Chikalata Chandanda Chakwawula kwa Akolinto

13 Naga ngusaŵecheta yiŵecheto yachilendo kapena ya malayika nambo ndili jwangali chinonyelo, nikuti ndili mpela chisyano chagamba kusinganga kapena chinganga* chachikutenda masegwe. 2 Naga ngwete mtuka wakusala yamsogolo soni wakumanyilila yakusisika yosope ya Mlungu kapena mtuka wakumanyilila yindu yosope, nambosoni naga ngwete chikulupi chakombola kusejesya* nacho matumbi nambo ndili jwangali chinonyelo, nikuti ndili jwangali mate.* 3 Naga ngusumisya yangu yosope kuti nakamuchisye ŵakulaga, soni naga ngupeleka chilu changu mpela mbopesi nambo ndili jwangali chinonyelo, pangali chilichose changupata.

4 Chinonyelo chili chakuwusimana mtima* soni chaumbone mtima. Chinonyelo changatenda jelasi.* Chinonyelo changalilapilila soni changalikwesya. 5 Chinonyelo changatenda yindu yangaŵajilwa,* changatenda yakusaka yakwepe, soni changatumbila. Chinonyelo changasunjila ŵane magongo.* 6 Chinonyelo changasangalala ni yindu yangali chilungamo, nambo chikusasangalala ni yindu yayili yakuwona. 7 Chinonyelo changajasa mtima, chikusakulupilila yindu yosope, chikusajembecheya yindu yosope, soni chikusapilila yindu yosope.

8 Chinonyelo changalepela.* Chinga pana mituka jakusala yamsogolo, jichimala. Chinga kuŵecheta yiŵecheto yachilendo, kuchimalasoni. Chinga pana mtuka wakumanyilila yindu, welewo uchimalasoni. 9 Pakuŵa kumanyilila kwetu yindu kuli kwakupelembela, nambosoni kulochesya kwetu kuli kwakupelembela. 10 Nambo patuchimanyilila yosope ni kutanda kulochesya mwakwanila, nikuti kupelembela kula kuchimala. 11 Panaliji mwanache, naŵechetaga mpela mwanache, naganisyaga mpela mwanache, soni nayiwonaga yindu mpela mwanache. Nambo sambano pangusile, nayilesile yauwanache. 12 Pakuŵa apano ngatukulola chenene yindu. Yili mpela tukulola pegalasi lyangawoneka chenene. Nambo kaneko tuchitanda kulola chenene, mwamti yichiŵaga mpela tukuyiwona meso ni meso. Pandaŵi ajino yangumanyilila yili yakupelembela, nambo pandaŵijo chinjimanyilila chenene,* mpela yanguti pakumanyika ni Mlungu. 13 Sambano yindu yitatu ayi ngasiyimala: chikulupi, chembecheyo soni chinonyelo. Nambo chakupunda pa yosopeyi chili chinonyelo.