jwejula nganaŵa mundu jwambone. Akusiŵasokonasya ŵandu.” 13 Pangali mundu jwalijose juŵaŵechetaga ya jwalakwejo pameso pa ŵandu ligongo ŵajogopaga Ayuda.

14 Sambano pa lisiku lyamcheche lya chisangalalocho, Yesu ŵapite ku nyumba ja Mlungu ni kutanda kwiganya. 15 Pelepo Ayuda ŵasimonjile mnope, mwamti ŵatandite kuŵecheta kuti, “Ana yikukomboleka chamtuli mundu jwakuti nganajawulejepo ku sukulu* kugamanyililaga Malemba chamti myiyi?” 16 Nambo Yesu ŵajanjile jemanjajo kuti, “Yindu yangusajiganya nganiyiŵa yangu, nambo yili ya jwele juŵandumile unejo. 17 Naga mundu akusaka kutenda yakusaka ya jwele juŵandumile unejo, mundu jwelejo chachimanyilila naga yangusajiganya yili yakutyochela kwa Mlungu kapena ngusaŵecheta ya mumtwe mwangu. 18 Jwalijose jwakuŵecheta ya mumtwe mwakwe akusalisosela jika uchimbichimbi. Nambo jwalijose jwakumsosela uchimbichimbi jwele juŵamtumile, mundu jwelejo ali jwakuwona soni mwa jwalakwejo mwangali unami. 19 Ana Mose ngaŵa ŵampele jemanja Chilamusi? Nambotu pangali atamose jumo mwa jemanja jwakusapikanila Chilamusicho. Ni ligongo chichi mkusaka kumbulaga une?” 20 Ŵanduwo ŵajanjile kuti, “Mmwejotu mkwete chiŵanda. Ŵani ŵakusaka kumwulaga?” 21 Yesu ŵajanjile jemanjajo kuti, “Ngambile kutendatu chindu chimpepe nambo jemanja wosope mkusimonga. 22 Myoyo, mganichisye ayi: Mose ŵampele jemanja lilamusi lyakwamba ya kuwumbala. Lilamusili nganilityochela kwa Mosejo nambo lyatyochele kwa achinangolo ŵakwe. Ni ligongo lyakwe jemanja mkusamwumbasya mundu atamose pa lisiku lya sabata. 23 Myoyo naga mkusamwumbasya mundu pa lisiku lya sabata kuti mkakasa Chilamusi cha Mose, sambano ligongo chichi mkundumbilila mnope panamposisye* mundu pa lisiku lya sabata? 24 Mleche kwalamula ŵane pakujigalila kawoneche kawo ka kusa, nambo mwalamuleje mwachilungamo.”

25 Kaneko ŵandu ŵane ŵakutama ku Yelusalemu peko ŵatandite kuŵecheta kuti, “Ana jweleju ngaŵa mundu jwakusaka kumwulaga jula? 26 Nambo alole, ngaŵa ni aju jwakuŵecheta kwa ŵanduju, nambotu jemanjajo pangali yakuŵecheta. Ana kapena ŵakulamulilaŵa sambano amanyilile nditu kuti jweleju ali Klistu? 27 Nambotu m’we tukumanyilila kwakutyochela munduju. Nambo Klistu pachachiyika pangali juchachimanyilila kwakutyochela.” 28 Kaneko Yesu ali mkati mwakwiganya ku nyumba ja Mlungujo, ŵaŵechete mwakwesya maloŵe kuti, “Jemanja mkumanyilila une, soni mkumanyilila kwangutyochela. Une nganiyika mwakusaka kwangu, nambo apali juŵandumile soni ali jusyesyene, soni jemanja ngamkummanyilila jwalakwejo. 29 Nambo une ngummanyilila jwalakwejo, ligongo nayiche m’lina lyakwe, soni Jwalakwejo ni juŵandumile une.” 30 Pelepo ŵakulamulila ŵa Ayuda ŵala ŵatandite kusosasosa mpata wakuti amkamule jwalakwejo, nambo pangali mundu juŵamkwayiye, ligongo ndaŵi jakwe jaliji mkanijikwane. 31 Nambope ŵandu ŵane ŵajinji ŵamkulupilile jwalakwejo, soni ŵaliji mkuŵecheta kuti, “Pachachiyika Klistujo, ana chachitendasoni yakusimonjesya yejinji kupunda yatesile aju munduju?”

32 Afalisi ŵapikene ŵandu ali mkukambilana mwakusongona yakwamba jwalakwejo. Myoyo ŵakulolela ŵakutaga mbopesi soni Afalisiwo ŵatumisye alonda kuti akamkamule* jwalakwejo. 33 Kaneko Yesu ŵatite, “Chindame ni jemanja kwa kandaŵi kamnono kaneko chimbujile kwa Jwele juŵandumile unejo. 34 Jemanja chimchisosasosa une, nambo ngasimumbata, soni kwachinjijawulako jemanja ngasimkombola kwika.” 35 Pelepo Ayudawo ŵatandite kukambilana kuti, “Ana mundu jweleju akusaka kwawula kwapi, kwele m’weji nganituŵa tumpatile? Ana kapena akusaka kwawula kwa Ayuda ŵakutama pasikati pa Agiliki kuti akajiganyeje Agilikiwo? 36 Ana mundu jweleju akugopolela chichi pakuŵecheta kuti, ‘Jemanja chimchisosasosa une, nambo ngasimumbata, soni kwachinjijawulako jemanja ngasimkombola kwika’?”

37 Sambano pa lisiku lyakumalisya lya chisangalalo chila, lyele lyalijisoni lisiku lyakusosekwa mnope, Yesu ŵajimi ni kuŵecheta mwakwesya maloŵe kuti, “Jwalijose jwajimkwete njota ayiche kwa une ni chinjimpa mesi kuti amwe. 38 Mpela mwalikusaŵechetela lilemba, jwalijose jwakungulupilila une, ‘Mwa jwalakwejo muchikopoka sulo sya mesi gakupeleka umi.’” 39 Pakuŵecheta yeleyi, Yesu jwasalaga ya msimu weswela wele ŵandu ŵaŵamkulupilile ŵaliji ali asigele panandi kuwupochela. Pandaŵiji jemanjaji ŵaliji mkanaŵe kuwupochela ligongo Yesujo ŵaliji mkanapochele uchimbichimbi. 40 Ŵandu ŵane pelepo paŵapikene maloŵe gelega, ŵatandite kuŵecheta kuti, “Nditu aju ali jwakulochesya juŵamsasile kuti chachiyika?” 41 Ŵane ŵaŵechetaga kuti, “Aju ali Klistu.” Nambo ŵane ŵaŵechetaga kuti, “Ana Klistu mpaka atyochele ku Galileya? 42 Ana ngati pana lilemba lyalikusasala kuti Klistu chachityochela mwa mwanache jwa Daudi soni ku Betelehemu, m’musi wele Daudi ŵatamaga?” 43 Myoyo ŵanduwo ŵakwete nganisyo syakulekanganalekangana pakwamba ya jwalakwejo. 44 Nambope, ŵandu ŵane pelepo ŵasakaga kumkamula* jwalakwejo, nambo pangali juŵamkwayiye.

45 Kaneko alonda ŵala ŵawujile kwa ŵakulolela ŵakutaga mbopesi soni Afalisi ŵala. Jemanjajo ŵawusisye alondawo kuti, “Ligongo chichi nganimumkamula ni kwika najo akuno?” 46 Alondawo ŵajanjile kuti, “Pangali mundu jwalijose juŵaŵechetepo mpela mwakuŵechetela mundu jweleju.” 47 Pelepo Afalisiwo ŵajanjile kuti, “Ana jemanjasoni amsokonasisye nganisyo? 48 Ana pana jwakulamulila jwalijose kapena Mfalisi jwakumkulupilila mundu jweleju? 49 Nambo ŵandu ŵangamanyilila Chilamusiŵa ali ŵalweseche* basi.” 50 Nikodemo, jwele ŵapite kwa Yesu pandanda soni juŵaliji jumo mwa Afalisiwo, jwasalile achimjakwewo kuti, 51 “Pajatu Chilamusi chetu chikusasala kuti, mundu mkanitumlamule tukusosekwa chandanda kumpikanila kaje kuti tumanyilile yatesile, ngaŵa myoyo?” 52 Jemanjajo ŵamjanjile jwalakwejo kuti, “Ana kapena mmwejisoni mli jwakutyochela ku Galileya eti? Mwungunye m’Malemba soni ngasimpata paŵalembile kuti ku Galileya kuchityochela jwakulochesya jwalijose.”*