Ngani Syambone Syaŵalembile Yohane

4 Sambano Yesu* ŵayimanyi kuti Afalisi apikene kuti jwalakwe akwiganya soni kubatisya ŵandu ŵajinji kumpunda Yohane. 2 (Nambo yisyesyene yakwe yaliji yakuti ŵakulijiganya ŵakwe ni ŵaŵabatisyaga ŵandu, ngaŵaga Yesu.) 3 Paŵapikene yeleyi, jwalakwe ŵatyosile ku Yudeya ni kwawulasoni ku Galileya. 4 Nambo jwalakwe ŵasosekwe kuti apitile ku Samaliya. 5 Myoyo ŵayiche mu msinda wa Sukali ku Samaliya, chiŵandika mgunda wele Yakobo ŵawupeleche kwa Yosefe, mwanache jwakwe. 6 Kweleko ni kuchaliji chisima cha Yakobo. Sambano Yesu ŵapesile ni ulendowo ni ŵatemi pachisimapo. Pelepo ndaŵi jaliji cha mma 12 koloko* musi.

7 Kaneko jwayiche jwamkongwe jwa ku Samaliya peko kukuteka mesi. Ni Yesu ŵamŵendile kuti, “Angayile mesi gakumwa mayi.” 8 (Pandaŵiji, ŵakulijiganya ŵakwe ŵaliji ali ajinjile mumsinda kukusuma yakulya.) 9 Jwamkongwe jwachisamaliyajo ŵamwusisye Yesu kuti “Ligongo chichi wawojo, ŵali Myuda, akumbenda une jwamkongwe jwachisamaliya kuti nape mesi gakumwa?” (Pakuŵa Ayuda nganapikanganaga ni Asamaliya.) 10 Yesu ŵamjanjile jwamkongwejo kuti, “Akawumanye mtuka walulele wa Mlungu soni akammanye jwakwasalila wawojo kuti, ‘Ambe mesi gakumwa,’ akamŵendile jwalakwejo, soni jwalakwejo akapele mesi gaumi.” 11 Pelepo jwamkongwejo ŵamjanjile Yesu kuti, “Ambuje, wawo nganakola chakutechela mesi, soni chisimachi chili chakusokoka mnope. Sambano mesi gaumigo chakagajigale kwapi? 12 Ana wawojo ali ŵakupunda nangolo jwetu Yakobo? Jwalakwejo ni juŵatupele chisimachi, soni ŵamwelaga pa chisima chelechi yimpepe ni ŵanache ŵakwe soni ng’ombe syakwe.” 13 Yesu ŵamjanjile jwamkongwejo kuti, “Jwalijose jwakumwa mesi aga, jichimkolasoni njota. 14 Nambo jwalijose jwakumwa mesi gangumpa une, ngasijimkolasoni njota ata panandi, soni mesi gele chinjimpago gachiŵa mwa jwalakwejo mpela nduluko ja mesi gakumpa umi wangamala.” 15 Pelepo jwamkongwejo ŵamsalile Yesu kuti, “Ambuje, ambe mesi gelego, kuti jikasijingolasoni njota, soni kuti ngayikaga akuno kukuteka mesi.”

16 Kaneko Yesu ŵamsalile jwamkongwejo kuti, “Mayi, ajawule akaŵilanje ŵamkwawo kuti ayiche akuno.” 17 Jwamkongwejo ŵajanjile kuti, “Unetu nganingola ŵalume.” Pelepo Yesu ŵamsalile kuti, “Asasile yisyene paŵechete kuti, ‘Nganingola ŵalume.’ 18 Pakuŵa wawojo aŵele mkulombedwa ni achalume msano, soni ŵalume ŵakutama nawo apano nganaŵa ŵamkwawo. Pelepatu aŵechete yisyene.” 19 Jwamkongwejo ŵamsalile Yesu kuti, “Ambuje, nayimanyi kuti wawojo ali jwakulochesya. 20 Achinangolo ŵetu ŵamtindiŵalilaga Mlungu pa litumbi ali, nambo jemanja mkusati Yelusalemu gali malo gele ŵandu akusosekwa kumtindiŵalila Mlungu.” 21 Yesu ŵamsalile jwamkongwejo kuti, “Nditu ngwasalila wawo mayi, ndaŵi jichiyika jele jemanja ngasimwatindiŵalila Atati mu litumbi ali kapena ku Yelusalemu. 22 Jemanja mkusatindiŵalila changamkuchimanyilila. M’weji tukusatindiŵalila chatukuchimanyilila, ligongo chikulupusyo chikusatyochela kwa Ayuda. 23 Nambope ndaŵi jichiyika, soni jili jinojino, jele ŵakutumichila ŵakuwona chachatindiŵalila Atati mwakulongoleledwa ni msimu soni mwakamulana ni yayili yisyesyene. Nditu, Atati akusaka ŵandu mpela ŵelewo kuti ŵatindiŵalileje ŵalakwewo. 24 Mlungu ali msimu, soni wosope ŵakumtumichila jwalakwe akusosekwa kumtindiŵalila mwakulongoleledwa ni msimu soni mwakamulana ni yayili yisyesyene.” 25 Jwamkongwejo ŵamsalile Yesu kuti, “Ngumanyilila kuti Mesiya akwika, jwakolanjidwa kuti Klistu. Pachachiyika jwalakwejo, chachitusalila yosope yene chenenepe.” 26 Pelepo Yesu ŵamsalile jwamkongwejo kuti, “Mundu jwakwambajo ni une.”

27 Pandaŵi jijojo, ŵakulijiganya ŵakwe ŵakopochele. Jemanjaji ŵasimonjile mnope kumwona Yesu ali mkuŵechetana ni jwamkongwe. Nambope pangali jumo mwa jemanjajo juŵamwusisye kuti “Akusaka chichi kwa jwamkongweju?” kapena kuti, “Ligongo chichi akuŵechetana ni jwamkongweju?” 28 Myoyo jwamkongwe jula ŵalesile lulo lwakwe lwa mesi ni ŵapite mumsinda kukwasalila ŵandu. 29 Ŵatite, “Kwende akamlole mundu jwele asalile une yosope yambele ndili mkutenda. Ana jweleju ngaŵa Klistu jula?” 30 Jemanjaji ŵakopweche mumsindamo ni kutanda kwawula kuŵaliji Yesu.

31 Pandaŵiji ŵakulijiganya ŵala ŵatandite kumŵenda Yesu kuti, “Labi, alye.” 32 Nambo jwalakwe ŵajanjile jemanjajo kuti, “Unetu ngwete chakulya chele jemanja ngamkuchimanyilila” 33 Pelepo ŵakulijiganyawo ŵatandite kuŵechetana kuti, “Ana kapena apali jwampele chakulya?” 34 Yesu ŵasalile jemanjajo kuti, “Chakulya changu chili kutenda yakusaka ya jwele juŵandumile une, soni kumalisya masengo gakwe. 35 Ana jemanja ngamkusaŵecheta kuti kusigele myesi mcheche kuti ndaŵi jakugowola jiyiche? Nambo une ngumsalila jemanja kuti, Mkwesye meso genu soni mlole m’migundamo kuti ajino jili ndaŵi jakugowola. 36 Mwamti apano jwakugowola akupochela malipilo soni akusonganganya yisogosi ku umi wangamala, kuti jwakumisa mbeju soni jwakugowola asangalalile pamo. 37 Ni ligongo lyakwe maloŵe gala gali gakuwona, gagakusati, Jwakupanda jwine, soni jwakugowola jwine. 38 Une namtumisye jemanja kuti mkagowole yele nganimkamulilapo masengo. Ŵane ŵakamwile masengo nambo jemanja mkupindula ni masengo gawogo.”

39 Asamaliya ŵajinji ŵakutyochela mumsindamo ŵamkulupilile Yesu ligongo lya umboni wa jwamkongwe jula wakuti, “Asalile une yosope yambele ndili mkutenda.” 40 Myoyo Asamaliyawo ŵayiche kwa Yesu ni kumŵenda kuti atame nawo, mwamti jwalakwe ŵatemi nawo kwa masiku gaŵili. 41 Yakuyichisya yakwe yaliji yakuti Asamaliya ŵane ŵajinji ŵakulupilile ligongo lya yindu yaŵaŵechete jwalakwe. 42 Jemanjaji ŵamsalile jwamkongwejo kuti, “Apano ngaŵa kuti tukukulupilila ligongo lya maloŵe gamtusalile gala iyayi, pakuŵa tulipikanile achimsyewe sambano, soni tukumanyilila kuti mundu jweleju nditu ali mkulupusyo jwa chilambo.”

43 Ali atemi nawo kwa masiku gaŵiligo, jwalakwe ŵatyosile ni kwawula ku Galileya. 44 (Yesu jwatendele umboni kuti jwakulochesya jwangachimbichikwa kumangwakwe.) 45 Sambano Yesu paŵayiche ku Galileya, ŵandu ŵa ku Galileyako ŵampochele chenene, ligongo ŵayiweni yindu yosope yaŵatesile jwalakwe pa chisangalalo ku Yelusalemu, pakuŵa jemanjajisoni ŵapite ku chisangalaloko.

46 Kaneko jwalakwe ŵayiche mu msinda wa Kana ku Galileya. Kweleku ni kuŵasandwisye mesi kuŵa finyo kula. Sambano papali mundu jwine juŵaliji nduna ja boma jwele mwanache jwakwe jwamlume jwaliji mkulwala ku Kapelenawo. 47 Munduju ŵapikene kuti Yesu ayiche ku Galileya kutyochela ku Yudeya. Myoyo ŵayiche kwa Yesu ni kumŵenda kuti ajawule kumangwakwe kuti akamposye* mwanache jwakwe. Mwanacheju jwaliji ali asigele panandi kuwa. 48 Nambo Yesu ŵamsalile jwalakwejo kuti, “Jemanja ngasimkulupilila ata panandi naga ngamkuyiwona yimanyisyo soni yakusimonjesya.” 49 Pelepo nduna ja bomajo jamsalile Yesu kuti, “Ambuje, kwende tujawule mwanangu mkanawe.” 50 Nambo Yesu ŵamsalile kuti, “Jawulagani, mwanache jwenu aposile.” Mundujo jwakulupilile maloŵe gaŵamsalile Yesugo, kaneko ŵanyakwiche. 51 Nambo ali mwitala, ŵasimene ni achikapolo ŵakwe ŵaŵayikaga kukumsalila kuti mwanache jwakwe aposile. 52 Jwalakwe ŵawusisye achikapolowo ya ndaŵi jiŵaposile mwanachejo. Jemanjajo ŵamjanjile kuti, “Ulwele wa malungowo* umasile liso cha mma 1 koloko* musi.” 53 Mtatijo jwayimanyi kuti jaliji ndaŵi jijojo jele Yesu ŵamsalile jwalakwe kuti, “Mwanache jwenu aposile.” Pambesi pakwe jwalakwe pampepe ni ŵamwiŵasa mwakwe wosope ŵakulupilile. 54 Chelechi chaliji chakusimonjesya chaŵili chiŵatesile Yesu paŵayiche ku Galileya kutyochela ku Yudeya.