Esitele

9 Lisiku lya 13 lya mwesi wa 12 wawuli mwesi wa Adala,* lyaliji lisiku lyakuti maloŵe ga mwenye soni lilamusi lyawo yikamule masengo. Palisiku lyeleli adani ŵa Ayuda ŵajembecheyaga kuti chiŵagomeche Ayudawo. Nambo yayatendekwe yaliji yakulekangana ni yeleyi. Ayuda ŵagomeche ŵandu ŵaŵaŵengaga jemanjajo. 2 Ayudawo ŵasongangene m’misinda jawo, m’yigawo* yosope ya Mwenye Ahasiwelo kuti alimbane ni jwalijose jwakusaka kwawulasya. Nambo pangali juŵakombwele kwagomeka jemanjaji, pakuŵa ŵandu wosope ŵajogopaga Ayudaŵa. 3 Ŵakulolela wosope ŵa m’yigawo, ŵakwalolela achibwanamkubwa, achibwanamkubwa wosope soni ŵandu ŵaŵalondesyaga malonda ga mwenye ŵaliji mkwakamuchisya Ayuda ligongo lyakuti jemanjaji ŵamjogopaga Moledekayi. 4 Sambano Moledekayi jwatandite kola machili mnope m’nyumba ja mwenye, mwamti jwalakwe jwamanyiche mnope mu yigawo yosope ya umwenyewo. Yaliji myoyo ligongo lyakuti Moledekayi jwapitilisyagape kuŵa jwamachili.

5 Ayudawo ŵawuleje ni kwamala adani ŵawo wosope ni upanga.* Jemanjaji ŵatesile yiliyose yaŵasachile kwatenda ŵandu ŵaŵaŵengagawo. 6 Ku Susani,* msinda waumwenye wakola yakulichenjela,* Ayuda ŵawuleje ŵandu ŵakwana 500. 7 Nambosoni Ayudawo ŵamwuleje Palisandata, Dalifoni, Asipata, 8 Polata, Adaliya, Alidata, 9 Palamasita, Alisayi, Alidayi soni Faisata. 10 Wosopeŵa ŵaliji ŵanache ŵakwana 10 ŵa Hamani, mwanache jwa Hamedata juŵaliji mdani jwa Ayuda. Nambo ali ŵawuleje jemanjaji, Ayudawo nganajigala katundu jwawo.

11 Palisiku lyelelyo, lipoti lyayiche kwa mwenye lyakwamba ya winji wa ŵandu ŵaŵawulajidwe ku Susani,* msinda waumwenye wakola yakulichenjela.*

12 Sambano mwenyewo ŵamsalile Esitele ŵamkwakwewo kuti, “Ku Susani* kuno, wawuli msinda waumwenye wakola yakulichenjela,* Ayuda ŵawuleje ŵandu ŵakwana 500 ni kwamala pampepe ni ŵanache 10 ŵa Hamani. Naga ku Susani kuno atesile yeleyi, nikutitu ku yigawo yine ya umwenyewu atesile yakupunda pelepo. Sambano musalilesoni chine chamkusaka kuŵenda. Une chinamtendele. Mkusaka kuŵendasoni chichi? Yiliyose yamkusaka chiyitendekwe.” 13 Pelepo Esitele ŵajanjile kuti, “Naga mpaka yasangalasye wawojo mwenye, nguŵenda kuti ŵakunde Ayuda ŵakutama ku Susani* kuti malaŵi atendesoni yalikusala lilamusili. Nambosoni nguŵenda kuti ŵanache ŵakwana 10 ŵa Hamani ŵakoleche pa chitela.” 14 Myoyo mwenye ŵalamwile kuti yeleyi yitendekwe. Mwenyewo ŵapeleche lilamusi lyakwamba yeleyi ku Susani,* mwamti ŵanache ŵakwana 10 ŵa Hamani ŵakoleche pachitela.

15 Palisiku lya 14 lya mwesi wa Adala, Ayuda ŵasongangenesoni pampepe ku Susani,* mwamti ŵawuleje ŵandu ŵakwana 300 ku Susaniko,* nambo nganajigala katundu jwawo.

16 Nambosoni Ayuda ŵane wosope ŵakutama m’yigawo yine ya umwenyewo ŵasongangenesoni pampepe kuti alichenjele. Jemanjaji ŵawuleje soni kwamala adani ŵawo ŵaŵaŵengaga ŵakwana 75,000, nambo nganajigala katundu jwawo. 17 Ŵatesile yeleyi pa lisiku lya 13 lya mwesi wa Adala, soni pa lisiku lya 14 jemanjajo ŵapumwile. Nambosoni ŵalitesile lisiku lyeleli kuŵa lyakutenda pwando soni lyakusangalala.

18 Ayuda ŵa ku Susani* ŵasongene pampepe palisiku lya 13 soni palisiku lya 14. Nambo palisiku lya 15 jemanjaji ŵapumwile, mwamti ŵalitesile lisikuli kuŵa lisiku lyakutenda pwando soni lyakusangalala. 19 Lyeleli ni ligongo lyakwe Ayuda ŵaŵatamaga m’misinda jine kusa kwa msinda wa Susani, ŵalitesile lisiku lya 14 lya mwesi wa Adala kuŵa lisiku lyakusangalala soni lyakutenda pwando. Lyeleli lyaliji lisiku lyakusangalala soni lyakugaŵana yakulya.

20 Moledekayi ŵayilembile yakutendekwayi soni ŵatumichisye yikalata Ayuda wosope ŵaŵatamaga m’yigawo yosope ya Mwenye Ahasiwelo, chinga ŵaŵaliji kwakutalika kapena kwakuŵandika. 21 Jwalakwe ŵalamwile jemanjaji kuti chaka chilichose atendeje chisangalalo palisiku lya 14 soni lya 15 lya mwesi wa Adala. 22 Ŵasalile yeleyi ligongo lyakuti pa masiku gelega adani ŵawo nganiŵalagasya Ayudaŵa. Mwamti mwesi welewu kudandawula kwawo kwachenjile ni kuŵa kusangalala, soni lisiku lyawo lyakulila lyasandwiche lisiku lyachisangalalo. Jemanjaji ŵasosekwaga kutenda pwando soni chisangalalo pa masiku gelega. Soni masiku gelega gasosekwaga kuŵa ndaŵi jakugaŵana yakulya soni kupeleka mituka kwa ŵandu ŵakulaga.

23 Ayudawo ŵakamulene kuti chapitilisye kutenda chisangalalo chaŵachitanditecho, soni ŵakamulene kuti chatendeje yaŵalembele Moledekayi. 24 Yeleyi yaliji myoyo ligongo lyakuti Hamani mwanache jwa Hamedata juŵaliji jwa mumbumba ja Agagi, mdani jwa Ayuda wosope jula, jwatesile pulani jakuti ŵawulaje Ayuda wosope. Nambosoni jwalakwe jwatesile Puli, kugopolela kuti Kalotalota,* ni chakulinga chakuti ŵasokonasye Ayuda wosope ni kwawulaga. 25 Nambo Esitele paŵayiche pameso pa mwenye, mwenyewo ŵalamwile ŵandu kuti alembe lilamusi lyakuti, “Yindu yakusakala yaŵasakaga jwalakwejo kwatendela Ayuda, yimwujile msyene pejo.” Mwamti ŵamkoleche jwalakwejo pachitela yimpepe ni ŵanache ŵakwe. 26 Ni ligongo lyakwe masiku gelega ŵagapele lina lyakuti Pulimu pakujigalila lina lyakuti Puli.* Myoyo ligongo lya yindu yosope yaŵayilembile m’chikalatacho soni yindu yele jemanjajo ŵayiweni pakwamba mwajajendele nganiji, nambosoni pakulola yayatendechele jemanjajo, 27 Ayuda ŵalolechesyaga kuti akusangalala pa masiku gaŵili gelega. Nambosoni ŵatendaga yosope yayalembedwe m’chikalatacho pakwamba ya jemanjajo. Ŵatendaga yeleyi yimpepe ni ŵanache ŵawo soni ŵandu wosope ŵaŵasakaga kutenda nawo mwambowo chaka chilichose pandaŵi jiŵajitamilikasisye. 28 M’bado* uliwose, liŵasa lililyose, chigawo chilichose soni msinda uliwose, wasosekwaga kuwukumbuchila mwambo welewu ni kuwutendaga. Mwamti Ayuda ngakusosekwa kuleka kukumbuchila masiku ga Pulimu gelega, soni ŵanache ŵawo ngakusosekwa kugaliŵalila masiku gelega.

29 Kaneko Esitele ŵamkwawo mwenyewo, mwanache jwa Abihayilo, ni Moledekayi Myuda jula, mwakamulana ni machili gosope ga ulamusi waŵakwete, ŵalembile chikalata chaŵili chakusimichisya yakwamba Pulimu. 30 Jwalakwe ŵatumisye yikalatayi mu yigawo yosope yaŵatamaga Ayuda yakwana 127 yayaliji mu ulamusi wa Ahasiwelo. Pakulemba yikalatayi ŵakamulichisye masengo maloŵe gamtendele soni gasyesyene. 31 Ŵatesile yeleyi pakusaka kusimichisya kuti chisangalalo cha Pulimu chitendekweje pa masiku gaŵagatamilikasisye mwakamulana ni yaŵalamwile Moledekayi Myuda soni Esitele ŵamkwawo mwenye kuti jemanjaji atendeje. Nambosoni ŵatesile yeleyi mwakamulana ni yele jemanjaji ŵasimichisye kuti atendeje pampepe ni ŵanache ŵawo ŵakwika msogolo, yayapwatikagapo kulijima kulya soni kupopela. 32 Myoyo yaŵalamwile Esitele yasimichisye ngani syelesi syakwamba Pulimu, mwamti ŵayilembile m’buku.