Chikalata Chakwawula kwa Agalatiya

4 Sambano ngusaka namsalile kuti, naga jwakupochela chipanje ali mwanache, jwalakwe jwangalekangana ni kapolo atamose kuti akusaŵa msyene jwa yindu yosope. 2 Jwalakwe akusaŵaga pasi pa ŵakulela ŵanache soni ŵakulolela nyumba ja atati ŵakwe mpaka pandaŵi jiŵaŵisile atati ŵakwewo kuti chachimpa chipanjecho. 3 M’wejisoni patwaliji ŵanache, twaliji achikapolo ŵa yindu yauwanache ya m’chilambochi. 4 Nambo ndaŵi jakwe pajakwanile, Mlungu ŵamtumisye Mwanache jwakwe. Mwanacheju jwapagwile kwa jwamkongwe soni jwaŵele pasi pa chilamusi. 5 Yeleyi yaŵele myoyo kuti ŵawombole ŵele ŵali pasi pa chilamusi mwakwasuma, ni chakulinga chakuti Mlungu atujigale kuŵa ŵanache ŵakwe.

6 Sambano ligongo lyakuti tuli ŵanache ŵakwe, Mlungu ŵatutumichisye msimu weswela wawuli mwa Mwanache jwakwe kuti uŵe m’mitima jetu. Msimu welewu ni wawukusatutendekasya kuti tuŵilanjeje kuti “Abba,* Atati!” 7 Jwalijose mwa jemanja nganaŵasoni kapolo nambo ali mwanache. Myoyo naga jwalijose ali mwanache nikuti Mlungu amtesilesoni kuŵa jwakupochela chipanje.

8 Atamose kuti yili myoyo, pandaŵi jele jemanja nganimummanyililaga Mlungu mwaliji achikapolo ŵa milungu jaunami. 9 Pakuŵa sambano mummanyilile Mlungu, kapena tujile kuti sambano mli ŵakumanyika kwa Mlungu, ligongo chichi mkuwujilasoni ku yindu yauwanache yayili yangakamuchisya soni yangali masengo? Ligongo chichi mkusaka kuŵasoni achikapolo ŵa yindu yeleyi? 10 Jemanja mtanditesoni kugawona masiku, myesi, nyengo,* soni yaka kuŵa yakusosekwa mnope. 11 Sambano ngutenda woga kuti mwine masengo gangamwile pa jemanja mpaka gaŵe gangali mate.

12 Achalongo achimjangu, ngumŵenda kuti mŵe mpela mumbelele une, ligongo une kala nalijisoni mpela mwamŵelele jemanja. Jemanja nganimulemwechesya une chilichose. 13 Nambo jemanja mkumanyilila kuti une nakwete upile wakumlalichila ngani syambone paulendo wandanda ligongo lyakuti naliji mkulwala. 14 Atamose kuti ulwele wangu waliji mpela chakusawusya kwa jemanja, nambope nganimunyosya kapena kumbona kuŵa jwakunyalaya.* Jemanja mwambochele mpela lilayika lya Mlungu, kapena mpela Klistu Yesu. 15 Nambi chisangalalo chenu chila chili kwapi? Pakuŵa ngutendela umboni kuti jemanja mwaliji ŵakoseka atamose kukolotola meso genu ni kumba une, yikaŵe kuti yeleyi yili yakomboleka. 16 Ana sambano mbele mdani jwenu ligongo lyakuti ngumsalila yakuwona? 17 Ŵandu ŵane akutenda yiliyose yakomboleka kuti jemanja mjigaliche, nambo ngaŵa kuti akutenda yeleyi pamagongo gambone. Akusaka kumtalikanganya jemanja ni une, ni chakulinga chakuti mwakuyeje jemanjajo. 18 Nambope, mpaka yiŵe chenene naga mundu akumsosasosa jemanja pamagongo gambone. Nambo yeleyi yitendekweje ndaŵi syosope ngaŵaga pandaŵi jandili ni jemanjape. 19 Naga yili myoyo, nikuti yichiŵa chenene ni jemanja ŵanache ŵangu. Ligongo lya jemanja, une ndandilesoni kupikana kupweteka kwakusakupikana jwamkongwe pakuŵeleka, soni yeleyi chiyipitilisye mpaka ndamo sya Klistu sili siwonechele* chenene mwa jemanja. 20 Une nganonyele kuŵa kweleko kuti mbe ni jemanja, soni kuti namsalile maloŵe gelega m’litala line ligongotu une ngangupikanichisya kuti chikumtendechela chichi jemanja.

21 Jemanja ŵamli pasi pa Chilamusi, musalile, Ana ngamkusapikana Chilamusicho pachikuŵalanjidwa? 22 Mwachisyasyo, Malemba gakusati Abulahamu ŵakwete ŵanache ŵachalume ŵaŵili, jumo ŵamŵeleche kwa jwamkongwe jwaŵaliji kapolo, soni jwine ŵamŵeleche kwa jwamkongwe jwaŵaliji mfulu.* 23 Mwanache juŵapali kwa jwamkongwe juŵaliji kapolo jula, jwapali mpela mwakusapagwila ŵanache ŵane wosope, nambo jwele juŵapali kupitila mwa jwamkongwe juŵaliji mfulu jula, jwapali ligongo lya chilanga. 24 Yindu yeleyitu yikwete ngopolelo jine. Achakongwe ŵeleŵa akwimila yilangano yiŵili. Chilangano chandanda chili cha pa Litumbi lya Sinai. Chilanganochi chikusatendekasya ŵanache kuti apagweje mpela achikapolo. Chilangano chelechi chikwimila Hagala jula. 25 Sambano Hagala akwimila Sinai. Lyeleli lili litumbi lya ku Alabiya, soni Hagalaju akulandana ni Yelusalemu masiku agano, pakuŵa Yelusalemu ali mu ukapolo pampepe ni ŵanache ŵakwe. 26 Nambo Yelusalemu jwakwinani ali mfulu, soni jwalakwejo ali mama ŵetu.

27 Paja Malemba gakusati, “Mmwe ŵakongwe ŵangaŵeleka, msangalale. Mgumile mnope ni chisangalalo mmwe ŵakongwe ŵanganimpikaneje yakupweteka ya pakuŵeleka. Pakuŵa ŵanache ŵa jwamkongwe jwele ŵamlesile* ali ŵajinji kupunda ŵanache ŵa jwamkongwe jwakwete ŵalume.” 28 Sambano jemanja achalongo achimjangu mli ŵanache ŵachilanga, mpela mujwaŵelele Isaki. 29 Nambotu mwanache jwaŵapali mpela mwakusapagwila ŵanache wosope jula, ŵamlagasyaga mwanache juŵapali mwa msimu. Mwelemu ni mwayiŵelelesoni masiku agano. 30 Ana Malemba gakusati uli pa nganiji? Gakusati, “Mumtopole jwamkongwe jwali kapolojo pampepe ni mwanache jwakwe, pakuŵa mwanache jwa kapolojo ngasapochela nawo chipanje yimpepe ni mwanache jwa jwamkongwe jwali mfulu.” 31 Myoyo achalongo achimjangu m’weji nganituŵa ŵanache ŵa jwamkongwe jwali kapolo, nambo tuli ŵanache ŵa jwamkongwe jwali mfulu.