Chikalata Chakwawula kwa Agalatiya

5 M’weji tukwete ufulu* welewu ligongo Klistu ni juŵatugopwele ku ukapolo wa Chilamusi. Myoyo jemanja mŵeje ŵakulimbangana, soni mkakunda kuti mŵesoni achikapolo.

2 Mpikane jemanja, une Paulo ngumsalila kuti naga mkuwumbala nikuti yatesile Klistu kwa jemanja yichiŵa yangali masengo. 3 Ngusaka namkumbusye jwalijose kuti naga mundu akuwumbala jwalakwejo akusosekwa kukuya yosope yayili mu Chilamusi. 4 Jemanja ŵamkusaka kuŵa ŵakulungama ligongo lyakukuya chilamusi, mli ŵakutalikangana ni Klistu. Soni nganimŵa ŵakuŵajilwa kupochela umbone mtima wakwe wekulungwa. 5 Nambo kwa m’weji, msimu weswela ukutukamuchisya kwembecheya ndaŵi jatuchiŵa ŵakulungama ligongo lya chikulupi. 6 Kwa ŵakumkuya ŵa Klistu Yesu, chinga mundu ali jwamwumbale kapena jwangawumbala, yeleyo yangali masengo. Nambo chakusosekwa mnope chili kola chikulupi chele chikusakamula masengo ligongo lya chinonyelo.

7 Jemanja mwaliji mkuwutuka chenene. Ana ŵani ŵamsokonasisye kuti mleche kupikanila yayili yisyesyene? 8 Yeleyitu nganiyiŵa yakutyochela kwa jwele juŵamŵilasile jemanja. 9 Yakusasaŵisya yamnono yikusasasaŵisya mtanda wosope. 10 Ngukulupilila kuti jemanja ŵamli ŵakamulana ni Ambuje mkwitichisya yanguŵechetayi. Nambo mundu jwakutandisya yakumsokonasyayi, chinga aŵe mundu jwamtuli, chachipochela chilango* chakumŵajila. 11 Achalongo achimjangu, yikaŵe kuti ngupitilisya kulalichila ngani ja kuwumbala, ana ŵandu akapitilisye kundagasya? Yikaŵe kuti ngulalichilape ngani ja kuwumbala nikutitu chitela chakulagasichila* ngamkanichiŵasoni chakwakuŵasya ŵandu. 12 Une nganonyele kuti ŵandu ŵakulinga kumsokonasyawo akagambile kulichela* achimsyene.*

13 Achalongo achimjangu, jemanja mwaŵilanjidwe kuti mŵe ŵaufulu. Nambotu mkakamulichisyaga masengo ufulu welewu pakusaka kutenda yakumbila ya chilu. Mmalomwakwe mtumichilaneje mwachinonyelo. 14 Pakuŵa Chilamusi chosope chikusakwanilichikwa mu lilamusi limo, lyakuti, “Mumnonyeleje mjenu mpela mwamkusalinonyelela mwasyene.” 15 Nambo naga mkutanda kulumana soni kutawunana, msamale kogopela kuti chimwulasyane.

16 Une ngumsalila kuti, mpitilisye kwenda mwakulongoleledwa ni msimu weswela. Naga mkutenda myoyo, ngasimkuya yakumbila ya chilu. 17 Pakuŵa yakumbila ya chilu yikusalimbana ni msimu weswela, soni msimu weswela ukusalimbana ni chilu. Yindu yeleyi yikusatamila kulimbana mwamti jemanja mkusalepela kutenda yindu yamkusaka. 18 Konjechesya pelepa, naga msimu weswela ukumlongolela jemanja, nikuti nganimŵasoni pasi pa chilamusi.

19 Sambano masengo ga chilu cha ulemwa gakusawonechela chenene. Masengo gakwe gali chikululu,* yausakwa, ndamo jakuli­jasilila,* 20 kutindiŵalila milungu jakusepa, kutenda yamisimu,* uŵengani, ukangani, jelasi,* ­kupya ­mtima, ­ungapikangana, kugaŵikangana, kutandisya magulu gakwimuchila, 21 kumbila ya ŵane, kukolelwa, yisangalalo yangalondeka,* soni yindu yine yakulandana ni yeleyi. Mpela munatendele pakumsalila pandanda pala kuti msamale, ngumsalilasoni jemanja pakwamba yindu yeleyi kuti wosope ŵakusatenda yindu yeleyi ngasapochela Uchimwene wa Mlungu.

22 Nambo msimu weswela ukusamkamuchisya mundu kola ndamo mpela chinonyelo, chisangalalo, mtendele, kuwusimana mtima, umbone mtima, kutenda yambone, chikulupi, 23 kufasa,* soni kulilekasya. Pakwamba ya ndamo mpela syelesi, pangali lilamusi lyakumlekasya mundu kusilosya. 24 Nambosoni ŵele ŵali ŵakwe ŵa Klistu Yesu ŵachikomele pachitela chilu chawo pampepe ni yakusaka soni yakumbila ya mitima jawo.

25 Naga tukutama mwakulongoleledwa ni msimu weswela, kwende tupitilisye kwenda mwakulongoleledwa ni msimuwo. 26 Tukaŵa ŵakulikwesya, tukatandisyaga ukangani, soni tukatendelanaga jelasi.